৪. চতুক্কনিপাতো

১. ভদ্দাকাপিলানীথেৰীগাথা

৬৩. ‘‘পুত্তো বুদ্ধস্স দাযাদো, কস্সপো সুসমাহিতো;

পুব্বেনিৱাসং যোৱেদি, সগ্গাপাযঞ্চ পস্সতি.

৬৪. ‘‘অথো জাতিক্খযং পত্তো, অভিঞ্ঞাৱোসিতো মুনি;

এতাহি তীহি ৱিজ্জাহি, তেৱিজ্জো হোতি ব্ৰাহ্মণো.

৬৫. ‘‘তথেৱ ভদ্দা কাপিলানী, তেৱিজ্জা মচ্চুহাযিনী;

ধাৰেতি অন্তিমং দেহং, জেত্ৱা মাৰং সৱাহনং.

৬৬. ‘‘দিস্ৱা আদীনৱং লোকে, উভো পব্বজিতা মযং;

ত্যম্হ খীণাসৱা দন্তা, সীতিভূতম্হ নিব্বুতা’’তি.

… ভদ্দা কাপিলানী থেৰী….

চতুক্কনিপাতো নিট্ঠিতো.