৩. তিকনিপাতো

১. অপৰাসামাথেৰীগাথা

৩৯. ‘‘পণ্ণৱীসতিৱস্সানি, যতো পব্বজিতায মে;

নাভিজানামি চিত্তস্স, সমং লদ্ধং কুদাচনং.

৪০. ‘‘অলদ্ধা চেতসো সন্তিং, চিত্তে অৱসৱত্তিনী;

ততো সংৱেগমাপাদিং, সৰিত্ৱা জিনসাসনং.

৪১. ‘‘বহূহি দুক্খধম্মেহি, অপ্পমাদৰতায মে;

তণ্হক্খযো অনুপ্পত্তো, কতং বুদ্ধস্স সাসনং;

অজ্জ মে সত্তমী ৰত্তি, যতো তণ্হা ৱিসোসিতা’’তি.

… অপৰা সামা থেৰী….

২. উত্তমাথেৰীগাথা

৪২. ‘‘চতুক্খত্তুং পঞ্চক্খত্তুং, ৱিহাৰা উপনিক্খমিং;

অলদ্ধা চেতসো সন্তিং, চিত্তে অৱসৱত্তিনী.

৪৩. ‘‘সা ভিক্খুনিং উপগচ্ছিং, যা মে সদ্ধাযিকা অহু;

সা মে ধম্মমদেসেসি, খন্ধাযতনধাতুযো.

৪৪. ‘‘তস্সা ধম্মং সুণিত্ৱান, যথা মং অনুসাসি সা;

সত্তাহং একপল্লঙ্কেন, নিসীদিং পীতিসুখসমপ্পিতা [নিসীদিং সুখসমপ্পিতা (সী.)];

অট্ঠমিযা পাদে পসাৰেসিং, তমোখন্ধং পদালিযা’’তি.

… উত্তমা থেৰী….

৩. অপৰাউত্তমাথেৰীগাথা

৪৫. ‘‘যে ইমে সত্ত বোজ্ঝঙ্গা, মগ্গা নিব্বানপত্তিযা;

ভাৱিতা তে মযা সব্বে, যথা বুদ্ধেন দেসিতা.

৪৬. ‘‘সুঞ্ঞতস্সানিমিত্তস্স, লাভিনীহং যদিচ্ছকং;

ওৰসা ধীতা বুদ্ধস্স, নিব্বানাভিৰতা সদা.

৪৭. ‘‘সব্বে কামা সমুচ্ছিন্না, যে দিব্বা যে চ মানুসা;

ৱিক্খীণো জাতিসংসাৰো, নত্থি দানি পুনব্ভৱো’’তি.

… অপৰা উত্তমা থেৰী….

৪. দন্তিকাথেৰীগাথা

৪৮. ‘‘দিৱাৱিহাৰা নিক্খম্ম, গিজ্ঝকূটম্হি পব্বতে;

নাগং ওগাহমুত্তিণ্ণং, নদীতীৰম্হি অদ্দসং.

৪৯. ‘‘পুৰিসো অঙ্কুসমাদায, ‘দেহি পাদ’ন্তি যাচতি;

নাগো পসাৰযী পাদং, পুৰিসো নাগমাৰুহি.

৫০. ‘‘দিস্ৱা অদন্তং দমিতং, মনুস্সানং ৱসং গতং;

ততো চিত্তং সমাধেসিং, খলু তায ৱনং গতা’’তি.

… দন্তিকা থেৰী….

৫. উব্বিৰিথেৰীগাথা

৫১. ‘‘অম্ম জীৱাতি ৱনম্হি কন্দসি, অত্তানং অধিগচ্ছ উব্বিৰি;

চুল্লাসীতিসহস্সানি [চূড়াসীতিসহস্সানি (সী.)], সব্বা জীৱসনামিকা;

এতম্হাড়াহনে দড্ঢা, তাসং কমনুসোচসি.

৫২. ‘‘অব্বহী [অব্বুতী (স্যা.), অব্বুড়্হং (ক.)] ৱত মে সল্লং, দুদ্দসং হদযস্সিতং [হদযনিস্সিতং (সী. স্যা.)];

যং মে সোকপৰেতায, ধীতুসোকং ব্যপানুদি.

৫৩. ‘‘সাজ্জ অব্বূড়্হসল্লাহং, নিচ্ছাতা পৰিনিব্বুতা;

বুদ্ধং ধম্মঞ্চ সঙ্ঘঞ্চ, উপেমি সৰণং মুনি’’ন্তি.

… উব্বিৰী থেৰী….

৬. সুক্কাথেৰীগাথা

৫৪. ‘‘কিংমে কতা ৰাজগহে মনুস্সা, মধুং পীতাৱ [মধুপীতাৱ (সী.)] অচ্ছৰে;

যে সুক্কং ন উপাসন্তি, দেসেন্তিং বুদ্ধসাসনং.

৫৫. ‘‘তঞ্চ অপ্পটিৱানীযং, অসেচনকমোজৱং;

পিৱন্তি মঞ্ঞে সপ্পঞ্ঞা, ৱলাহকমিৱদ্ধগূ.

৫৬. ‘‘সুক্কা সুক্কেহি ধম্মেহি, ৱীতৰাগা সমাহিতা;

ধাৰেতি অন্তিমং দেহং, জেত্ৱা মাৰং সৱাহন’’ন্তি.

… সুক্কা থেৰী….

৭. সেলাথেৰীগাথা

৫৭. ‘‘নত্থি নিস্সৰণং লোকে, কিং ৱিৱেকেন কাহসি;

ভুঞ্জাহি কামৰতিযো, মাহু পচ্ছানুতাপিনী’’.

৫৮. ‘‘সত্তিসূলূপমা কামা, খন্ধাসং অধিকুট্টনা;

যং ত্ৱং ‘কামৰতিং’ ব্ৰূসি, ‘অৰতী’ দানি সা মম.

৫৯. ‘‘সব্বত্থ ৱিহতা নন্দী [নন্দি (সী. স্যা.)], তমোখন্ধো পদালিতো;

এৱং জানাহি পাপিম, নিহতো ত্ৱমসি অন্তকা’’তি.

… সেলা থেৰী….

৮. সোমাথেৰীগাথা

৬০. ‘‘যং তং ইসীহি পত্তব্বং, ঠানং দুৰভিসম্ভৱং;

ন তং দ্ৱঙ্গুলপঞ্ঞায, সক্কা পপ্পোতুমিত্থিযা’’.

৬১. ‘‘ইত্থিভাৱো নো কিং কযিৰা, চিত্তম্হি সুসমাহিতে;

ঞাণম্হি ৱত্তমানম্হি, সম্মা ধম্মং ৱিপস্সতো.

৬২. ‘‘সব্বত্থ ৱিহতা নন্দী, তমোখন্ধো পদালিতো;

এৱং জানাহি পাপিম, নিহতো ত্ৱমসি অন্তকা’’তি.

… সোমা থেৰী….

তিকনিপাতো নিট্ঠিতো.