১. সুভাজীৱকম্বৱনিকাথেৰীগাথা

৩৬৮. জীৱকম্বৱনং ৰম্মং, গচ্ছন্তিং ভিক্খুনিং সুভং;

ধুত্তকো সন্নিৱাৰেসি [তং নিৱাৰেসি (ক.)], তমেনং অব্ৰৱী সুভা.

৩৬৯. ‘‘কিং তে অপৰাধিতং মযা, যং মং ওৱৰিযান তিট্ঠসি;

ন হি পব্বজিতায আৱুসো, পুৰিসো সম্ফুসনায কপ্পতি.

৩৭০. ‘‘গৰুকে মম সত্থুসাসনে, যা সিক্খা সুগতেন দেসিতা;

পৰিসুদ্ধপদং অনঙ্গণং, কিং মং ওৱৰিযান তিট্ঠসি.

৩৭১. ‘‘আৱিলচিত্তো অনাৱিলং, সৰজো ৱীতৰজং অনঙ্গণং;

সব্বত্থ ৱিমুত্তমানসং, কিং মং ওৱৰিযান তিট্ঠসি’’.

৩৭২. ‘‘দহৰা চ অপাপিকা চসি, কিং তে পব্বজ্জা কৰিস্সতি;

নিক্খিপ কাসাযচীৱৰং, এহি ৰমাম সুপুপ্ফিতে [ৰমামসে পুপ্ফিতে (সী. স্যা.)] ৱনে.

৩৭৩. ‘‘মধুৰঞ্চ পৱন্তি সব্বসো, কুসুমৰজেন সমুট্ঠিতা দুমা;

পঠমৱসন্তো সুখো উতু, এহি ৰমাম সুপুপ্ফিতে ৱনে.

৩৭৪. ‘‘কুসুমিতসিখৰা চ পাদপা, অভিগজ্জন্তিৱ মালুতেৰিতা;

কা তুয্হং ৰতি ভৱিস্সতি, যদি একা ৱনমোগহিস্সসি [ৱনমোতৰিস্সসি (সী.), ৱনমোগাহিস্সসি (স্যা. ক.)].

৩৭৫. ‘‘ৱাড়মিগসঙ্ঘসেৱিতং, কুঞ্জৰমত্তকৰেণুলোড়িতং;

অসহাযিকা গন্তুমিচ্ছসি, ৰহিতং ভিংসনকং মহাৱনং.

৩৭৬. ‘‘তপনীযকতাৱ ধীতিকা, ৱিচৰসি চিত্তলতেৱ অচ্ছৰা;

কাসিকসুখুমেহি ৱগ্গুভি, সোভসী সুৱসনেহি নূপমে.

৩৭৭. ‘‘অহং তৱ ৱসানুগো সিযং, যদি ৱিহৰেমসে [যদিপি ৱিহৰেসি (ক.)] কাননন্তৰে;

ন হি মত্থি তযা পিযত্তৰো, পাণো কিন্নৰিমন্দলোচনে.

৩৭৮. ‘‘যদি মে ৱচনং কৰিস্সসি, সুখিতা এহি অগাৰমাৱস;

পাসাদনিৱাতৱাসিনী, পৰিকম্মং তে কৰোন্তু নাৰিযো.

৩৭৯. ‘‘কাসিকসুখুমানি ধাৰয, অভিৰোপেহি [অভিৰোহেহি (সী.)] চ মালৱণ্ণকং;

কঞ্চনমণিমুত্তকং বহুং, ৱিৱিধং আভৰণং কৰোমি তে.

৩৮০. ‘‘সুধোতৰজপচ্ছদং সুভং, গোণকতূলিকসন্থতং নৱং;

অভিৰুহ সযনং মহাৰহং, চন্দনমণ্ডিতসাৰগন্ধিকং;

৩৮১. ‘‘উপ্পলং চুদকা সমুগ্গতং, যথা তং অমনুস্সসেৱিতং;

এৱং ত্ৱং ব্ৰহ্মচাৰিনী, সকেসঙ্গেসু জৰং গমিস্সসি’’.

৩৮২. ‘‘কিং তে ইধ সাৰসম্মতং, কুণপপূৰম্হি সুসানৱড্ঢনে;

ভেদনধম্মে কড়েৱৰে [কলেৱৰে (সী. ক.)], যং দিস্ৱা ৱিমনো উদিক্খসি’’.

৩৮৩. ‘‘অক্খীনি চ তুৰিযাৰিৱ, কিন্নৰিযাৰিৱ পব্বতন্তৰে;

তৱ মে নযনানি দক্খিয, ভিয্যো কামৰতী পৱড্ঢতি.

৩৮৪. ‘‘উপ্পলসিখৰোপমানি তে, ৱিমলে হাটকসন্নিভে মুখে;

তৱ মে নযনানি দক্খিয [নযনানুদিক্খিয (সী.)], ভিয্যো কামগুণো পৱড্ঢতি.

৩৮৫. ‘‘অপি দূৰগতা সৰম্হসে, আযতপম্হে ৱিসুদ্ধদস্সনে;

ন হি মত্থি তযা পিযত্তৰা, নযনা কিন্নৰিমন্দলোচনে’’.

৩৮৬. ‘‘অপথেন পযাতুমিচ্ছসি, চন্দং কীড়নকং গৱেসসি;

মেৰুং লঙ্ঘেতুমিচ্ছসি, যো ত্ৱং বুদ্ধসুতং মগ্গযসি.

৩৮৭. ‘‘নত্থি হি লোকে সদেৱকে, ৰাগো যত্থপি দানি মে সিযা;

নপি নং জানামি কীৰিসো, অথ মগ্গেন হতো সমূলকো.

৩৮৮. ‘‘ইঙ্গালকুযাৱ [ইঙ্ঘাড়খুযাৱ (স্যা.)] উজ্ঝিতো, ৱিসপত্তোৰিৱ অগ্গিতো কতো [অগ্ঘতো হতো (সী.)];

নপি নং পস্সামি কীৰিসো, অথ মগ্গেন হতো সমূলকো.

৩৮৯. ‘‘যস্সা সিযা অপচ্চৱেক্খিতং, সত্থা ৱা অনুপাসিতো সিযা;

ত্ৱং তাদিসিকং পলোভয, জানন্তিং সো ইমং ৱিহঞ্ঞসি.

৩৯০. ‘‘ময্হঞ্হি অক্কুট্ঠৱন্দিতে, সুখদুক্খে চ সতী উপট্ঠিতা;

সঙ্খতমসুভন্তি জানিয, সব্বত্থেৱ মনো ন লিম্পতি.

৩৯১. ‘‘সাহং সুগতস্স সাৱিকা, মগ্গট্ঠঙ্গিকযানযাযিনী;

উদ্ধটসল্লা অনাসৱা, সুঞ্ঞাগাৰগতা ৰমামহং.

৩৯২. ‘‘দিট্ঠা হি মযা সুচিত্তিতা, সোম্ভা দাৰুকপিল্লকানি ৱা;

তন্তীহি চ খীলকেহি চ, ৱিনিবদ্ধা ৱিৱিধং পনচ্চকা.

৩৯৩. ‘‘তম্হুদ্ধটে তন্তিখীলকে, ৱিস্সট্ঠে ৱিকলে পৰিক্ৰিতে [পৰিপক্খীতে (সী.), পৰিপক্কতে (স্যা.)];

ন ৱিন্দেয্য খণ্ডসো কতে, কিম্হি তত্থ মনং নিৱেসযে.

৩৯৪. ‘‘তথূপমা দেহকানি মং, তেহি ধম্মেহি ৱিনা ন ৱত্তন্তি;

ধম্মেহি ৱিনা ন ৱত্ততি, কিম্হি তত্থ মনং নিৱেসযে.

৩৯৫. ‘‘যথা হৰিতালেন মক্খিতং, অদ্দস চিত্তিকং ভিত্তিযা কতং;

তম্হি তে ৱিপৰীতদস্সনং, সঞ্ঞা মানুসিকা নিৰত্থিকা.

৩৯৬. ‘‘মাযং ৱিয অগ্গতো কতং, সুপিনন্তেৱ সুৱণ্ণপাদপং;

উপগচ্ছসি অন্ধ ৰিত্তকং, জনমজ্ঝেৰিৱ ৰুপ্পৰূপকং [ৰূপৰূপকং (ক.)].

৩৯৭. ‘‘ৱট্টনিৰিৱ কোটৰোহিতা, মজ্ঝে পুব্বুড়কা সঅস্সুকা;

পীড়কোড়িকা চেত্থ জাযতি, ৱিৱিধা চক্খুৱিধা চ পিণ্ডিতা’’.

৩৯৮. উপ্পাটিয চাৰুদস্সনা, ন চ পজ্জিত্থ অসঙ্গমানসা;

‘‘হন্দ তে চক্খুং হৰস্সু তং’’, তস্স নৰস্স অদাসি তাৱদে.

৩৯৯. তস্স চ ৱিৰমাসি তাৱদে, ৰাগো তত্থ খমাপযী চ নং;

‘‘সোত্থি সিযা ব্ৰহ্মচাৰিনী, ন পুনো এদিসকং ভৱিস্সতি’’.

৪০০. ‘‘আসাদিয [আহনিয (স্যা. ক.)] এদিসং জনং, অগ্গিং পজ্জলিতং ৱ লিঙ্গিয;

গণ্হিয আসীৱিসং ৱিয, অপি নু সোত্থি সিযা খমেহি নো’’.

৪০১. মুত্তা চ ততো সা ভিক্খুনী, অগমী বুদ্ধৱৰস্স সন্তিকং;

পস্সিয ৱৰপুঞ্ঞলক্খণং, চক্খু আসি যথা পুৰাণকন্তি.

… সুভা জীৱকম্বৱনিকা থেৰী….

তিংসনিপাতো নিট্ঠিতো.