১৫. চত্তালীসনিপাতো

১. ইসিদাসীথেৰীগাথা

৪০২. নগৰম্হি কুসুমনামে, পাটলিপুত্তম্হি পথৱিযা মণ্ডে;

সক্যকুলকুলীনাযো, দ্ৱে ভিক্খুনিযো হি গুণৱতিযো.

৪০৩. ইসিদাসী তত্থ একা, দুতিযা বোধীতি সীলসম্পন্না চ;

ঝানজ্ঝাযনৰতাযো, বহুস্সুতাযো ধুতকিলেসাযো.

৪০৪. তা পিণ্ডায চৰিত্ৱা, ভত্তত্থং [ভত্তত্তং (সী.)] কৰিয ধোতপত্তাযো;

ৰহিতম্হি সুখনিসিন্না, ইমা গিৰা অব্ভুদীৰেসুং.

৪০৫. ‘‘পাসাদিকাসি অয্যে, ইসিদাসি ৱযোপি তে অপৰিহীনো;

কিং দিস্ৱান ব্যালিকং, অথাসি নেক্খম্মমনুযুত্তা’’.

৪০৬. এৱমনুযুঞ্জিযমানা সা, ৰহিতে ধম্মদেসনাকুসলা;

ইসিদাসী ৱচনমব্ৰৱি, ‘‘সুণ বোধি যথাম্হি পব্বজিতা.

৪০৭. ‘‘উজ্জেনিযা পুৰৱৰে, ময্হং পিতা সীলসংৱুতো সেট্ঠি;

তস্সম্হি একধীতা, পিযা মনাপা চ দযিতা চ.

৪০৮. ‘‘অথ মে সাকেততো ৱৰকা, আগচ্ছুমুত্তমকুলীনা;

সেট্ঠী পহূতৰতনো, তস্স মমং সুণ্হমদাসি তাতো.

৪০৯. ‘‘সস্সুযা সস্সুৰস্স চ, সাযং পাতং পণামমুপগম্ম;

সিৰসা কৰোমি পাদে, ৱন্দামি যথাম্হি অনুসিট্ঠা.

৪১০. ‘‘যা ময্হং সামিকস্স, ভগিনিযো ভাতুনো পৰিজনো ৱা;

তমেকৱৰকম্পি দিস্ৱা, উব্বিগ্গা আসনং দেমি.

৪১১. ‘‘অন্নেন চ পানেন চ, খজ্জেন চ যঞ্চ তত্থ সন্নিহিতং;

ছাদেমি উপনযামি চ, দেমি চ যং যস্স পতিৰূপং.

৪১২. ‘‘কালেন উপট্ঠহিত্ৱা [উট্ঠহিত্ৱা (স্যা. ক.), উপট্ঠহিতুং (?)], ঘৰং সমুপগমামি উম্মাৰে;

ধোৱন্তী হত্থপাদে, পঞ্জলিকা সামিকমুপেমি.

৪১৩. ‘‘কোচ্ছং পসাদং অঞ্জনিঞ্চ, আদাসকঞ্চ গণ্হিত্ৱা;

পৰিকম্মকাৰিকা ৱিয, সযমেৱ পতিং ৱিভূসেমি.

৪১৪. ‘‘সযমেৱ ওদনং সাধযামি, সযমেৱ ভাজনং ধোৱন্তী;

মাতাৱ একপুত্তকং, তথা [তদা (সী.)] ভত্তাৰং পৰিচৰামি.

৪১৫. ‘‘এৱং মং ভত্তিকতং, অনুৰত্তং কাৰিকং নিহতমানং;

উট্ঠাযিকং [উট্ঠাহিকং (ক.)] অনলসং, সীলৱতিং দুস্সতে ভত্তা.

৪১৬. ‘‘সো মাতৰঞ্চ পিতৰঞ্চ, ভণতি ‘আপুচ্ছহং গমিস্সামি;

ইসিদাসিযা ন সহ ৱচ্ছং, একাগাৰেহং [একঘৰেপ’হং (?)] সহ ৱত্থুং’.

৪১৭. ‘‘‘মা এৱং পুত্ত অৱচ, ইসিদাসী পণ্ডিতা পৰিব্যত্তা;

উট্ঠাযিকা অনলসা, কিং তুয্হং ন ৰোচতে পুত্ত’.

৪১৮. ‘‘‘ন চ মে হিংসতি কিঞ্চি, ন চহং ইসিদাসিযা সহ ৱচ্ছং;

দেস্সাৱ মে অলং মে, অপুচ্ছাহং [আপুচ্ছাহং (স্যা.), আপুচ্ছহং-নাপুচ্ছহং (?)] গমিস্সামি’.

৪১৯. ‘‘তস্স ৱচনং সুণিত্ৱা, সস্সু সসুৰো চ মং অপুচ্ছিংসু;

‘কিস্স [কিংস (?)] তযা অপৰদ্ধং, ভণ ৱিস্সট্ঠা যথাভূতং’.

৪২০. ‘‘‘নপিহং অপৰজ্ঝং কিঞ্চি, নপি হিংসেমি ন ভণামি দুব্বচনং;

কিং সক্কা কাতুয্যে, যং মং ৱিদ্দেস্সতে ভত্তা’.

৪২১. ‘‘তে মং পিতুঘৰং পটিনযিংসু, ৱিমনা দুখেন অধিভূতা;

‘পুত্তমনুৰক্খমানা, জিতাম্হসে ৰূপিনিং লক্খিং’.

৪২২. ‘‘অথ মং অদাসি তাতো, অড্ঢস্স ঘৰম্হি দুতিযকুলিকস্স;

ততো উপড্ঢসুঙ্কেন, যেন মং ৱিন্দথ সেট্ঠি.

৪২৩. ‘‘তস্সপি ঘৰম্হি মাসং, অৱসিং অথ সোপি মং পটিচ্ছৰযি [পটিচ্ছসি (সী. ক.), পটিচ্ছতি (স্যা.), পটিচ্ছৰতি (ক.)];

দাসীৱ উপট্ঠহন্তিং, অদূসিকং সীলসম্পন্নং.

৪২৪. ‘‘ভিক্খায চ ৱিচৰন্তং, দমকং দন্তং মে পিতা ভণতি;

‘হোহিসি [সোহিসি (সব্বত্থ)] মে জামাতা, নিক্খিপ পোট্ঠিঞ্চ [পোন্তিং (সী. স্যা.)] ঘটিকঞ্চ’.

৪২৫. ‘‘সোপি ৱসিত্ৱা পক্খং [পক্কমথ (সী.)], অথ তাতং ভণতি ‘দেহি মে পোট্ঠিং;

ঘটিকঞ্চ মল্লকঞ্চ, পুনপি ভিক্খং চৰিস্সামি’.

৪২৬. ‘‘অথ নং ভণতী তাতো, অম্মা সব্বো চ মে ঞাতিগণৱগ্গো;

‘কিং তে ন কীৰতি ইধ, ভণ খিপ্পং তং তে কৰিহি’তি.

৪২৭. ‘‘এৱং ভণিতো ভণতি, ‘যদি মে অত্তা সক্কোতি অলং ময্হং;

ইসিদাসিযা ন সহ ৱচ্ছং, একঘৰেহং সহ ৱত্থুং’.

৪২৮. ‘‘ৱিস্সজ্জিতো গতো সো, অহম্পি একাকিনী ৱিচিন্তেমি;

‘আপুচ্ছিতূন গচ্ছং, মৰিতুযে [মৰিতাযে (সী.), মৰিতুং (স্যা.)] ৱা পব্বজিস্সং ৱা’.

৪২৯. ‘‘অথ অয্যা জিনদত্তা, আগচ্ছী গোচৰায চৰমানা;

তাতকুলং ৱিনযধৰী, বহুস্সুতা সীলসম্পন্না.

৪৩০. ‘‘তং দিস্ৱান অম্হাকং, উট্ঠাযাসনং তস্সা পঞ্ঞাপযিং;

নিসিন্নায চ পাদে, ৱন্দিত্ৱা ভোজনমদাসিং.

৪৩১. ‘‘অন্নেন চ পানেন চ, খজ্জেন চ যঞ্চ তত্থ সন্নিহিতং;

সন্তপ্পযিত্ৱা অৱচং, ‘অয্যে ইচ্ছামি পব্বজিতুং’.

৪৩২. ‘‘অথ মং ভণতী তাতো, ‘ইধেৱ পুত্তক [পুত্তিকে (স্যা. ক.)] চৰাহি ত্ৱং ধম্মং;

অন্নেন চ পানেন চ, তপ্পয সমণে দ্ৱিজাতী চ’.

৪৩৩. ‘‘অথহং ভণামি তাতং, ৰোদন্তী অঞ্জলিং পণামেত্ৱা;

‘পাপঞ্হি মযা পকতং, কম্মং তং নিজ্জৰেস্সামি’.

৪৩৪. ‘‘অথ মং ভণতী তাতো, ‘পাপুণ বোধিঞ্চ অগ্গধম্মঞ্চ;

নিব্বানঞ্চ লভস্সু, যং সচ্ছিকৰী দ্ৱিপদসেট্ঠো’.

৪৩৫. ‘‘মাতাপিতূ অভিৱাদযিত্ৱা, সব্বঞ্চ ঞাতিগণৱগ্গং;

সত্তাহং পব্বজিতা, তিস্সো ৱিজ্জা অফস্সযিং.

৪৩৬. ‘‘জানামি অত্তনো সত্ত, জাতিযো যস্সযং ফলৱিপাকো;

তং তৱ আচিক্খিস্সং, তং একমনা নিসামেহি.

৪৩৭. ‘‘নগৰম্হি এৰকচ্ছে [এৰককচ্ছে (স্যা. ক.)], সুৱণ্ণকাৰো অহং পহূতধনো;

যোব্বনমদেন মত্তো সো, পৰদাৰং অসেৱিহং.

৪৩৮. ‘‘সোহং ততো চৱিত্ৱা, নিৰযম্হি অপচ্চিসং চিৰং;

পক্কো ততো চ উট্ঠহিত্ৱা, মক্কটিযা কুচ্ছিমোক্কমিং.

৪৩৯. ‘‘সত্তাহজাতকং মং, মহাকপি যূথপো নিল্লচ্ছেসি;

তস্সেতং কম্মফলং, যথাপি গন্ত্ৱান পৰদাৰং.

৪৪০. ‘‘সোহং ততো চৱিত্ৱা, কালং কৰিত্ৱা সিন্ধৱাৰঞ্ঞে;

কাণায চ খঞ্জায চ, এড়কিযা কুচ্ছিমোক্কমিং.

৪৪১. ‘‘দ্ৱাদস ৱস্সানি অহং, নিল্লচ্ছিতো দাৰকে পৰিৱহিত্ৱা;

কিমিনাৱট্টো অকল্লো, যথাপি গন্ত্ৱান পৰদাৰং.

৪৪২. ‘‘সোহং ততো চৱিত্ৱা, গোৱাণিজকস্স গাৱিযা জাতো;

ৱচ্ছো লাখাতম্বো, নিল্লচ্ছিতো দ্ৱাদসে মাসে.

৪৪৩. ‘‘ৱোঢূন [তে পুন (স্যা. ক.), ৱোধুন (ক. অট্ঠ.)] নঙ্গলমহং, সকটঞ্চ ধাৰযামি;

অন্ধোৱট্টো অকল্লো, যথাপি গন্ত্ৱান পৰদাৰং.

৪৪৪. ‘‘সোহং ততো চৱিত্ৱা, ৱীথিযা দাসিযা ঘৰে জাতো;

নেৱ মহিলা ন পুৰিসো, যথাপি গন্ত্ৱান পৰদাৰং.

৪৪৫. ‘‘তিংসতিৱস্সম্হি মতো, সাকটিককুলম্হি দাৰিকা জাতা;

কপণম্হি অপ্পভোগে, ধনিক [অণিক (অট্ঠ.), তংসংৱণ্ণনাযম্পি অত্থযুত্তি গৱেসিতব্বা] পুৰিসপাতবহুলম্হি.

৪৪৬. ‘‘তং মং ততো সত্থৱাহো, উস্সন্নায ৱিপুলায ৱড্ঢিযা;

ওকড্ঢতি ৱিলপন্তিং, অচ্ছিন্দিত্ৱা কুলঘৰস্মা.

৪৪৭. ‘‘অথ সোড়সমে ৱস্সে, দিস্ৱা মং পত্তযোব্বনং কঞ্ঞং;

ওৰুন্ধতস্স পুত্তো, গিৰিদাসো নাম নামেন.

৪৪৮. ‘‘তস্সপি অঞ্ঞা ভৰিযা, সীলৱতী গুণৱতী যসৱতী চ;

অনুৰত্তা [অনুৱত্তা (ক.)] ভত্তাৰং, তস্সাহং [তস্স তং (?)] ৱিদ্দেসনমকাসিং.

৪৪৯. ‘‘তস্সেতং কম্মফলং, যং মং অপকীৰিতূন গচ্ছন্তি;

দাসীৱ উপট্ঠহন্তিং, তস্সপি অন্তো কতো মযা’’তি.

… ইসিদাসী থেৰী….

চত্তালীসনিপাতো নিট্ঠিতো.