৫. সুভাকম্মাৰধীতুথেৰীগাথা

৩৩৯. ‘‘দহৰাহং সুদ্ধৱসনা, যং পুৰে ধম্মমস্সুণিং;

তস্সা মে অপ্পমত্তায, সচ্চাভিসমযো অহু.

৩৪০. ‘‘ততোহং সব্বকামেসু, ভুসং অৰতিমজ্ঝগং;

সক্কাযস্মিং ভযং দিস্ৱা, নেক্খম্মমেৱ [নেক্খম্মঞ্ঞেৱ (সী.), নেক্খম্মস্সেৱ (স্যা.)] পীহযে.

৩৪১. ‘‘হিত্ৱানহং ঞাতিগণং, দাসকম্মকৰানি চ;

গামখেত্তানি ফীতানি, ৰমণীযে পমোদিতে.

৩৪২. ‘‘পহাযহং পব্বজিতা, সাপতেয্যমনপ্পকং;

এৱং সদ্ধায নিক্খম্ম, সদ্ধম্মে সুপ্পৱেদিতে.

৩৪৩. ‘‘নেতং [ন মেতং (সী. স্যা.)] অস্স পতিৰূপং, আকিঞ্চঞ্ঞঞ্হি পত্থযে;

যো [যা (স্যা.)] জাতৰূপং ৰজতং, ছড্ডেত্ৱা [থপেত্ৱা (ক.)] পুনৰাগমে [পুনৰাগহে (ক.)].

৩৪৪. ‘‘ৰজতং জাতৰূপং ৱা, ন বোধায ন সন্তিযা;

নেতং সমণসাৰুপ্পং, ন এতং অৰিযদ্ধনং.

৩৪৫. ‘‘লোভনং মদনঞ্চেতং, মোহনং ৰজৱড্ঢনং;

সাসঙ্কং বহুআযাসং, নত্থি চেত্থ ধুৱং ঠিতি.

৩৪৬. ‘‘এত্থ ৰত্তা পমত্তা চ, সঙ্কিলিট্ঠমনা নৰা;

অঞ্ঞমঞ্ঞেন ব্যাৰুদ্ধা, পুথু কুব্বন্তি মেধগং.

৩৪৭. ‘‘ৱধো বন্ধো পৰিক্লেসো, জানি সোকপৰিদ্দৱো;

কামেসু অধিপন্নানং, দিস্সতে ব্যসনং বহুং.

৩৪৮. ‘‘তং মং ঞাতী অমিত্তাৱ, কিং ৱো কামেসু যুঞ্জথ;

জানাথ মং পব্বজিতং, কামেসু ভযদস্সিনিং.

৩৪৯. ‘‘ন হিৰঞ্ঞসুৱণ্ণেন, পৰিক্খীযন্তি আসৱা;

অমিত্তা ৱধকা কামা, সপত্তা সল্লবন্ধনা.

৩৫০. ‘‘তং মং ঞাতী অমিত্তাৱ, কিং ৱো কামেসু যুঞ্জথ;

জানাথ মং পব্বজিতং, মুণ্ডং সঙ্ঘাটিপাৰুতং.

৩৫১. ‘‘উত্তিট্ঠপিণ্ডো উঞ্ছো চ, পংসুকূলঞ্চ চীৱৰং;

এতং খো মম সাৰুপ্পং, অনগাৰূপনিস্সযো.

৩৫২. ‘‘ৱন্তা মহেসীহি কামা, যে দিব্বা যে চ মানুসা;

খেমট্ঠানে ৱিমুত্তা তে, পত্তা তে অচলং সুখং.

৩৫৩. ‘‘মাহং কামেহি সঙ্গচ্ছিং, যেসু তাণং ন ৱিজ্জতি;

অমিত্তা ৱধকা কামা, অগ্গিক্খন্ধূপমা দুখা.

৩৫৪. ‘‘পৰিপন্থো এস ভযো, সৱিঘাতো সকণ্টকো;

গেধো সুৱিসমো চেসো [লেপো (সী.)], মহন্তো মোহনামুখো.

৩৫৫. ‘‘উপসগ্গো ভীমৰূপো, কামা সপ্পসিৰূপমা;

যে বালা অভিনন্দন্তি, অন্ধভূতা পুথুজ্জনা.

৩৫৬. ‘‘কামপঙ্কেন সত্তা হি, বহূ লোকে অৱিদ্দসূ;

পৰিযন্তং ন জানন্তি, জাতিযা মৰণস্স চ.

৩৫৭. ‘‘দুগ্গতিগমনং মগ্গং, মনুস্সা কামহেতুকং;

বহুং ৱে পটিপজ্জন্তি, অত্তনো ৰোগমাৱহং.

৩৫৮. ‘‘এৱং অমিত্তজননা, তাপনা সংকিলেসিকা;

লোকামিসা বন্ধনীযা, কামা মৰণবন্ধনা [চৰণবন্ধনা (সী.)].

৩৫৯. ‘‘উম্মাদনা উল্লপনা, কামা চিত্তপ্পমদ্দিনো;

সত্তানং সঙ্কিলেসায, খিপ্পং [খিপং (সী.)] মাৰেন ওড্ডিতং.

৩৬০. ‘‘অনন্তাদীনৱা কামা, বহুদুক্খা মহাৱিসা;

অপ্পস্সাদা ৰণকৰা, সুক্কপক্খৱিসোসনা [ৱিসোসকা (সী.)].

৩৬১. ‘‘সাহং এতাদিসং কত্ৱা, ব্যসনং কামহেতুকং;

ন তং পচ্চাগমিস্সামি, নিব্বানাভিৰতা সদা.

৩৬২. ‘‘ৰণং কৰিত্ৱা [তৰিত্ৱা (সী.)] কামানং, সীতিভাৱাভিকঙ্খিনী;

অপ্পমত্তা ৱিহস্সামি, সব্বসংযোজনক্খযে.

৩৬৩. ‘‘অসোকং ৱিৰজং খেমং, অৰিযট্ঠঙ্গিকং উজুং;

তং মগ্গং অনুগচ্ছামি, যেন তিণ্ণা মহেসিনো’’.

৩৬৪. ইমং পস্সথ ধম্মট্ঠং, সুভং কম্মাৰধীতৰং;

অনেজং উপসম্পজ্জ, ৰুক্খমূলম্হি ঝাযতি.

৩৬৫. অজ্জট্ঠমী পব্বজিতা, সদ্ধা সদ্ধম্মসোভনা;

ৱিনীতুপ্পলৱণ্ণায, তেৱিজ্জা মচ্চুহাযিনী.

৩৬৬. সাযং ভুজিস্সা অনণা, ভিক্খুনী ভাৱিতিন্দ্ৰিযা;

সব্বযোগৱিসংযুত্তা, কতকিচ্চা অনাসৱা.

৩৬৭. তং সক্কো দেৱসঙ্ঘেন, উপসঙ্কম্ম ইদ্ধিযা;

নমস্সতি ভূতপতি, সুভং কম্মাৰধীতৰন্তি.

… সুভা কম্মাৰধীতা থেৰী….

ৱীসতিনিপাতো নিট্ঠিতো.