১৩. ৱীসতিনিপাতো

১. অম্বপালীথেৰীগাথা

২৫২. ‘‘কাড়কা ভমৰৱণ্ণসাদিসা, ৱেল্লিতগ্গা মম মুদ্ধজা অহুং;

তে জৰায সাণৱাকসাদিসা, সচ্চৱাদিৱচনং অনঞ্ঞথা.

২৫৩.

‘‘ৱাসিতোৱ সুৰভী কৰণ্ডকো, পুপ্ফপূৰ মম উত্তমঙ্গজো [উত্তমঙ্গভূতো (ক.)].

তং জৰাযথ সলোমগন্ধিকং, সচ্চৱাদিৱচনং অনঞ্ঞথা.

২৫৪. ‘‘কাননংৱ সহিতং সুৰোপিতং, কোচ্ছসূচিৱিচিতগ্গসোভিতং;

তং জৰায ৱিৰলং তহিং তহিং, সচ্চৱাদিৱচনং অনঞ্ঞথা.

২৫৫. ‘‘কণ্হখন্ধকসুৱণ্ণমণ্ডিতং, সোভতে সুৱেণীহিলঙ্কতং;

তং জৰায খলিতং সিৰং কতং, সচ্চৱাদিৱচনং অনঞ্ঞথা.

২৫৬. ‘‘চিত্তকাৰসুকতাৱ লেখিকা, সোভৰে সু ভমুকা পুৰে মম;

তা জৰায ৱলিভিপ্পলম্বিতা, সচ্চৱাদিৱচনং অনঞ্ঞথা.

২৫৭. ‘‘ভস্সৰা সুৰুচিৰা যথা মণী, নেত্তহেসুমভিনীলমাযতা;

তে জৰাযভিহতা ন সোভৰে, সচ্চৱাদিৱচনং অনঞ্ঞথা.

২৫৮. ‘‘সণ্হতুঙ্গসদিসী চ নাসিকা, সোভতে সু অভিযোব্বনং পতি;

সা জৰায উপকূলিতা ৱিয, সচ্চৱাদিৱচনং অনঞ্ঞথা.

২৫৯. ‘‘কঙ্কণং ৱ সুকতং সুনিট্ঠিতং, সোভৰে সু মম কণ্ণপাড়িযো;

তা জৰায ৱলিভিপ্পলম্বিতা, সচ্চৱাদিৱচনং অনঞ্ঞথা.

২৬০. ‘‘পত্তলীমকুলৱণ্ণসাদিসা, সোভৰে সু দন্তা পুৰে মম;

তে জৰায খণ্ডিতা চাসিতা [পীতকা (সী.)], সচ্চৱাদিৱচনং অনঞ্ঞথা.

২৬১. ‘‘কাননম্হি ৱনসণ্ডচাৰিনী, কোকিলাৱ মধুৰং নিকূজিহং;

তং জৰায খলিতং তহিং তহিং, সচ্চৱাদিৱচনং অনঞ্ঞথা.

২৬২. ‘‘সণ্হকম্বুৰিৱ সুপ্পমজ্জিতা, সোভতে সু গীৱা পুৰে মম;

সা জৰায ভগ্গা [ভঞ্জিতা (?)] ৱিনামিতা, সচ্চৱাদিৱচনং অনঞ্ঞথা.

২৬৩. ‘‘ৱট্টপলিঘসদিসোপমা উভো, সোভৰে সু বাহা পুৰে মম;

তা জৰায যথ পাটলিব্বলিতা [যথা পাটলিপ্পলিতা (সী. স্যা. ক.)], সচ্চৱাদিৱচনং অনঞ্ঞথা.

২৬৪. ‘‘সণ্হমুদ্দিকসুৱণ্ণমণ্ডিতা, সোভৰে সু হত্থা পুৰে মম;

তে জৰায যথা মূলমূলিকা, সচ্চৱাদিৱচনং অনঞ্ঞথা.

২৬৫. ‘‘পীনৱট্টসহিতুগ্গতা উভো, সোভৰে [সোভতে (অট্ঠ.)] সু থনকা পুৰে মম;

থেৱিকীৱ লম্বন্তি নোদকা, সচ্চৱাদিৱচনং অনঞ্ঞথা.

২৬৬. ‘‘কঞ্চনস্সফলকংৱ সম্মট্ঠং, সোভতে সু কাযো পুৰে মম;

সো ৱলীহি সুখুমাহি ওততো, সচ্চৱাদিৱচনং অনঞ্ঞথা.

২৬৭. ‘‘নাগভোগসদিসোপমা উভো, সোভৰে সু ঊৰূ পুৰে মম;

তে জৰায যথা ৱেড়ুনাড়িযো, সচ্চৱাদিৱচনং অনঞ্ঞথা.

২৬৮. ‘‘সণ্হনূপুৰসুৱণ্ণমণ্ডিতা, সোভৰে সু জঙ্ঘা পুৰে মম;

তা জৰায তিলদণ্ডকাৰিৱ, সচ্চৱাদিৱচনং অনঞ্ঞথা.

২৬৯. ‘‘তূলপুণ্ণসদিসোপমা উভো, সোভৰে সু পাদা পুৰে মম;

তে জৰায ফুটিতা ৱলীমতা, সচ্চৱাদিৱচনং অনঞ্ঞথা.

২৭০. ‘‘এদিসো অহু অযং সমুস্সযো, জজ্জৰো বহুদুক্খানমালযো;

সোপলেপপতিতো জৰাঘৰো, সচ্চৱাদিৱচনং অনঞ্ঞথা’’.

… অম্বপালী থেৰী….

২. ৰোহিনীথেৰীগাথা

২৭১. ‘‘‘সমণা’তি ভোতি সুপি [ভোতি ত্ৱং সযসি (সী.), ভোতি মং ৱিপস্সি (স্যা.)], ‘সমণা’তি পবুজ্ঝসি [পটিবুজ্ঝসি (সী. স্যা.)];

সমণানেৱ [সমণানমেৱ (সী. স্যা.)] কিত্তেসি, সমণী নূন [সমণী নু (ক.)] ভৱিস্সসি.

২৭২. ‘‘ৱিপুলং অন্নঞ্চ পানঞ্চ, সমণানং পৱেচ্চসি [পযচ্ছসি (সী.)];

ৰোহিনী দানি পুচ্ছামি, কেন তে সমণা পিযা.

২৭৩. ‘‘অকম্মকামা অলসা, পৰদত্তূপজীৱিনো;

আসংসুকা সাদুকামা, কেন তে সমণা পিযা’’.

২৭৪. ‘‘চিৰস্সং ৱত মং তাত, সমণানং পৰিপুচ্ছসি;

তেসং তে কিত্তযিস্সামি, পঞ্ঞাসীলপৰক্কমং.

২৭৫. ‘‘কম্মকামা অনলসা, কম্মসেট্ঠস্স কাৰকা;

ৰাগং দোসং পজহন্তি, তেন মে সমণা পিযা.

২৭৬. ‘‘তীণি পাপস্স মূলানি, ধুনন্তি সুচিকাৰিনো;

সব্বং পাপং পহীনেসং, তেন মে সমণা পিযা.

২৭৭. ‘‘কাযকম্মং সুচি নেসং, ৱচীকম্মঞ্চ তাদিসং;

মনোকম্মং সুচি নেসং, তেন মে সমণা পিযা.

২৭৮. ‘‘ৱিমলা সঙ্খমুত্তাৱ, সুদ্ধা সন্তৰবাহিৰা;

পুণ্ণা সুক্কান ধম্মানং [সুক্কেহি ধম্মেহি (সী. স্যা. অট্ঠ.)], তেন মে সমণা পিযা.

২৭৯. ‘‘বহুস্সুতা ধম্মধৰা, অৰিযা ধম্মজীৱিনো;

অত্থং ধম্মঞ্চ দেসেন্তি, তেন মে সমণা পিযা.

২৮০. ‘‘বহুস্সুতা ধম্মধৰা, অৰিযা ধম্মজীৱিনো;

একগ্গচিত্তা সতিমন্তো, তেন মে সমণা পিযা.

২৮১. ‘‘দূৰঙ্গমা সতিমন্তো, মন্তভাণী অনুদ্ধতা;

দুক্খস্সন্তং পজানন্তি, তেন মে সমণা পিযা.

২৮২. ‘‘যস্মা গামা পক্কমন্তি, ন ৱিলোকেন্তি কিঞ্চনং;

অনপেক্খাৱ গচ্ছন্তি, তেন মে সমণা পিযা.

২৮৩. ‘‘ন তেসং কোট্ঠে ওপেন্তি, ন কুম্ভিং ন খড়োপিযং;

পৰিনিট্ঠিতমেসানা, তেন মে সমণা পিযা.

২৮৪. ‘‘ন তে হিৰঞ্ঞং গণ্হন্তি, ন সুৱণ্ণং ন ৰূপিযং;

পচ্চুপ্পন্নেন যাপেন্তি, তেন মে সমণা পিযা.

২৮৫. ‘‘নানাকুলা পব্বজিতা, নানাজনপদেহি চ;

অঞ্ঞমঞ্ঞং পিযাযন্তি [পিহযন্তি (ক.)], তেন মে সমণা পিযা’’.

২৮৬. ‘‘অত্থায ৱত নো ভোতি, কুলে জাতাসি ৰোহিনী;

সদ্ধা বুদ্ধে চ ধম্মে চ, সঙ্ঘে চ তিব্বগাৰৱা.

২৮৭. ‘‘তুৱং হেতং পজানাসি, পুঞ্ঞক্খেত্তং অনুত্তৰং;

অম্হম্পি এতে সমণা, পটিগণ্হন্তি দক্খিণং’’.

২৮৮. ‘‘পতিট্ঠিতো হেত্থ যঞ্ঞো, ৱিপুলো নো ভৱিস্সতি;

সচে ভাযসি দুক্খস্স, সচে তে দুক্খমপ্পিযং.

২৮৯. ‘‘উপেহি সৰণং বুদ্ধং, ধম্মং সঙ্ঘঞ্চ তাদিনং;

সমাদিযাহি সীলানি, তং তে অত্থায হেহিতি’’.

২৯০. ‘‘উপেমি সৰণং বুদ্ধং, ধম্মং সঙ্ঘঞ্চ তাদিনং;

সমাদিযামি সীলানি, তং মে অত্থায হেহিতি.

২৯১. ‘‘ব্ৰহ্মবন্ধু পুৰে আসিং, সো ইদানিম্হি ব্ৰাহ্মণো;

তেৱিজ্জো সোত্তিযো চম্হি, ৱেদগূ চম্হি ন্হাতকো’’.

… ৰোহিনী থেৰী….

৩. চাপাথেৰীগাথা

২৯২. ‘‘লট্ঠিহত্থো পুৰে আসি, সো দানি মিগলুদ্দকো;

আসায পলিপা ঘোৰা, নাসক্খি পাৰমেতৱে.

২৯৩. ‘‘সুমত্তং মং মঞ্ঞমানা, চাপা পুত্তমতোসযি;

চাপায বন্ধনং ছেত্ৱা, পব্বজিস্সং পুনোপহং.

২৯৪. ‘‘মা মে কুজ্ঝি মহাৱীৰ, মা মে কুজ্ঝি মহামুনি;

ন হি কোধপৰেতস্স, সুদ্ধি অত্থি কুতো তপো.

২৯৫. ‘‘পক্কমিস্সঞ্চ নাড়াতো, কোধ নাড়ায ৱচ্ছতি;

বন্ধন্তী ইত্থিৰূপেন, সমণে ধম্মজীৱিনো’’ [ধম্মজীৱিনে (ক.)].

২৯৬. ‘‘এহি কাড় নিৱত্তস্সু, ভুঞ্জ কামে যথা পুৰে;

অহঞ্চ তে ৱসীকতা, যে চ মে সন্তি ঞাতকা’’.

২৯৭. ‘‘এত্তো চাপে চতুব্ভাগং, যথা ভাসসি ত্ৱঞ্চ মে;

তযি ৰত্তস্স পোসস্স, উড়াৰং ৱত তং সিযা’’.

২৯৮. ‘‘কাড়ঙ্গিনিংৱ তক্কাৰিং, পুপ্ফিতং গিৰিমুদ্ধনি;

ফুল্লং দালিমলট্ঠিংৱ, অন্তোদীপেৱ পাটলিং.

২৯৯. ‘‘হৰিচন্দনলিত্তঙ্গিং, কাসিকুত্তমধাৰিনিং;

তং মং ৰূপৱতিং সন্তিং, কস্স ওহায গচ্ছসি’’.

৩০০. ‘‘সাকুন্তিকোৱ সকুণিং [সকুণং (স্যা.)], যথা বন্ধিতুমিচ্ছতি;

আহৰিমেন ৰূপেন, ন মং ত্ৱং বাধযিস্সসি’’.

৩০১. ‘‘ইমঞ্চ মে পুত্তফলং, কাড় উপ্পাদিতং তযা;

তং মং পুত্তৱতিং সন্তিং, কস্স ওহায গচ্ছসি’’.

৩০২. ‘‘জহন্তি পুত্তে সপ্পঞ্ঞা, ততো ঞাতী ততো ধনং;

পব্বজন্তি মহাৱীৰা, নাগো ছেত্ৱাৱ বন্ধনং’’.

৩০৩. ‘‘ইদানি তে ইমং পুত্তং, দণ্ডেন ছুৰিকায ৱা;

ভূমিযং ৱা নিসুম্ভিস্সং [নিসুম্ভেয্যং (সী.)], পুত্তসোকা ন গচ্ছসি’’.

৩০৪. ‘‘সচে পুত্তং সিঙ্গালানং, কুক্কুৰানং পদাহিসি;

ন মং পুত্তকত্তে জম্মি, পুনৰাৱত্তযিস্সসি’’.

৩০৫. ‘‘হন্দ খো দানি ভদ্দন্তে, কুহিং কাড় গমিস্সসি;

কতমং গামনিগমং, নগৰং ৰাজধানিযো’’.

৩০৬. ‘‘অহুম্হ পুব্বে গণিনো, অস্সমণা সমণমানিনো;

গামেন গামং ৱিচৰিম্হ, নগৰে ৰাজধানিযো.

৩০৭. ‘‘এসো হি ভগৱা বুদ্ধো, নদিং নেৰঞ্জৰং পতি;

সব্বদুক্খপ্পহানায, ধম্মং দেসেতি পাণিনং;

তস্সাহং সন্তিকং গচ্ছং, সো মে সত্থা ভৱিস্সতি’’.

৩০৮. ‘‘ৱন্দনং দানি ৱজ্জাসি, লোকনাথং অনুত্তৰং;

পদক্খিণঞ্চ কত্ৱান, আদিসেয্যাসি দক্খিণং’’.

৩০৯. ‘‘এতং খো লব্ভমম্হেহি, যথা ভাসসি ত্ৱঞ্চ মে;

ৱন্দনং দানি তে ৱজ্জং, লোকনাথং অনুত্তৰং;

পদক্খিণঞ্চ কত্ৱান, আদিসিস্সামি দক্খিণং’’.

৩১০. ততো চ কাড়ো পক্কামি, নদিং নেৰঞ্জৰং পতি;

সো অদ্দসাসি সম্বুদ্ধং, দেসেন্তং অমতং পদং.

৩১১. দুক্খং দুক্খসমুপ্পাদং, দুক্খস্স চ অতিক্কমং;

অৰিযং চট্ঠঙ্গিকং মগ্গং, দুক্খূপসমগামিনং.

৩১২. তস্স পাদানি ৱন্দিত্ৱা, কত্ৱান নং [কত্ৱানহং (সী.)] পদক্খিণং;

চাপায আদিসিত্ৱান, পব্বজিং অনগাৰিযং;

তিস্সো ৱিজ্জা অনুপ্পত্তা, কতং বুদ্ধস্স সাসনং.

… চাপা থেৰী….

৪. সুন্দৰীথেৰীগাথা

৩১৩. ‘‘পেতানি ভোতি পুত্তানি, খাদমানা তুৱং পুৰে;

তুৱং দিৱা চ ৰত্তো চ, অতীৱ পৰিতপ্পসি.

৩১৪. ‘‘সাজ্জ সব্বানি খাদিত্ৱা, সতপুত্তানি [সত্ত পুত্তানি (স্যা.)] ব্ৰাহ্মণী;

ৱাসেট্ঠি কেন ৱণ্ণেন, ন বাড়্হং পৰিতপ্পসি’’.

৩১৫. ‘‘বহূনি পুত্তসতানি, ঞাতিসঙ্ঘসতানি চ;

খাদিতানি অতীতংসে, মম তুয্হঞ্চ ব্ৰাহ্মণ.

৩১৬. ‘‘সাহং নিস্সৰণং ঞত্ৱা, জাতিযা মৰণস্স চ;

ন সোচামি ন ৰোদামি, ন চাপি পৰিতপ্পযিং’’.

৩১৭. ‘‘অব্ভুতং ৱত ৱাসেট্ঠি, ৱাচং ভাসসি এদিসিং;

কস্স ত্ৱং ধম্মমঞ্ঞায, গিৰং [থিৰং (সী.)] ভাসসি এদিসিং’’.

৩১৮. ‘‘এস ব্ৰাহ্মণ সম্বুদ্ধো, নগৰং মিথিলং পতি;

সব্বদুক্খপ্পহানায, ধম্মং দেসেসি পাণিনং.

৩১৯. ‘‘তস্স ব্ৰহ্মে [ব্ৰাহ্মণ (সী. স্যা.)] অৰহতো, ধম্মং সুত্ৱা নিৰূপধিং;

তত্থ ৱিঞ্ঞাতসদ্ধম্মা, পুত্তসোকং ব্যপানুদিং’’.

৩২০. ‘‘সো অহম্পি গমিস্সামি, নগৰং মিথিলং পতি;

অপ্পেৱ মং সো ভগৱা, সব্বদুক্খা পমোচযে’’.