৯. অম্বপালিথেৰীঅপদানং

২০৪. ‘‘যো ৰংসিফুসিতাৱেড়ো, ফুস্সো নাম মহামুনি;

তস্সাহং ভগিনী আসিং, অজাযিং খত্তিযে কুলে.

২০৫. ‘‘তস্স ধম্মং সুণিত্ৱাহং, ৱিপ্পসন্নেন চেতসা;

মহাদানং দদিত্ৱান, পত্থযিং ৰূপসম্পদং.

২০৬. ‘‘একতিংসে ইতো কপ্পে, সিখী লোকগ্গনাযকো;

উপ্পন্নো লোকপজ্জোতো, তিলোকসৰণো জিনো.

২০৭. ‘‘তদাৰুণপুৰে ৰম্মে, ব্ৰাহ্মঞ্ঞকুলসম্ভৱা;

ৱিমুত্তচিত্তং কুপিতা, ভিক্খুনিং অভিসাপযিং.

২০৮. ‘‘ৱেসিকাৱ অনাচাৰা, জিনসাসনদূসিকা;

এৱং অক্কোসযিত্ৱান, তেন পাপেন কম্মুনা.

২০৯. ‘‘দাৰুণং নিৰযং গন্ত্ৱা, মহাদুক্খসমপ্পিতা;

ততো চুতা মনুস্সেসু, উপপন্না তপস্সিনী.

২১০. ‘‘দসজাতিসহস্সানি, গণিকত্তমকাৰযিং;

তম্হা পাপা ন মুচ্চিস্সং, ভুত্ৱা দুট্ঠৱিসং যথা.

২১১. ‘‘ব্ৰহ্মচৰিযমসেৱিস্সং [ব্ৰহ্মৱেসমসেৱিস্সং (স্যা.), ব্ৰহ্মচেৰমসেৱিস্সং (পী.)], কস্সপে জিনসাসনে;

তেন কম্মৱিপাকেন, অজাযিং তিদসে পুৰে.

২১২. ‘‘পচ্ছিমে ভৱে সম্পত্তে, অহোসিং ওপপাতিকা;

অম্বসাখন্তৰে জাতা, অম্বপালীতি তেনহং.

২১৩. ‘‘পৰিৱুতা পাণকোটীহি, পব্বজিং জিনসাসনে;

পত্তাহং অচলং ঠানং, ধীতা বুদ্ধস্স ওৰসা.

২১৪. ‘‘ইদ্ধীসু চ ৱসী হোমি, সোতধাতুৱিসুদ্ধিযা;

চেতোপৰিযঞাণস্স, ৱসী হোমি মহামুনে.

২১৫. ‘‘পুব্বেনিৱাসং জানামি, দিব্বচক্খু ৱিসোধিতং;

সব্বাসৱপৰিক্খীণা, নত্থি দানি পুনব্ভৱো.

২১৬. ‘‘অত্থধম্মনিৰুত্তীসু, পটিভানে তথেৱ চ;

ঞাণং মে ৱিমলং সুদ্ধং, বুদ্ধসেট্ঠস্স ৱাহসা.

২১৭. ‘‘কিলেসা ঝাপিতা ময্হং…পে… ৱিহৰামি অনাসৱা.

২১৮. ‘‘স্ৱাগতং ৱত মে আসি…পে… কতং বুদ্ধস্স সাসনং.

২১৯. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং অম্বপালি ভিক্খুনী ইমা গাথাযো

অভাসিত্থাতি.

অম্বপালিথেৰিযাপদানং নৱমং.