১০. পেসলাথেৰীঅপদানং

২২০. ‘‘ইমম্হি ভদ্দকে কপ্পে, ব্ৰহ্মবন্ধু মহাযসো;

কস্সপো নাম গোত্তেন, উপ্পজ্জি ৱদতং ৱৰো.

২২১. ‘‘সাৱত্থিযং পুৰে ৱৰে, উপাসককুলে অহং;

পসূতা তং [নং (স্যা.)] জিনৱৰং, দিস্ৱা সুত্ৱা চ দেসনং.

২২২. ‘‘তং ৱীৰং সৰণং গন্ত্ৱা, সীলানি চ সমাদিযিং;

কদাচি সো মহাৱীৰো, মহাজনসমাগমে.

২২৩. ‘‘অত্তনো অভিসম্বোধিং, পকাসেসি নৰাসভো;

অননুস্সুতধম্মেসু, পুব্বে দুক্খাদিকেসু চ.

২২৪. ‘‘চক্খু ঞাণঞ্চ পঞ্ঞা চ, ৱিজ্জালোকো চ আসি মে;

তং সুত্ৱা উগ্গহেত্ৱান, পৰিপুচ্ছিঞ্চ ভিক্খৱো.

২২৫. ‘‘তেন কম্মেন সুকতেন, চেতনাপণিধীহি চ;

জহিত্ৱা মানুসং দেহং, তাৱতিংসমগচ্ছহং.

২২৬. ‘‘পচ্ছিমে চ ভৱে দানি, জাতা সেট্ঠিমহাকুলে;

উপেচ্চ বুদ্ধং সদ্ধম্মং, সুত্ৱা সচ্চূপসংহিতং.

২২৭. ‘‘পব্বজিত্ৱাচিৰেনেৱ, সচ্চত্থানি [সব্বত্থানি (স্যা. ক.)] ৱিচিন্তযং;

খেপেত্ৱা আসৱে সব্বে, অৰহত্তমপাপুণিং.

২২৮. ‘‘ইদ্ধীসু চ ৱসী হোমি, দিব্বায সোতধাতুযা;

চেতোপৰিযঞাণস্স, ৱসী হোমি মহামুনে.

২২৯. ‘‘পুব্বেনিৱাসং জানামি, দিব্বচক্খু ৱিসোধিতং;

সব্বাসৱপৰিক্খীণা, নত্থি দানি পুনব্ভৱো.

২৩০. ‘‘অত্থধম্মনিৰুত্তীসু, পটিভানে তথেৱ চ;

ঞাণং মে ৱিমলং সুদ্ধং, বুদ্ধসেট্ঠস্স ৱাহসা.

২৩১. ‘‘কিলেসা ঝাপিতা ময্হং, ভৱা সব্বে সমূহতা;

নাগীৱ বন্ধনং ছেত্ৱা, ৱিহৰামি অনাসৱা.

২৩২. ‘‘স্ৱাগতং ৱত মে আসি, মম বুদ্ধস্স সন্তিকে;

তিস্সো ৱিজ্জা অনুপ্পত্তা, কতং বুদ্ধস্স সাসনং.

২৩৩. ‘‘পটিসম্ভিদা চতস্সো, ৱিমোক্খাপি চ অট্ঠিমে;

ছড়ভিঞ্ঞা সচ্ছিকতা, কতং বুদ্ধস্স সাসনং’’.

ইত্থং সুদং পেসলা [সেলা (স্যা. পী.)] ভিক্খুনী ইমা গাথাযো অভাসিত্থাতি.

পেসলাথেৰিযাপদানং দসমং.

খত্তিযাৱগ্গো চতুত্থো.