৪. খত্তিযাৱগ্গো

১. যসৱতীপমুখঅট্ঠাৰসভিক্খুনীসহস্সঅপদানং

১. ‘‘ভৱা সব্বে পৰিক্খীণা, ভৱা সন্তি ৱিমোচিতা;

সব্বাসৱা চ নো নত্থি, আৰোচেম মহামুনে.

২. ‘‘পুৰিমং কুসলং কম্মং [পৰিকম্মঞ্চ কুসলং (স্যা.)], যং কিঞ্চি সাধুপত্থিতং;

পৰিভোগমযং দিন্নং, তুয্হত্থায মহামুনে.

৩. ‘‘বুদ্ধপচ্চেকবুদ্ধানং, সাৱকানঞ্চ পত্থিতং [বুদ্ধানং সাৱকানঞ্চ (সী. ক.)];

পৰিভোগমযং দিন্নং, তুয্হত্থায মহামুনে.

৪. ‘‘উচ্চনীচমযং কম্মং, ভিক্খূনং সাধুপত্থিতং;

উচ্চাকুলপৰিকম্মং, কতমেতং মহামুনে [কতম্হেহি মহামুনে (স্যা. পী.)].

৫. ‘‘তেনেৱ সুক্কমূলেন, চোদিতা কম্মসম্পদা;

মানুসিকমতিক্কন্তা, জাযিংসু খত্তিযে কুলে.

৬. ‘‘উপ্পত্তে চ কতে কম্মে, জাতিযা ৱাপি একতো;

পচ্ছিমে একতো জাতা, খত্তিযা কুলসম্ভৱা.

৭. ‘‘ৰূপৱতী ভোগৱতী, লাভসক্কাৰপূজিতা;

অন্তেপুৰে মহাৱীৰ, দেৱানং ৱিয নন্দনে.

৮. ‘‘নিব্বিন্দিত্ৱা অগাৰম্হা, পব্বজিম্হনগাৰিযং;

কতিপাহং উপাদায, সব্বা পত্তাম্হ নিব্বুতিং.

৯. ‘‘চীৱৰং পিণ্ডপাতঞ্চ, পচ্চযং সযনাসনং;

উপনেন্তি বহূ অম্হে, সদা সক্কতপূজিতা.

১০. ‘‘কিলেসা ঝাপিতা অম্হং, ভৱা সব্বে সমূহতা;

নাগীৱ বন্ধনং ছেত্ৱা, ৱিহৰাম অনাসৱা.

১১. ‘‘স্ৱাগতং ৱত নো আসি, মম বুদ্ধস্স সন্তিকে;

তিস্সো ৱিজ্জা অনুপ্পত্তা, কতং বুদ্ধস্স সাসনং.

১২. ‘‘পটিসম্ভিদা চতস্সো, ৱিমোক্খাপি চ অট্ঠিমে;

ছড়ভিঞ্ঞা সচ্ছিকতা, কতং বুদ্ধস্স সাসনং’’.

ইত্থং সুদং যসৱতীপমুখানি খত্তিযকঞ্ঞাভিক্খুনিযো অট্ঠাৰসসহস্সানি ভগৱতো সম্মুখা ইমা গাথাযো অভাসিত্থাতি.

যসৱতীপমুখঅট্ঠাৰসভিক্খুনীসহস্সাপদানং পঠমং.

২. চতুৰাসীতিভিক্খুনীসহস্সঅপদানং

১৩. ‘‘চুল্লাসীতিসহস্সানি, ব্ৰাহ্মঞ্ঞকুলসম্ভৱা [ব্ৰাহ্মণকুলসম্ভৱা (স্যা. ক.)];

সুখুমালহত্থপাদা, পুৰে তুয্হং মহামুনে.

১৪. ‘‘ৱেস্সসুদ্দকুলে জাতা, দেৱা নাগা চ কিন্নৰা;

চাতুদ্দীপা বহূ কঞ্ঞা, পুৰে তুয্হং মহামুনে.

১৫. ‘‘কাচি পব্বজিতা অত্থি, সব্বদস্সাৱিনো [সচ্চদস্সাৱিনো (সী. পী.)] হূ;

দেৱা চ কিন্নৰা নাগা, ফুসিস্সন্তি অনাগতে.

১৬. ‘‘অনুভোত্ৱা যসং সব্বং, পত্ৱান সব্বসম্পদা;

তুম্হং [ত্ৱযি (সী. পী.)] পসাদং পটিলদ্ধা, বুজ্ঝিস্সন্তি অনাগতে.

১৭. ‘‘অম্হে ব্ৰাহ্মণধীতা তু, ব্ৰাহ্মঞ্ঞকুলসম্ভৱা;

পেক্খতো নো [লক্খণা চ (স্যা.)] মহাৱীৰ, পাদে ৱন্দাম চক্খুম.

১৮. ‘‘উপহতা ভৱা সব্বে, মূলতণ্হা সমূহতা;

সমুচ্ছিন্না অনুসযা, পুঞ্ঞসঙ্খাৰদালিতা.

১৯. ‘‘সমাধিগোচৰা সব্বা, সমাপত্তিৱসী কতা;

ঝানেন ধম্মৰতিযা, ৱিহৰিস্সাম নো সদা.

২০. ‘‘ভৱনেত্তি অৱিজ্জা চ, সঙ্খাৰাপি চ খেপিতা;

সুদুদ্দসং পদং গন্ত্ৱা, অনুজানাথ [অনুজানিম্হ (স্যা. পী. ক.)] নাযক.

২১. ‘‘উপকাৰা মমং তুম্হে, দীঘৰত্তং কতাৱিনো;

চতুন্নং সংসযং ছেত্ৱা, সব্বা গচ্ছন্তু নিব্বুতিং.

২২. ‘‘ৱন্দিত্ৱা মুনিনো পাদে, কত্ৱা ইদ্ধিৱিকুব্বনং;

কাচি দস্সেন্তি আলোকং, অন্ধকাৰমথাপৰা.

২৩. ‘‘দস্সেন্তি চন্দসূৰিযে, সাগৰঞ্চ সমচ্ছকং;

সিনেৰুং পৰিভণ্ডঞ্চ, দস্সেন্তি পাৰিছত্তকং.

২৪. ‘‘তাৱতিংসঞ্চ ভৱনং, যামং দস্সেন্তি ইদ্ধিযা;

তুসিতং নিম্মিতে দেৱে, ৱসৱত্তী মহিস্সৰে.

২৫. ‘‘ব্ৰহ্মানো কাচি দস্সেন্তি, চঙ্কমঞ্চ মহাৰহং;

ব্ৰহ্মৱণ্ণঞ্চ মাপেত্ৱা, ধম্মং দেসেন্তি সুঞ্ঞতং.

২৬. ‘‘নানাৱিকুব্বনং কত্ৱা, ইদ্ধিং দস্সিয সত্থুনো;

দস্সযিংসু বলং সব্বা, পাদে ৱন্দিংসু সত্থুনো.

২৭. ‘‘ইদ্ধীসু চ ৱসী হোম, দিব্বায সোতধাতুযা;

চেতোপৰিযঞাণস্স, ৱসী হোম মহামুনে.

২৮. ‘‘পুব্বেনিৱাসং জানাম, দিব্বচক্খু ৱিসোধিতং;

সব্বাসৱপৰিক্খীণা, নত্থি দানি পুনব্ভৱো.

২৯. ‘‘অত্থধম্মনিৰুত্তীসু, পটিভানে তথেৱ চ;

ঞাণং অম্হং মহাৱীৰ, উপ্পন্নং তৱ সন্তিকে.

৩০. ‘‘পুব্বানং লোকনাথানং, সঙ্গমং নো নিদস্সিতং;

অধিকাৰং বহুং অম্হং, তুয্হত্থায মহামুনে.

৩১. ‘‘যং অম্হেহি কতং কম্মং, কুসলং সৰ তং মুনে;

তুয্হত্থায মহাৱীৰ, পুঞ্ঞানুপচিতানি নো.

৩২. ‘‘সতসহস্সিতো কপ্পে, পদুমুত্তৰো মহামুনি;

পুৰং হংসৱতী নাম, সম্বুদ্ধস্স কুলাসযং.

৩৩. ‘‘দ্ৱাৰেন হংসৱতিযা, গঙ্গা সন্দতি সব্বদা;

উব্বড়্হা নদিযা ভিক্খূ, গমনং ন লভন্তি তে.

৩৪. ‘‘দিৱসং দ্ৱে তযো চেৱ, সত্তাহং মাসিকং ততো;

চতুমাসম্পি সম্পুণ্ণং, গমনং ন লভন্তি তে.

৩৫. ‘‘তদা অহু সত্তসাৰো, জটিলো নাম ৰট্ঠিকো;

ওৰুদ্ধে [ওৰতীৰে (স্যা.)] ভিক্খৱো দিস্ৱা, সেতুং গঙ্গায কাৰযি.

৩৬. ‘‘তদা সতসহস্সেহি, সেতুং গঙ্গায কাৰযি;

সঙ্ঘস্স ওৰিমে তীৰে, ৱিহাৰঞ্চ অকাৰযি.

৩৭. ‘‘ইত্থিযো পুৰিসা চেৱ, উচ্চনীচকুলানি চ;

তস্স সেতুং ৱিহাৰঞ্চ [তেসু সেতুৱিহাৰেসু (সী.), তস্স সেতূ ৱিহাৰে চ (পী.)], সমভাগং অকংসু তে.

৩৮. ‘‘অম্হে অঞ্ঞে চ মানুজা, ৱিপ্পসন্নেন চেতসা;

তস্স ধম্মেসু দাযাদা, নগৰে জনপদেসু চ.

৩৯. ‘‘ইত্থী পুমা কুমাৰা চ, বহূ চেৱ কুমাৰিকা;

সেতুনো চ ৱিহাৰস্স, ৱালুকা আকিৰিংসু তে.

৪০. ‘‘ৱীথিং সম্মজ্জনং কত্ৱা, কদলীপুণ্ণঘটে ধজে;

ধূপং চুণ্ণঞ্চ মালঞ্চ, কাৰং কত্ৱান সত্থুনো.

৪১. ‘‘সেতুৱিহাৰে কাৰেত্ৱা, নিমন্তেত্ৱা ৱিনাযকং;

মহাদানং দদিত্ৱান, সম্বোধিং অভিপত্থযিং.

৪২. ‘‘পদুমুত্তৰো মহাৱীৰো, তাৰকো সব্বপাণিনং;

অনুমোদনীযংকাসি, জটিলস্স মহামুনি [কত্ৱা, ৱিযাকাসি মহামুনি (স্যা.)].

৪৩. ‘‘‘সতসহস্সাতিক্কন্তে, কপ্পো হেস্সতি ভদ্দকো;

ভৱাভৱেনুভোত্ৱান, পাপুণিস্সতি বোধিযং.

৪৪. ‘‘‘কাচি হত্থপৰিকম্মং, কতাৱী নৰনাৰিযো;

অনাগতম্হি অদ্ধানে, সব্বা হেস্সন্তি সম্মুখা’.

৪৫. ‘‘তেন কম্মৱিপাকেন, চেতনাপণিধীহি চ;

উপ্পন্না দেৱভৱনং, তুয্হং তা পৰিচাৰিকা.

৪৬. ‘‘দিব্বসুখং অসঙ্খিযং, মানুসঞ্চ অসঙ্খিযং;

তুয্হং তে পৰিচাৰেম, সংসৰিম্হ ভৱাভৱে.

৪৭. ‘‘সতসহস্সিতো কপ্পে, সুকতং কম্মসম্পদং;

সুখুমালী মনুস্সানং, অথো দেৱপুৰে ৱৰে.

৪৮. ‘‘ৰূপভোগযসে চেৱ, অথো কিত্তিঞ্চ সক্কতং [কিত্তিসুখং পিযং (স্যা.)];

লভাম সততং সব্বং, সুকতং কম্মসম্পদং.

৪৯. ‘‘পচ্ছিমে ভৱে সম্পত্তে, জাতাম্হ ব্ৰাহ্মণে কুলে;

সুখুমালহত্থপাদা, সক্যপুত্তনিৱেসনে.

৫০. ‘‘সব্বকালম্পি পথৱিং, ন পস্সাম ন লঙ্কতং;

চিক্খল্লভূমিমসুচিং [চিক্খল্লং ভূমিং গমনং (স্যা.)], ন পস্সাম মহামুনে.

৫১. ‘‘অগাৰং ৱসন্তে অম্হে, সক্কাৰং সব্বকালিকং;

উপনেন্তি সদা সব্বং, পুব্বকম্মফলেন নো [পুব্বকম্মফলং ততো (সী. পী.)].

৫২. ‘‘অগাৰং পজহিত্ৱান, পব্বজিত্ৱানগাৰিযং;

সংসাৰপথনিত্থিণ্ণা, ৱীতৰাগা ভৱামসে [নত্থি দানি পুনব্ভৱো (সী. স্যা. পী.)].

৫৩. ‘‘চীৱৰং পিণ্ডপাতঞ্চ, পচ্চযং সযনাসনং;

উপনেন্তি সদা অম্হে, সহস্সানি ততো ততো.

৫৪. ‘‘কিলেসা ঝাপিতা অম্হং…পে… ৱিহৰাম অনাসৱা.

৫৫. ‘‘স্ৱাগতং ৱত নো আসি…পে… কতং বুদ্ধস্স সাসনং.

৫৬. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং চতুৰাসীতিব্ৰাহ্মণকঞ্ঞাভিক্খুনীসহস্সানি ভগৱতো সম্মুখা ইমা গাথাযো অভাসিত্থাতি.

চতুৰাসীতিভিক্খুনীসহস্সাপদানং দুতিযং.

৩. উপ্পলদাযিকাথেৰীঅপদানং

৫৭. ‘‘নগৰে অৰুণৱতিযা, অৰুণো নাম খত্তিযো;

তস্স ৰঞ্ঞো অহুং ভৰিযা, একজ্ঝং চাৰযামহং.

৫৮. ‘‘ৰহোগতা নিসীদিত্ৱা, এৱং চিন্তেসহং তদা;

‘কুসলং মে কতং নত্থি, আদায গমিযং মম.

৫৯. ‘‘‘মহাভিতাপং কটুকং, ঘোৰৰূপং সুদাৰুণং;

নিৰযং নূন গচ্ছামি, এত্থ মে নত্থি সংসযো’.

৬০. ‘‘এৱাহং চিন্তযিত্ৱান, পহংসেত্ৱান মানসং;

ৰাজানং উপগন্ত্ৱান, ইদং ৱচনমব্ৰৱিং.

৬১. ‘‘‘ইত্থী নাম মযং দেৱ, পুৰিসানিত্তৰা অহু [পুৰিসানুগতা সদা (সী.), পুৰিসা ন ভৱাম নো (স্যা.), পুৰিসানং ভৰা মযং (পী.)];

একং মে সমণং দেহি, ভোজযিস্সামি খত্তিয’.

৬২. ‘‘অদাসি মে তদা ৰাজা, সমণং ভাৱিতিন্দ্ৰিযং;

তস্স পত্তং গহেত্ৱান, পৰমন্নেন পূৰযিং.

৬৩. ‘‘পূৰেত্ৱা পৰমং অন্নং, সহ সুগন্ধলেপনং;

মহাচেলেন ছাদিত্ৱা, অদাসিং তুট্ঠমানসা.

৬৪. ‘‘তেন কম্মেন সুকতেন, চেতনাপণিধীহি চ;

জহিত্ৱা মানুসং দেহং, তাৱতিংসমগচ্ছহং.

৬৫. ‘‘সহস্সদেৱৰাজূনং, মহেসিত্তমকাৰযিং;

সহস্সচক্কৱত্তীনং, মহেসিত্তমকাৰযিং.

৬৬. ‘‘পদেসৰজ্জং ৱিপুলং, গণনাতো অসঙ্খিযং;

নানাৱিধং বহুং অঞ্ঞং, তস্স কম্মফলং ততো.

৬৭. ‘‘উপ্পলস্সেৱ মে ৱণ্ণো, অভিৰূপা সুদস্সনা;

ইত্থিসব্বঙ্গসম্পন্না, অভিজাতা জুতিন্ধৰা.

৬৮. ‘‘পচ্ছিমে ভৱে সম্পত্তে, অজাযিং সাকিযে কুলে;

নাৰীসহস্সপামোক্খা, সুদ্ধোদনসুতস্সহং.

৬৯. ‘‘নিব্বিন্দিত্ৱা অগাৰেহং, পব্বজিং অনগাৰিযং;

সত্তমীৰত্তিসম্পত্তা [সত্তমিংৰত্তিমপত্তা (সী. স্যা. পী.)], চতুসচ্চমপাপুণিং.

৭০. ‘‘চীৱৰং পিণ্ডপাতঞ্চ, পচ্চযং সযনাসনং;

পৰিমেতুং ন সক্কোমি, পিণ্ডপাতস্সিদং ফলং.

৭১. ‘‘যং ময্হং পূৰিতং কম্মং, কুসলং সৰসে মুনি;

তুয্হত্থায মহাৱীৰ, পৰিচত্তং বহুং মযা.

৭২. ‘‘একত্তিংসে ইতো কপ্পে, যং দানমদদিং তদা;

দুগ্গতিং নাভিজানামি, পিণ্ডপাতস্সিদং ফলং.

৭৩. ‘‘দ্ৱে গতিযো পজানামি, দেৱত্তং অথ মানুসং;