৮. পুণ্ণিকাথেৰীঅপদানং

১৮৪. ‘‘ৱিপস্সিনো ভগৱতো, সিখিনো ৱেস্সভুস্স চ;

ককুসন্ধস্স মুনিনো, কোণাগমনতাদিনো.

১৮৫. ‘‘কস্সপস্স চ বুদ্ধস্স, পব্বজিত্ৱান সাসনে;

ভিক্খুনী সীলসম্পন্না, নিপকা সংৱুতিন্দ্ৰিযা.

১৮৬. ‘‘বহুস্সুতা ধম্মধৰা, ধম্মত্থপটিপুচ্ছিকা;

উগ্গহেতা চ ধম্মানং, সোতা পযিৰুপাসিতা.

১৮৭. ‘‘দেসেন্তী জনমজ্ঝেহং, অহোসিং জিনসাসনে;

বাহুসচ্চেন তেনাহং, পেসলা অতিমঞ্ঞিসং.

১৮৮. ‘‘পচ্ছিমে চ ভৱে দানি, সাৱত্থিযং পুৰুত্তমে;

অনাথপিণ্ডিনো গেহে, জাতাহং কুম্ভদাসিযা.

১৮৯. ‘‘গতা উদকহাৰিযং, সোত্থিযং দিজমদ্দসং;

সীতট্টং তোযমজ্ঝম্হি, তং দিস্ৱা ইদমব্ৰৱিং.

১৯০. ‘‘‘উদহাৰী অহং সীতে, সদা উদকমোতৰিং;

অয্যানং দণ্ডভযভীতা, ৱাচাদোসভযট্টিতা [ৱাচাৰোসভযট্টিতা (স্যা.)].

১৯১. ‘‘‘কস্স ব্ৰাহ্মণ ত্ৱং ভীতো, সদা উদকমোতৰি;

ৱেধমানেহি গত্তেহি, সীতং ৱেদযসে ভুসং’.

১৯২. ‘‘‘জানন্তী ৱত মং ভোতি, পুণ্ণিকে পৰিপুচ্ছসি;

কৰোন্তং কুসলং কম্মং, ৰুন্ধন্তং [নিদ্ধন্তং (সী. পী.), নুদন্তং (স্যা.)] কতপাপকং.

১৯৩. ‘‘‘যো চে ৱুড্ঢো দহৰো ৱা, পাপকম্মং পকুব্বতি;

দকাভিসিঞ্চনা সোপি [ভোতি (সী. ক.) থেৰীগা. ২৩৯], পাপকম্মা পমুচ্চতি’.

১৯৪. ‘‘উত্তৰন্তস্স অক্খাসিং, ধম্মত্থসংহিতং পদং;

তঞ্চ সুত্ৱা স সংৱিগ্গো [সুসংৱিগ্গো (স্যা.)], পব্বজিত্ৱাৰহা অহু.

১৯৫. ‘‘পূৰেন্তী ঊনকসতং, জাতা দাসিকুলে যতো;

ততো পুণ্ণাতি নামং মে, ভুজিস্সং মং অকংসু তে.

১৯৬. ‘‘সেট্ঠিং ততোনুজানেত্ৱা [ততো অনুমোদেত্ৱা (সী. স্যা.), ততো অনুমানেত্ৱা (পী.)], পব্বজিং অনগাৰিযং;

ন চিৰেনেৱ কালেন, অৰহত্তমপাপুণিং.

১৯৭. ‘‘ইদ্ধীসু চ ৱসী হোমি, দিব্বায সোতধাতুযা;

চেতোপৰিযঞাণস্স, ৱসী হোমি মহামুনে.

১৯৮. ‘‘পুব্বেনিৱাসং জানামি, দিব্বচক্খু ৱিসোধিতং;

সব্বাসৱপৰিক্খীণা, নত্থি দানি পুনব্ভৱো.

১৯৯. ‘‘অত্থধম্মনিৰুত্তীসু, পটিভানে তথেৱ চ;

ঞাণং মে ৱিমলং সুদ্ধং, বুদ্ধসেট্ঠস্স ৱাহসা.

২০০. ‘‘ভাৱনায মহাপঞ্ঞা, সুতেনেৱ সুতাৱিনী;

মানেন নীচকুলজা, ন হি কম্মং ৱিনস্সতি [পনস্সতি (স্যা.)].

২০১. ‘‘কিলেসা ঝাপিতা ময্হং…পে… ৱিহৰামি অনাসৱা.

২০২. ‘‘স্ৱাগতং ৱত মে আসি…পে… কতং বুদ্ধস্স সাসনং.

২০৩. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং পুণ্ণিকা ভিক্খুনী ইমা গাথাযো অভাসিত্থাতি.

পুণ্ণিকাথেৰিযাপদানং অট্ঠমং.