৫. সুক্কাথেৰীঅপদানং

১১১. ‘‘একনৱুতিতো কপ্পে, ৱিপস্সী নাম নাযকো;

উপ্পজ্জি চাৰুদস্সনো, সব্বধম্মৱিপস্সকো.

১১২. ‘‘তদাহং বন্ধুমতিযং, জাতা অঞ্ঞতৰে কুলে;

ধম্মং সুত্ৱান মুনিনো, পব্বজিং অনগাৰিযং.

১১৩. ‘‘বহুস্সুতা ধম্মধৰা, পটিভানৱতী তথা;

ৱিচিত্তকথিকা চাপি, জিনসাসনকাৰিকা.

১১৪. ‘‘তদা ধম্মকথং কত্ৱা, হিতায জনতং বহুং [জনতায হিতং বহুং (সী.) … সদা (স্যা.), হিতায জনসংসৰিং (পী.)];

ততো চুতাহং তুসিতং, উপপন্না যসস্সিনী.

১১৫. ‘‘একতিংসে ইতো কপ্পে, সিখী ৱিয সিখী জিনো;

তপন্তো যসসা লোকে [লোকং (স্যা. পী.)], উপ্পজ্জি ৱদতং ৱৰো.

১১৬. ‘‘তদাপি পব্বজিত্ৱান, বুদ্ধসাসনকোৱিদা;

জোতেত্ৱা জিনৱাক্যানি, ততোপি তিদিৱং গতা.

১১৭. ‘‘একতিংসেৱ কপ্পম্হি, ৱেস্সভূ নাম নাযকো;

উপ্পজ্জিত্থ মহাঞাণী, তদাপি চ তথেৱহং.

১১৮. ‘‘পব্বজিত্ৱা ধম্মধৰা, জোতযিং জিনসাসনং;

গন্ত্ৱা মৰুপুৰং ৰম্মং, অনুভোসিং মহাসুখং.

১১৯. ‘‘ইমম্হি ভদ্দকে কপ্পে, ককুসন্ধো জিনুত্তমো;

উপ্পজ্জি নৰসৰণো [নৰসদ্দূলো (সী. স্যা. পী.)], তদাপি চ তথেৱহং.

১২০. ‘‘পব্বজিত্ৱা মুনিমতং, জোতযিত্ৱা যথাযুকং;

ততো চুতাহং তিদিৱং, অগং সভৱনং যথা.

১২১. ‘‘ইমস্মিংযেৱ কপ্পম্হি, কোণাগমননাযকো;

উপ্পজ্জি লোকসৰণো, অৰণো অমতঙ্গতো [ৱদতং ৱৰো, সব্বসত্তানমুত্তমো (স্যা.)].

১২২. ‘‘তদাপি পব্বজিত্ৱান, সাসনে তস্স তাদিনো;

বহুস্সুতা ধম্মধৰা, জোতযিং জিনসাসনং.

১২৩. ‘‘ইমস্মিংযেৱ কপ্পম্হি, কস্সপো মুনিমুত্তমো;

উপ্পজ্জি লোকসৰণো, অৰণো মৰণন্তগূ.

১২৪. ‘‘তস্সাপি নৰৱীৰস্স, পব্বজিত্ৱান সাসনে;

পৰিযাপুটসদ্ধম্মা, পৰিপুচ্ছাৱিসাৰদা.

১২৫. ‘‘সুসীলা লজ্জিনী চেৱ, তীসু সিক্খাসু কোৱিদা;

বহুং ধম্মকথং কত্ৱা, যাৱজীৱং মহামুনে.

১২৬. ‘‘তেন কম্মৱিপাকেন, চেতনাপণিধীহি চ;

জহিত্ৱা মানুসং দেহং, তাৱতিংসমগচ্ছহং.

১২৭. ‘‘পচ্ছিমে চ ভৱে দানি, গিৰিব্বজপুৰুত্তমে;

জাতা সেট্ঠিকুলে ফীতে, মহাৰতনসঞ্চযে.

১২৮. ‘‘যদা ভিক্খুসহস্সেন, পৰিৱুতো লোকনাযকো;

উপাগমি ৰাজগহং, সহস্সক্খেন ৱণ্ণিতো.

১২৯. ‘‘‘দন্তো দন্তেহি সহ পুৰাণজটিলেহি, ৱিপ্পমুত্তো ৱিপ্পমুত্তেহি;

সিঙ্গীনিক্খসৱণ্ণো, ৰাজগহং পাৱিসি ভগৱা’.

১৩০. ‘‘দিস্ৱা বুদ্ধানুভাৱং তং, সুত্ৱাৱ গুণসঞ্চযং;

বুদ্ধে চিত্তং পসাদেত্ৱা, পূজযিং তং যথাবলং.

১৩১. ‘‘অপৰেন চ কালেন, ধম্মদিন্নায সন্তিকে;

অগাৰা নিক্খমিত্ৱান, পব্বজিং অনগাৰিযং.

১৩২. ‘‘কেসেসু ছিজ্জমানেসু, কিলেসে ঝাপযিং অহং;

উগ্গহিং সাসনং সব্বং, পব্বজিত্ৱাচিৰেনহং.

১৩৩. ‘‘ততো ধম্মমদেসেসিং, মহাজনসমাগমে;

ধম্মে দেসিযমানম্হি, ধম্মাভিসমযো অহু.

১৩৪. ‘‘নেকপাণসহস্সানং, তং ৱিদিত্ৱাতিৱিম্হিতো;

অভিপ্পসন্নো মে যক্খো, ভমিত্ৱান গিৰিব্বজং.

১৩৫. ‘‘কিং মে কতা ৰাজগহে মনুস্সা, মধুং পীতাৱ অচ্ছৰে;

যে সুক্কং ন উপাসন্তি, দেসেন্তিং অমতং পদং.

১৩৬. ‘‘তঞ্চ অপ্পটিৱানীযং, অসেচনকমোজৱং;

পিৱন্তি মঞ্ঞে সপ্পঞ্ঞা, ৱলাহকমিৱদ্ধগূ.

১৩৭. ‘‘ইদ্ধীসু চ ৱসী হোমি, দিব্বায সোতধাতুযা;

চেতোপৰিযঞাণস্স, ৱসী হোমি মহামুনে.

১৩৮. ‘‘পুব্বেনিৱাসং জানামি, দিব্বচক্খু ৱিসোধিতং;

সব্বাসৱপৰিক্খীণা, নত্থি দানি পুনব্ভৱো.

১৩৯. ‘‘অত্থধম্মনিৰুত্তীসু, পটিভানে তথেৱ চ;

ঞাণং মম মহাৱীৰ, উপ্পন্নং তৱ সন্তিকে.

১৪০. ‘‘কিলেসা ঝাপিতা ময্হং…পে… ৱিহৰামি অনাসৱা.

১৪১. ‘‘স্ৱাগতং ৱত মে আসি…পে… কতং বুদ্ধস্স সাসনং.

১৪২. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং সুক্কা ভিক্খুনী ইমা গাথাযো অভাসিত্থাতি.

সুক্কাথেৰিযাপদানং পঞ্চমং.

পঞ্চমং ভাণৱাৰং.