৬. অভিৰূপনন্দাথেৰীঅপদানং

১৪৩. ‘‘একনৱুতিতো কপ্পে, ৱিপস্সী নাম নাযকো;

উপ্পজ্জি চাৰুদস্সনো, সব্বধম্মেসু চক্খুমা.

১৪৪. ‘‘তদাহং বন্ধুমতিযং, ইদ্ধে ফীতে মহাকুলে;

জাতা সুৰূপা দযিতা, পূজনীযা জনস্স চ.

১৪৫. ‘‘উপগন্ত্ৱা মহাৱীৰং, ৱিপস্সিং লোকনাযকং;

ধম্মং সুণিত্ৱা সৰণং, উপেসিং নৰনাযকং.

১৪৬. ‘‘সীলেসু সংৱুতা হুত্ৱা, নিব্বুতে চ নৰুত্তমে;

ধাতুথূপস্স উপৰি, সোণ্ণচ্ছত্তমপূজযিং.

১৪৭. ‘‘মুত্তচাগা সীলৱতী, যাৱজীৱং ততো চুতা;

জহিত্ৱা মানুসং দেহং, তাৱতিংসূপগা অহং.

১৪৮. ‘‘তদা দসহি ঠানেহি, অধিভোত্ৱান সেসকে [অধিভোত্ৱা অসেসতো (স্যা.)];

ৰূপসদ্দেহি গন্ধেহি, ৰসেহি ফুসনেহি চ.

১৪৯. ‘‘আযুনাপি চ ৱণ্ণেন, সুখেন যসসাপি চ;

তথেৱাধিপতেয্যেন, অধিগয্হ ৱিৰোচহং.

১৫০. ‘‘পচ্ছিমে চ ভৱে দানি, জাতাহং কপিলৱ্হযে;

ধীতা খেমকসক্কস্স, নন্দা নামাতি ৱিস্সুতা.

১৫১. ‘‘অভিৰূপসম্পদম্পি [অভিৰুপং উপপদং (সী.), অভিৰুপং উপ্পাদং (পী.)], অহু মে কন্তিসূচকং;

যদাহং যোব্বনপ্পত্তা, ৰূপলাৱঞ্ঞভূসিতা.

১৫২. ‘‘তদা [তদা মমত্থং (সী.), ইধ মমত্তে (স্যা. ক.)] মত্থে সক্যানং, ৱিৱাদো সুমহা অহু;

পব্বাজেসি ততো তাতো, মা সক্যা ৱিনস্সিংসুতি.

১৫৩. ‘‘পব্বজিত্ৱা তথাগতং, ৰূপদেস্সিং নৰুত্তমং;

সুত্ৱান নোপগচ্ছামি, মম ৰূপেন গব্বিতা.

১৫৪. ‘‘ওৱাদম্পি ন গচ্ছামি, বুদ্ধদস্সনভীৰুতা;

তদা জিনো উপাযেন, উপনেত্ৱা সসন্তিকং.

১৫৫. ‘‘তিস্সিত্থিযো [তিস্সো থীযো (সী. পী.)] নিদস্সেসি, ইদ্ধিযা মগ্গকোৱিদো;

অচ্ছৰাৰূপসদিসং, তৰুণিং জৰিতং [জৰিকং (স্যা. ক.)] মতং.

১৫৬. ‘‘তাযো দিস্ৱা সুসংৱিগ্গা, ৱিৰত্তাসে কড়েৱৰে;

অট্ঠাসিং ভৱনিব্বিন্দা, তদা মং আহ নাযকো.

১৫৭. ‘‘‘আতুৰং অসুচিং পূতিং, পস্স নন্দে সমুস্সযং;

উগ্ঘৰন্তং পগ্ঘৰন্তং, বালানং অভিনন্দিতং.

১৫৮. ‘‘‘অসুভায চিত্তং ভাৱেহি, একগ্গং সুসমাহিতং;

যথা ইদং তথা এতং, যথা এতং তথা ইদং.

১৫৯. ‘‘‘এৱমেতং অৱেক্খন্তী, ৰত্তিন্দিৱমতন্দিতা;

ততো সকায পঞ্ঞায, অভিনিব্বিজ্ঝ ৱচ্ছসি’.

১৬০. ‘‘তস্সা মে অপ্পমত্তায, ৱিচৰন্তিযা [ৱিচৰন্ত্ৱাধ (সী.), ৱিচিনন্তীধ (স্যা. পী.)] যোনিসো;

যথাভূতং অযং কাযো, দিট্ঠো সন্তৰবাহিৰো.

১৬১. ‘‘অথ নিব্বিন্দহং কাযে, অজ্ঝত্তঞ্চ ৱিৰজ্জহং;

অপ্পমত্তা ৱিসংযুত্তা, উপসন্তাম্হি নিব্বুতা.

১৬২. ‘‘ইদ্ধীসু চ ৱসী হোমি, দিব্বায সোতধাতুযা;

চেতোপৰিযঞাণস্স, ৱসী হোমি মহামুনে.

১৬৩. ‘‘পুব্বেনিৱাসং জানামি, দিব্বচক্খু ৱিসোধিতং;

সব্বাসৱপৰিক্খীণা, নত্থি দানি পুনব্ভৱো.

১৬৪. ‘‘অত্থধম্মনিৰুত্তীসু, পটিভানে তথেৱ চ;

ঞাণং মম মহাৱীৰ, উপ্পন্নং তৱ সন্তিকে.

১৬৫. ‘‘কিলেসা ঝাপিতা ময্হং…পে… ৱিহৰামি অনাসৱা.

১৬৬. ‘‘স্ৱাগতং ৱত মে আসি…পে… কতং বুদ্ধস্স সাসনং.

১৬৭. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং অভিৰূপনন্দা ভিক্খুনী ইমা গাথাযো অভাসিত্থাতি.

অভিৰূপনন্দাথেৰিযাপদানং ছট্ঠং.