৪. সিঙ্গালমাতুথেৰীঅপদানং

৮২. ‘‘পদুমুত্তৰো নাম জিনো, সব্বধম্মান পাৰগূ;

ইতো সতসহস্সম্হি, কপ্পে উপ্পজ্জি নাযকো.

৮৩. ‘‘তদাহং হংসৱতিযং, জাতামচ্চকুলে অহুং;

নানাৰতনপজ্জোতে, ইদ্ধে ফীতে মহদ্ধনে.

৮৪. ‘‘পিতুনা সহ গন্ত্ৱান, মহাজনপুৰক্খতা;

ধম্মং বুদ্ধস্স সুত্ৱান, পব্বজিং অনগাৰিযং.

৮৫. ‘‘পব্বজিত্ৱান কাযেন, পাপকম্মং ৱিৱজ্জযিং;

ৱচীদুচ্চৰিতং হিত্ৱা, আজীৱং পৰিসোধযিং.

৮৬. ‘‘বুদ্ধে পসন্না ধম্মে চ, সঙ্ঘে চ তিব্বগাৰৱা;

সদ্ধম্মস্সৱনে যুত্তা, বুদ্ধদস্সনলালসা [বুদ্ধদস্সনসালযা (স্যা.)].

৮৭. ‘‘অগ্গং সদ্ধাধিমুত্তানং, অস্সোসিং ভিক্খুনিং তদা;

তং ঠানং পত্থযিত্ৱান, তিস্সো সিক্খা অপূৰযিং.

৮৮. ‘‘ততো মং সুগতো আহ, কৰুণানুগতাসযো;

‘যস্স সদ্ধা তথাগতে, অচলা সুপ্পতিট্ঠিতা;

সীলঞ্চ যস্স কল্যাণং, অৰিযকন্তং পসংসিতং.

৮৯. ‘‘‘সঙ্ঘে পসাদো যস্সত্থি, উজুভূতঞ্চ দস্সনং;

অদলিদ্দোতি তং আহু, অমোঘং তস্স জীৱিতং.

৯০. ‘‘‘তস্মা সদ্ধঞ্চ সীলঞ্চ, পসাদং ধম্মদস্সনং;

অনুযুঞ্জেথ মেধাৱী, সৰং বুদ্ধান [বুদ্ধানুসাসনং (সী.), বুদ্ধানং সাসনং (স্যা.)] সাসনং’.

৯১. ‘‘তং সুত্ৱাহং পমুদিতা, অপুচ্ছিং পণিধিং মম;

তদা অনোমো অমিতো, ব্যাকৰিত্থ ৱিনাযকো;

‘বুদ্ধে পসন্না কল্যাণী, লচ্ছসে তং সুপত্থিতং.

৯২. ‘‘‘সতসহস্সিতো কপ্পে, ওক্কাককুলসম্ভৱো;

গোতমো নাম গোত্তেন, সত্থা লোকে ভৱিস্সতি.

৯৩. ‘‘‘তস্স ধম্মেসু দাযাদা, ওৰসা ধম্মনিম্মিতা;

সিঙ্গালকস্স [সিগালকস্স (সী. পী.)] মাতাতি, হেস্সতি সত্থু সাৱিকা’.

৯৪. ‘‘তং সুত্ৱা মুদিতা হুত্ৱা, যাৱজীৱং তদা জিনং;

মেত্তচিত্তা পৰিচৰিং, পটিপত্তীহি নাযকং.

৯৫. ‘‘তেন কম্মেন সুকতেন, চেতনাপণিধীহি চ;

জহিত্ৱা মানুসং দেহং, তাৱতিংসমগচ্ছহং.

৯৬. ‘‘পচ্ছিমে চ ভৱে দানি, গিৰিব্বজপুৰুত্তমে;

জাতা সেট্ঠিকুলে ফীতে, মহাৰতনসঞ্চযে.

৯৭. ‘‘পুত্তো সিঙ্গালকো নাম, মমাসি ৱিপথে ৰতো;

দিট্ঠিগহনপক্খন্দো, দিসাপূজনতপ্পৰো.

৯৮. ‘‘নানাদিসা নমস্সন্তং [নমস্সতি (স্যা.)], পিণ্ডায নগৰং ৱজং;

তং দিস্ৱা ওৱদী বুদ্ধো, মগ্গে ঠত্ৱা ৱিনাযকো.

৯৯. ‘‘তস্স দেসযতো ধম্মং, পনাদো ৱিম্হযো অহু;

দ্ৱেকোটিনৰনাৰীনং, ধম্মাভিসমযো অহু.

১০০. ‘‘তদাহং পৰিসং গন্ত্ৱা, সুত্ৱা সুগতভাসিতং;

সোতাপত্তিফলং পত্তা, পব্বজিং অনগাৰিযং.

১০১. ‘‘ন চিৰেনেৱ কালেন, বুদ্ধদস্সনলালসা;

অনুস্সতিং তং ভাৱেত্ৱা, অৰহত্তমপাপুণিং.

১০২. ‘‘দস্সনত্থায বুদ্ধস্স, সব্বদা চ ৱজামহং;

অতিত্তাযেৱ পস্সামি, ৰূপং নযননন্দনং.

১০৩. ‘‘সব্বপাৰমিসম্ভূতং, লক্খীনিলযনং ৱৰং;

ৰূপং সব্বসুভাকিণ্ণং, অতিত্তা ৱিহৰামহং.

১০৪. ‘‘জিনো তস্মিং গুণে তুট্ঠো, এতদগ্গে ঠপেসি মং;

সিঙ্গালকস্স যা মাতা, অগ্গা সদ্ধাধিমুত্তিকা [সংঘৱিমুত্তিকা (পী.), মমাধিমুত্তিকা (ক.)].

১০৫. ‘‘ইদ্ধীসু চ ৱসী হোমি, দিব্বায সোতধাতুযা;

চেতোপৰিযঞাণস্স, ৱসী হোমি মহামুনি.

১০৬. ‘‘পুব্বেনিৱাসং জানামি, দিব্বচক্খু ৱিসোধিতং;

সব্বাসৱপৰিক্খীণা, নত্থি দানি পুনব্ভৱো.

১০৭. ‘‘অত্থধম্মনিৰুত্তীসু, পটিভানে তথেৱ চ;

ঞাণং মম মহাৱীৰ, উপ্পন্নং তৱ সন্তিকে.

১০৮. ‘‘কিলেসা ঝাপিতা ময্হং…পে… ৱিহৰামি অনাসৱা.

১০৯. ‘‘স্ৱাগতং ৱত মে আসি…পে… কতং বুদ্ধস্স সাসনং.

১১০. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং সিঙ্গালমাতা ভিক্খুনী ইমা গাথাযো অভাসিত্থাতি.

সিঙ্গালমাতুথেৰিযাপদানং চতুত্থং.