৩. উপ্পলদাযিকাথেৰীঅপদানং

৫৭. ‘‘নগৰে অৰুণৱতিযা, অৰুণো নাম খত্তিযো;

তস্স ৰঞ্ঞো অহুং ভৰিযা, একজ্ঝং চাৰযামহং.

৫৮. ‘‘ৰহোগতা নিসীদিত্ৱা, এৱং চিন্তেসহং তদা;

‘কুসলং মে কতং নত্থি, আদায গমিযং মম.

৫৯. ‘‘‘মহাভিতাপং কটুকং, ঘোৰৰূপং সুদাৰুণং;

নিৰযং নূন গচ্ছামি, এত্থ মে নত্থি সংসযো’.

৬০. ‘‘এৱাহং চিন্তযিত্ৱান, পহংসেত্ৱান মানসং;

ৰাজানং উপগন্ত্ৱান, ইদং ৱচনমব্ৰৱিং.

৬১. ‘‘‘ইত্থী নাম মযং দেৱ, পুৰিসানিত্তৰা অহু [পুৰিসানুগতা সদা (সী.), পুৰিসা ন ভৱাম নো (স্যা.), পুৰিসানং ভৰা মযং (পী.)];

একং মে সমণং দেহি, ভোজযিস্সামি খত্তিয’.

৬২. ‘‘অদাসি মে তদা ৰাজা, সমণং ভাৱিতিন্দ্ৰিযং;

তস্স পত্তং গহেত্ৱান, পৰমন্নেন পূৰযিং.

৬৩. ‘‘পূৰেত্ৱা পৰমং অন্নং, সহ সুগন্ধলেপনং;

মহাচেলেন ছাদিত্ৱা, অদাসিং তুট্ঠমানসা.

৬৪. ‘‘তেন কম্মেন সুকতেন, চেতনাপণিধীহি চ;

জহিত্ৱা মানুসং দেহং, তাৱতিংসমগচ্ছহং.

৬৫. ‘‘সহস্সদেৱৰাজূনং, মহেসিত্তমকাৰযিং;

সহস্সচক্কৱত্তীনং, মহেসিত্তমকাৰযিং.

৬৬. ‘‘পদেসৰজ্জং ৱিপুলং, গণনাতো অসঙ্খিযং;

নানাৱিধং বহুং অঞ্ঞং, তস্স কম্মফলং ততো.

৬৭. ‘‘উপ্পলস্সেৱ মে ৱণ্ণো, অভিৰূপা সুদস্সনা;

ইত্থিসব্বঙ্গসম্পন্না, অভিজাতা জুতিন্ধৰা.

৬৮. ‘‘পচ্ছিমে ভৱে সম্পত্তে, অজাযিং সাকিযে কুলে;

নাৰীসহস্সপামোক্খা, সুদ্ধোদনসুতস্সহং.

৬৯. ‘‘নিব্বিন্দিত্ৱা অগাৰেহং, পব্বজিং অনগাৰিযং;

সত্তমীৰত্তিসম্পত্তা [সত্তমিংৰত্তিমপত্তা (সী. স্যা. পী.)], চতুসচ্চমপাপুণিং.

৭০. ‘‘চীৱৰং পিণ্ডপাতঞ্চ, পচ্চযং সযনাসনং;

পৰিমেতুং ন সক্কোমি, পিণ্ডপাতস্সিদং ফলং.

৭১. ‘‘যং ময্হং পূৰিতং কম্মং, কুসলং সৰসে মুনি;

তুয্হত্থায মহাৱীৰ, পৰিচত্তং বহুং মযা.

৭২. ‘‘একত্তিংসে ইতো কপ্পে, যং দানমদদিং তদা;

দুগ্গতিং নাভিজানামি, পিণ্ডপাতস্সিদং ফলং.

৭৩. ‘‘দ্ৱে গতিযো পজানামি, দেৱত্তং অথ মানুসং;

অঞ্ঞং গতিং ন জানামি, পিণ্ডপাতস্সিদং ফলং.

৭৪. ‘‘উচ্চে কুলে পজাযামি, মহাসালে [তযো সাল (ক.)] মহদ্ধনে;

অঞ্ঞে কুলে ন জাযামি, পিণ্ডপাতস্সিদং ফলং.

৭৫. ‘‘ভৱাভৱে সংসৰিত্ৱা, সুক্কমূলেন চোদিতা;

অমনাপং ন পস্সামি, সোমনস্সকতং ফলং.

৭৬. ‘‘ইদ্ধীসু চ ৱসী হোমি, দিব্বায সোতধাতুযা;

চেতোপৰিযঞাণস্স, ৱসী হোমি মহামুনে.

৭৭. ‘‘পুব্বেনিৱাসং জানামি, দিব্বচক্খু ৱিসোধিতং;

সব্বাসৱপৰিক্খীণা, নত্থি দানি পুনব্ভৱো.

৭৮. ‘‘অত্থধম্মনিৰুত্তীসু, পটিভানে তথেৱ চ;

ঞাণং মম মহাৱীৰ, উপ্পন্নং তৱ সন্তিকে.

৭৯. ‘‘কিলেসা ঝাপিতা ময্হং…পে… ৱিহৰামি অনাসৱা.

৮০. ‘‘স্ৱাগতং ৱত মে আসি…পে… কতং বুদ্ধস্স সাসনং.

৮১. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং উপ্পলদাযিকা ভিক্খুনী ভগৱতো সম্মুখা ইমা গাথাযো অভাসিত্থাতি.

উপ্পলদাযিকাথেৰিযাপদানং ততিযং.