৭. ভদ্দকাপিলানীথেৰীঅপদানং

২৪৪. ‘‘পদুমুত্তৰো নাম জিনো, সব্বধম্মান পাৰগূ [সব্বধম্মেসু চক্খুমা (সী. পী.)];

ইতো সতসহস্সম্হি, কপ্পে উপ্পজ্জি নাযকো.

২৪৫. ‘‘তদাহু হংসৱতিযং, ৱিদেহো নাম নামতো [নামকো (স্যা. পী.)];

সেট্ঠী পহূতৰতনো, তস্স জাযা অহোসহং.

২৪৬. ‘‘কদাচি সো নৰাদিচ্চং, উপেচ্চ সপৰিজ্জনো;

ধম্মমস্সোসি বুদ্ধস্স, সব্বদুক্খভযপ্পহং [দুক্খক্খযাৱহং (স্যা.)].

২৪৭. ‘‘সাৱকং ধুতৱাদানং, অগ্গং কিত্তেসি নাযকো;

সুত্ৱা সত্তাহিকং দানং, দত্ৱা বুদ্ধস্স তাদিনো.

২৪৮. ‘‘নিপচ্চ সিৰসা পাদে, তং ঠানমভিপত্থযিং;

স হাসযন্তো পৰিসং, তদা হি নৰপুঙ্গৱো.

২৪৯. ‘‘সেট্ঠিনো অনুকম্পায, ইমা গাথা অভাসথ;

‘লচ্ছসে পত্থিতং ঠানং, নিব্বুতো হোহি পুত্তক.

২৫০. ‘‘‘সতসহস্সিতো কপ্পে, ওক্কাককুলসম্ভৱো;

গোতমো নাম গোত্তেন, সত্থা লোকে ভৱিস্সতি.

২৫১. ‘‘‘তস্স ধম্মেসু দাযাদো, ওৰসো ধম্মনিম্মিতো;

কস্সপো নাম গোত্তেন, হেস্সতি সত্থু সাৱকো’.

২৫২. ‘‘তং সুত্ৱা মুদিতো হুত্ৱা, যাৱজীৱং তদা জিনং;

মেত্তচিত্তো পৰিচৰি, পচ্চযেহি ৱিনাযকং.

২৫৩. ‘‘সাসনং জোতযিত্ৱান, সো মদ্দিত্ৱা কুতিত্থিযে;

ৱেনেয্যং ৱিনযিত্ৱা চ, নিব্বুতো সো সসাৱকো.

২৫৪. ‘‘নিব্বুতে তম্হি লোকগ্গে, পূজনত্থায সত্থুনো;

ঞাতিমিত্তে সমানেত্ৱা, সহ তেহি অকাৰযি.

২৫৫. ‘‘সত্তযোজনিকং থূপং, উব্বিদ্ধং ৰতনামযং;

জলন্তং সতৰংসিংৱ, সালৰাজংৱ ফুল্লিতং.

২৫৬. ‘‘সত্তসতসহস্সানি, পাতিযো [চাতিযো (স্যা.)] তত্থ কাৰযি;

নড়গ্গী ৱিয জোতন্তী [জোতন্তে (স্যা. পী.)], ৰতনেহেৱ সত্তহি.

২৫৭. ‘‘গন্ধতেলেন পূৰেত্ৱা, দীপানুজ্জলযী তহিং;

পূজনত্থায [পূজত্থায (সী. ক.)] মহেসিস্স, সব্বভূতানুকম্পিনো.

২৫৮. ‘‘সত্তসতসহস্সানি, পুণ্ণকুম্ভানি কাৰযি;

ৰতনেহেৱ পুণ্ণানি, পূজনত্থায মহেসিনো.

২৫৯. ‘‘মজ্ঝে অট্ঠট্ঠকুম্ভীনং, উস্সিতা কঞ্চনগ্ঘিযো;

অতিৰোচন্তি ৱণ্ণেন, সৰদেৱ দিৱাকৰো.

২৬০. ‘‘চতুদ্ৱাৰেসু সোভন্তি, তোৰণা ৰতনামযা;

উস্সিতা ফলকা ৰম্মা, সোভন্তি ৰতনামযা.

২৬১. ‘‘ৱিৰোচন্তি পৰিক্খিত্তা [পৰিক্খাযো (স্যা.)], অৱটংসা সুনিম্মিতা;

উস্সিতানি পটাকানি, ৰতনানি ৱিৰোচৰে.

২৬২. ‘‘সুৰত্তং সুকতং চিত্তং, চেতিযং ৰতনামযং;

অতিৰোচতি ৱণ্ণেন, সসঞ্ঝোৱ [সসজ্ঝাৱ (স্যা. ক.), সসঞ্জাৱ (পী.)] দিৱাকৰো.

২৬৩. ‘‘থূপস্স ৱেদিযো তিস্সো, হৰিতালেন পূৰযি;

একং মনোসিলাযেকং, অঞ্জনেন চ একিকং.

২৬৪. ‘‘পূজং এতাদিসং ৰম্মং, কাৰেত্ৱা ৱৰৱাদিনো;

অদাসি দানং সঙ্ঘস্স, যাৱজীৱং যথাবলং.

২৬৫. ‘‘সহাৱ সেট্ঠিনা তেন, তানি পুঞ্ঞানি সব্বসো;

যাৱজীৱং কৰিত্ৱান, সহাৱ সুগতিং গতা.

২৬৬. ‘‘সম্পত্তিযোনুভোত্ৱান, দেৱত্তে অথ মানুসে;

ছাযা ৱিয সৰীৰেন, সহ তেনেৱ সংসৰিং.

২৬৭. ‘‘একনৱুতিতো কপ্পে, ৱিপস্সী নাম নাযকো;

উপ্পজ্জি চাৰুদস্সনো, সব্বধম্মৱিপস্সকো.

২৬৮. ‘‘তদাযং বন্ধুমতিযং, ব্ৰাহ্মণো সাধুসম্মতো;

অড্ঢো সন্তো গুণেনাপি [সত্থাগমেনাসি (সী.)], ধনেন চ সুদুগ্গতো.

২৬৯. ‘‘তদাপি তস্সাহং আসিং, ব্ৰাহ্মণী সমচেতসা;

কদাচি সো দিজৱৰো, সঙ্গমেসি মহামুনিং.

২৭০. ‘‘নিসিন্নং জনকাযম্হি, দেসেন্তং অমতং পদং;

সুত্ৱা ধম্মং পমুদিতো, অদাসি একসাটকং.

২৭১. ‘‘ঘৰমেকেন ৱত্থেন, গন্ত্ৱানেতং স মব্ৰৱি [মমব্ৰৱি (সী. স্যা. পী.)];

‘অনুমোদ মহাপুঞ্ঞং [মহাপঞ্ঞে (সী.), মহাপুঞ্ঞে (স্যা. ক.)], দিন্নং বুদ্ধস্স সাটকং’.

২৭২. ‘‘তদাহং অঞ্জলিং কত্ৱা, অনুমোদিং সুপীণিতা [সুৱিদিতা (স্যা.), সুপীতিযা (ক.)];

‘সুদিন্নো সাটকো সামি, বুদ্ধসেট্ঠস্স তাদিনো’.

২৭৩. ‘‘সুখিতো সজ্জিতো হুত্ৱা, সংসৰন্তো ভৱাভৱে;

বাৰাণসিপুৰে ৰম্মে, ৰাজা আসি মহীপতি.

২৭৪. ‘‘তদা তস্স মহেসীহং, ইত্থিগুম্বস্স উত্তমা;

তস্সাতি দযিতা [তস্সাৱি দুতিযিকা (স্যা.)] আসিং, পুব্বস্নেহেন ভত্তুনো [চুত্তৰি (স্যা. পী. ক.)].

২৭৫. ‘‘পিণ্ডায ৱিচৰন্তে তে [সো (সী. স্যা. পী.)], অট্ঠ পচ্চেকনাযকে;

দিস্ৱা পমুদিতো হুত্ৱা, দত্ৱা পিণ্ডং মহাৰহং.

২৭৬. ‘‘পুনো নিমন্তযিত্ৱান, কত্ৱা ৰতনমণ্ডপং;

কম্মাৰেহি কতং পত্তং [কতং ছত্তং (সী.), কতমট্ঠং (স্যা.)], সোৱণ্ণং ৱত তত্তকং.

২৭৭. ‘‘সমানেত্ৱান তে সব্বে, তেসং দানমদাসি সো;

সোণ্ণাসনে পৱিট্ঠানং, পসন্নো সেহি পাণিভি.

২৭৮. ‘‘তম্পি দানং সহাদাসিং, কাসিৰাজেনহং তদা;

পুনাহং বাৰাণসিযং, জাতা কাসিকগামকে.

২৭৯. ‘‘কুটুম্বিককুলে ফীতে, সুখিতো সো সভাতুকো;

জেট্ঠস্স ভাতুনো জাযা, অহোসিং সুপতিব্বতা.

২৮০. ‘‘পচ্চেকবুদ্ধং দিস্ৱান, কনিযস্স মম ভত্তুনো [ভত্তুকনিযসো (স্যা.)];

ভাগন্নং তস্স দত্ৱান, আগতে তম্হি পাৱদিং.

২৮১. ‘‘নাভিনন্দিত্থ সো দানং, ততো তস্স অদাসহং;

উখা [বুদ্ধা (স্যা.)] আনিয তং অন্নং, পুনো তস্সেৱ সো অদা.

২৮২. ‘‘তদন্নং ছড্ডযিত্ৱান, দুট্ঠা বুদ্ধস্সহং তদা;

পত্তং কললপুণ্ণং তং, অদাসিং তস্স তাদিনো.

২৮৩. ‘‘দানে চ গহণে চেৱ, অপচে পদুসেপি চ;

সমচিত্তমুখং দিস্ৱা, তদাহং সংৱিজিং ভুসং.

২৮৪. ‘‘পুনো পত্তং গহেত্ৱান, সোধযিত্ৱা সুগন্ধিনা;

পসন্নচিত্তা পূৰেত্ৱা, সঘতং সক্কৰং অদং.

২৮৫. ‘‘যত্থ যত্থূপপজ্জামি, সুৰূপা হোমি দানতো;

বুদ্ধস্স অপকাৰেন, দুগ্গন্ধা ৱদনেন চ.

২৮৬. ‘‘পুন কস্সপৱীৰস্স, নিধাযন্তম্হি চেতিযে;

সোৱণ্ণং ইট্ঠকং ৱৰং, অদাসিং মুদিতা অহং.

২৮৭. ‘‘চতুজ্জাতেন গন্ধেন, নিচযিত্ৱা তমিট্ঠকং;

মুত্তা দুগ্গন্ধদোসম্হা, সব্বঙ্গসুসমাগতা.

২৮৮. ‘‘সত্তপাতিসহস্সানি, ৰতনেহেৱ সত্তহি;

কাৰেত্ৱা ঘতপূৰানি, ৱট্টীনি [ৱট্টীযো (সী.)] চ সহস্সসো.

২৮৯. ‘‘পক্খিপিত্ৱা পদীপেত্ৱা, ঠপযিং সত্তপন্তিযো;

পূজনত্থং লোকনাথস্স, ৱিপ্পসন্নেন চেতসা.

২৯০. ‘‘তদাপি তম্হি পুঞ্ঞম্হি, ভাগিনীযি ৱিসেসতো;

পুন কাসীসু সঞ্জাতো, সুমিত্তা ইতি ৱিস্সুতো.

২৯১. ‘‘তস্সাহং ভৰিযা আসিং, সুখিতা সজ্জিতা পিযা;

তদা পচ্চেকমুনিনো, অদাসিং ঘনৱেঠনং.

২৯২. ‘‘তস্সাপি ভাগিনী আসিং, মোদিত্ৱা দানমুত্তমং;

পুনাপি কাসিৰট্ঠম্হি, জাতো কোলিযজাতিযা.

২৯৩. ‘‘তদা কোলিযপুত্তানং, সতেহি সহ পঞ্চহি;

পঞ্চপচ্চেকবুদ্ধানং, সতানি সমুপট্ঠহি.

২৯৪. ‘‘তেমাসং তপ্পযিত্ৱান [ৱাসযিত্ৱান (স্যা. পী.)], অদাসি চ তিচীৱৰে [তিচীৱৰং (স্যা.)];

জাযা তস্স তদা আসিং, পুঞ্ঞকম্মপথানুগা.

২৯৫. ‘‘ততো চুতো অহু ৰাজা, নন্দো নাম মহাযসো;

তস্সাপি মহেসী আসিং, সব্বকামসমিদ্ধিনী.

২৯৬. ‘‘তদা ৰাজা ভৱিত্ৱান, ব্ৰহ্মদত্তো মহীপতি;

পদুমৱতীপুত্তানং, পচ্চেকমুনিনং তদা.

২৯৭. ‘‘সতানি পঞ্চনূনানি, যাৱজীৱং উপট্ঠহিং;

ৰাজুয্যানে নিৱাসেত্ৱা, নিব্বুতানি চ পূজযিং.

২৯৮. ‘‘চেতিযানি চ কাৰেত্ৱা, পব্বজিত্ৱা উভো মযং;

ভাৱেত্ৱা অপ্পমঞ্ঞাযো, ব্ৰহ্মলোকং অগম্হসে.

২৯৯. ‘‘ততো চুতো মহাতিত্থে, সুজাতো পিপ্ফলাযনো;

মাতা সুমনদেৱীতি, কোসিগোত্তো দিজো পিতা.

৩০০. ‘‘অহং মদ্দে জনপদে, সাকলায পুৰুত্তমে;

কপ্পিলস্স দিজস্সাসিং, ধীতা মাতা সুচীমতি.

৩০১. ‘‘ঘনকঞ্চনবিম্বেন, নিম্মিনিত্ৱান মং পিতা;

অদা কস্সপধীৰস্স, কামেহি ৱজ্জিতস্সমং.

৩০২. ‘‘কদাচি সো কাৰুণিকো, গন্ত্ৱা কম্মন্তপেক্খকো;

কাকাদিকেহি খজ্জন্তে, পাণে দিস্ৱান সংৱিজি.

৩০৩. ‘‘ঘৰেৱাহং তিলে জাতে, দিস্ৱানাতপতাপনে;

কিমি কাকেহি খজ্জন্তে, সংৱেগমলভিং তদা.

৩০৪. ‘‘তদা সো পব্বজী ধীৰো, অহং তমনুপব্বজিং;

পঞ্চৱস্সানি নিৱসিং, পৰিব্বাজৱতে [পৰিব্বাজপথে (স্যা. পী.)] অহং.

৩০৫. ‘‘যদা পব্বজিতা আসি, গোতমী জিনপোসিকা;

তদাহং তমুপগন্ত্ৱা, বুদ্ধেন অনুসাসিতা.

৩০৬. ‘‘ন চিৰেনেৱ কালেন, অৰহত্তমপাপুণিং;

অহো কল্যাণমিত্তত্তং, কস্সপস্স সিৰীমতো.

৩০৭. ‘‘সুতো বুদ্ধস্স দাযাদো, কস্সপো সুসমাহিতো;

পুব্বেনিৱাসং যো ৱেদি, সগ্গাপাযঞ্চ পস্সতি.

৩০৮. ‘‘অথো জাতিক্খযং পত্তো, অভিঞ্ঞাৱোসিতো মুনি;

এতাহি তীহি ৱিজ্জাহি, তেৱিজ্জো হোতি ব্ৰাহ্মণো.

৩০৯. ‘‘তথেৱ ভদ্দকাপিলানী [ভদ্দাকাপিলানী (সী. পী.)], তেৱিজ্জা মচ্চুহাযিনী;

ধাৰেতি অন্তিমং দেহং, জিত্ৱা মাৰং সৱাহনং.

৩১০. ‘‘দিস্ৱা আদীনৱং লোকে, উভো পব্বজিতা মযং;

ত্যম্হ খীণাসৱা দন্তা, সীতিভূতাম্হ নিব্বুতা.

৩১১. ‘‘কিলেসা ঝাপিতা ময্হং…পে… ৱিহৰামি অনাসৱা.

৩১২. ‘‘স্ৱাগতং ৱত মে আসি…পে… কতং বুদ্ধস্স সাসনং.

৩১৩. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং ভদ্দকাপিলানী ভিক্খুনী ইমা গাথাযো অভাসিত্থাতি.

ভদ্দকাপিলানীথেৰিযাপদানং সত্তমং.