৮. যসোধৰাথেৰীঅপদানং

৩১৪. একস্মিং সমযে ৰম্মে, ইদ্ধে ৰাজগহে পুৰে;

পব্ভাৰম্হি ৱৰেকম্হি, ৱসন্তে নৰনাযকে.

৩১৫. ৱসন্তিযা তম্হি নগৰে, ৰম্মে ভিক্খুনুপস্সযে;

যসোধৰাভিক্খুনিযা, এৱং আসি ৱিতক্কিতং.

৩১৬. ‘‘সুদ্ধোদনো মহাৰাজা, গোতমী চ পজাপতী;

অভিঞ্ঞাতা মহাথেৰা, থেৰিযো চ মহিদ্ধিকা.

৩১৭. ‘‘সন্তিং গতাৱ আসুং তে, দীপচ্চীৱ নিৰাসৱা;

লোকনাথে ধৰন্তেৱ, অহম্পি চ সিৱং পদং.

৩১৮. ‘‘গমিস্সামীতি চিন্তেত্ৱা, পস্সন্তী আযুমত্তনো;

পস্সিত্ৱা আযুসঙ্খাৰং, তদহেৱ খযং গতং.

৩১৯. ‘‘পত্তচীৱৰমাদায, নিক্খমিত্ৱা সকস্সমা;

পুৰক্খতা ভিক্খুনীভি, সতেহি সহস্সেহি সা [সহ পঞ্চহি (সী. পী.)].

৩২০. ‘‘মহিদ্ধিকা মহাপঞ্ঞা, সম্বুদ্ধং উপসঙ্কমি;

সম্বুদ্ধং অভিৱাদেত্ৱা, সত্থুনো চক্কলক্খণে;

নিসিন্না একমন্তম্হি, ইদং ৱচনমব্ৰৱি.

৩২১. ‘‘‘অট্ঠসত্ততিৱস্সাহং, পচ্ছিমো ৱত্ততে ৱযো [পচ্ছিমা ৱত্তযি ৱযা (স্যা.)];

পব্ভাৰম্হি অনুপ্পত্তা, আৰোচেমি মহামুনি.

৩২২. ‘‘‘পৰিপক্কো ৱযো ময্হং, পৰিত্তং মম জীৱিতং;

পহায ৱো গমিস্সামি, কতং মে সৰণমত্তনো.

৩২৩. ‘‘‘ৱযম্হি পচ্ছিমে কালে, মৰণং উপৰুদ্ধতি;

অজ্জৰত্তিং মহাৱীৰ, পাপুণিস্সামি নিব্বুতিং.

৩২৪. ‘‘‘নত্থি জাতি জৰা ব্যাধি, মৰণঞ্চ মহামুনে;

অজৰামৰণং পুৰং, গমিস্সামি অসঙ্খতং.

৩২৫. ‘‘‘যাৱতা পৰিসা নাম, সমুপাসন্তি সত্থুনো;

অপৰাধমজানন্তী [সচে মেত্থি (সী.), পজানন্তী (ক.)], খমন্তং সম্মুখা মুনে.

৩২৬. ‘‘‘সংসৰিত্ৱা চ সংসাৰে, খলিতঞ্চে মমং তযি;

আৰোচেমি মহাৱীৰ, অপৰাধং খমস্সু মে’.

৩২৭. ‘‘সুত্ৱান ৱচনং তস্সা, মুনিন্দো ইদমব্ৰৱি;

‘কিমুত্তৰং তে ৱক্খামি, নিব্বানায ৱজন্তিযা.

৩২৮. ‘‘‘ইদ্ধিঞ্চাপি নিদস্সেহি, মম সাসনকাৰিকে;

পৰিসানঞ্চ সব্বাসং, কঙ্খং ছিন্দস্সু যাৱতা’.

৩২৯. ‘‘সুত্ৱা তং মুনিনো ৱাচং, ভিক্খুনী সা যসোধৰা;

ৱন্দিত্ৱা মুনিৰাজং তং, ইদং ৱচনমব্ৰৱি.

৩৩০. ‘‘‘যসোধৰা অহং ৱীৰ, অগাৰে তে পজাপতি;

সাকিযম্হি কুলে জাতা, ইত্থিঅঙ্গে পতিট্ঠিতা.

৩৩১. ‘‘‘থীনং সতসহস্সানং, নৱুতীনং ছদুত্তৰি;

অগাৰে তে অহং ৱীৰ, পামোক্খা সব্বা ইস্সৰা.

৩৩২. ‘‘‘ৰূপাচাৰগুণূপেতা, যোব্বনট্ঠা পিযংৱদা;

সব্বা মং অপচাযন্তি, দেৱতা ৱিয মানুসা.

৩৩৩. ‘‘‘কঞ্ঞাসতসহস্সপমুখা, সক্যপুত্তনিৱেসনে;

সমানসুখদুক্খতা, দেৱতা ৱিয নন্দনে.

৩৩৪. ‘‘‘কামধাতুমতিক্কম্ম [কামধাতুমতিক্কন্তা (সী. স্যা. পী. ক.)], সণ্ঠিতা ৰূপধাতুযা;

ৰূপেন সদিসা নত্থি, ঠপেত্ৱা লোকনাযকং.

৩৩৫. ‘‘‘সম্বুদ্ধং অভিৱাদেত্ৱা, ইদ্ধিং দস্সেসি সত্থুনো;

নেকা নানাৱিধাকাৰা, মহাইদ্ধীপি দস্সযী [এৱমাদীনি ৱত্ৱান, উপতিত্ৱান অম্বৰং; ইদ্ধী অনেকা দস্সেসি, বুদ্ধানুঞ্ঞা যসোধৰা; (সী.)].

৩৩৬. ‘‘‘চক্কৱাড়সমং কাযং, সীসং উত্তৰতো কুৰু;

উভো পক্খা দুৱে দীপা, জম্বুদীপং সৰীৰতো.

৩৩৭. ‘‘‘দক্খিণঞ্চ সৰং পিঞ্ছং, নানাসাখা তু পত্তকা;

চন্দঞ্চ সূৰিযঞ্চক্খি, মেৰুপব্বততো সিখং.

৩৩৮. ‘‘‘চক্কৱালগিৰিং তুণ্ডং, জম্বুৰুক্খং সমূলকং;

বীজমানা উপাগন্ত্ৱা, ৱন্দন্তী লোকনাযকং.

৩৩৯. ‘‘‘হত্থিৱণ্ণং তথেৱস্সং, পব্বতং জলধিং তথা;

চন্দিমং সূৰিযং মেৰুং, সক্কৱণ্ণঞ্চ দস্সযি.

৩৪০. ‘‘‘যসোধৰা অহং ৱীৰ, পাদে ৱন্দামি চক্খুম;

সহস্সলোকধাতূনং, ফুল্লপদ্মেন ছাদযি.

৩৪১. ‘‘‘ব্ৰহ্মৱণ্ণঞ্চ মাপেত্ৱা, ধম্মং দেসেসি সুঞ্ঞতং;

যসোধৰা অহং ৱীৰ, পাদে ৱন্দামি চক্খুম.

৩৪২. ‘‘‘ইদ্ধীসু চ ৱসী হোমি, দিব্বায সোতধাতুযা;

চেতোপৰিযঞাণস্স, ৱসী হোমি মহামুনি.

৩৪৩. ‘‘‘পুব্বেনিৱাসং জানামি, দিব্বচক্খু ৱিসোধিতং;

সব্বাসৱপৰিক্খীণা, নত্থি দানি পুনব্ভৱো.

৩৪৪. ‘‘‘অত্থধম্মনিৰুত্তীসু, পটিভানে তথেৱ চ;

ঞাণং ময্হং মহাৱীৰ, উপ্পন্নং তৱ সন্তিকে.

৩৪৫. ‘‘‘পুব্বানং লোকনাথানং, সঙ্গমং তে নিদস্সিতং [সুদস্সিতং (স্যা. পী. ক.)];

অধিকাৰং বহুং ময্হং, তুয্হত্থায মহামুনে.

৩৪৬. ‘‘‘যং ময্হং পূৰিতং কম্মং, কুসলং সৰসে মুনে;

তুয্হত্থায মহাৱীৰ, পুঞ্ঞং উপচিতং মযা.

৩৪৭. ‘‘‘অভব্বট্ঠানে ৱজ্জেত্ৱা, ৱাৰযিত্ৱা অনাচৰং;

তুয্হত্থায মহাৱীৰ, সঞ্চত্তং জীৱিতং মযা.

৩৪৮. ‘‘‘নেককোটিসহস্সানি, ভৰিযত্থাযদাসি মং;

ন তত্থ ৱিমনা হোমি, তুয্হত্থায মহামুনি.

৩৪৯. ‘‘‘নেককোটিসহস্সানি, উপকাৰাযদাসি মং;

ন তত্থ ৱিমনা হোমি, তুয্হত্থায মহামুনি.

৩৫০. ‘‘‘নেককোটিসহস্সানি, ভোজনত্থাযদাসি মং;

ন তত্থ ৱিমনা হোমি, তুয্হত্থায মহামুনি.

৩৫১. ‘‘‘নেককোটিসহস্সানি, জীৱিতানি পৰিচ্চজিং;

ভযমোক্খং কৰিস্সন্তি, দদামি মম জীৱিতং.

৩৫২. ‘‘‘অঙ্গগতে [অঙ্গে এৱং (ক.)] অলঙ্কাৰে, ৱত্থে নানাৱিধে বহূ;

ইত্থিমণ্ডে ন গূহামি, তুয্হত্থায মহামুনি.

৩৫৩. ‘‘‘ধনধঞ্ঞপৰিচ্চাগং, গামানি নিগমানি চ;

খেত্তং পুত্তা চ ধীতা চ, পৰিচ্চত্তা মহামুনি.

৩৫৪. ‘‘‘হত্থী অস্সা গৱা চাপি, দাসিযো পৰিচাৰিকা;

তুয্হত্থায মহাৱীৰ, পৰিচ্চত্তা অসঙ্খিযা.

৩৫৫. ‘‘‘যং ময্হং পটিমন্তেসি [পতিমন্তেসি (সী.)], দানং দস্সামি যাচকে;

ৱিমনং মে ন পস্সামি, দদতো দানমুত্তমং.

৩৫৬. ‘‘‘নানাৱিধং বহুং দুক্খং, সংসাৰে চ বহুব্বিধে;

তুয্হত্থায মহাৱীৰ, অনুভুত্তং অসঙ্খিযং.

৩৫৭. ‘‘‘সুখপ্পত্তানুমোদামি, ন চ দুক্খেসু দুম্মনা;

সব্বত্থ তুলিতা হোমি, তুয্হত্থায মহামুনি.

৩৫৮. ‘‘‘অনুমগ্গেন সম্বুদ্ধো, যং ধম্মং অভিনীহৰি;

অনুভোত্ৱা সুখং দুক্খং, পত্তো বোধিং মহামুনি.

৩৫৯. ‘‘‘ব্ৰহ্মদেৱঞ্চ সম্বুদ্ধং, গোতমং লোকনাযকং;

অঞ্ঞেসং লোকনাথানং, সঙ্গমং তে বহুং মযা.

৩৬০. ‘‘‘অধিকাৰং বহুং ময্হং, তুয্হত্থায মহামুনি;

গৱেসতো বুদ্ধধম্মে, অহং তে পৰিচাৰিকা.

৩৬১. ‘‘‘কপ্পে চ সতসহস্সে, চতুৰো চ অসঙ্খিযে;

দীপঙ্কৰো মহাৱীৰো, উপ্পজ্জি লোকনাযকো.

৩৬২. ‘‘‘পচ্চন্তদেসৱিসযে, নিমন্তেত্ৱা তথাগতং;

তস্স আগমনং মগ্গং, সোধেন্তি তুট্ঠমানসা.

৩৬৩. ‘‘‘তেন কালেন সো আসি, সুমেধো নাম ব্ৰাহ্মণো;

মগ্গঞ্চ পটিযাদেসি, আযতো [আযতং (সী.)] সব্বদস্সিনো.

৩৬৪. ‘‘‘তেন কালেনহং আসিং, কঞ্ঞা ব্ৰাহ্মণসম্ভৱা;

সুমিত্তানাম নামেন, উপগচ্ছিং সমাগমং.

৩৬৫. ‘‘‘অট্ঠ উপ্পলহত্থানি, পূজনত্থায সত্থুনো;

আদায জনসংমজ্ঝে, অদ্দসং ইসি মুগ্গতং.

৩৬৬. ‘‘‘চিৰানুগতং দযিতং [চিৰানুপৰি আসীনং (সী.)], অতিক্কন্তং মনোহৰং;

দিস্ৱা তদা অমঞ্ঞিস্সং, সফলং জীৱিতং মম.

৩৬৭. ‘‘‘পৰক্কমং তং সফলং, অদ্দসং ইসিনো তদা;

পুব্বকম্মেন সম্বুদ্ধে, চিত্তঞ্চাপি পসীদি মে.

৩৬৮. ‘‘‘ভিয্যো চিত্তং পসাদেসিং, ইসে উগ্গতমানসে;

দেয্যং অঞ্ঞং ন পস্সামি, দেমি পুপ্ফানি তে ইসি.

৩৬৯. ‘‘‘পঞ্চহত্থা তৱ হোন্তু, তযো হোন্তু মমং ইসে;

তেন সদ্ধিং সমা হোন্তু, বোধত্থায তৱং ইসে’.

চতুত্থং ভাণৱাৰং.

৩৭০. ‘‘ইসি গহেত্ৱা পুপ্ফানি, আগচ্ছন্তং মহাযসং;

পূজেসি জনসংমজ্ঝে, বোধত্থায মহাইসি.

৩৭১. ‘‘পস্সিত্ৱা জনসংমজ্ঝে, দীপঙ্কৰো মহামুনি;

ৱিযাকাসি মহাৱীৰো, ইসি মুগ্গতমানসং.

৩৭২. ‘‘অপৰিমেয্যে ইতো কপ্পে, দীপঙ্কৰো মহামুনি;

মম কম্মং ৱিযাকাসি, উজুভাৱং মহামুনি.

৩৭৩. ‘‘‘সমচিত্তা সমকম্মা, সমকাৰী ভৱিস্সতি;

পিযা হেস্সতি কম্মেন, তুয্হত্থায মহাইসি [মহাইসে (স্যা.)].

৩৭৪. ‘‘‘সুদস্সনা সুপিযা চ, মনাপা পিযৱাদিনী;

তস্স ধম্মেসু দাযাদা, ৱিহৰিস্সতি ইদ্ধিকা.

৩৭৫. ‘‘‘যথাপি ভণ্ডসামুগ্গং, অনুৰক্খতি সামিনো;

এৱং কুসলধম্মানং, অনুৰক্খিস্সতে অযং.

৩৭৬. ‘‘‘তস্স তে [তস্স তং (স্যা.)] অনুকম্পন্তী, পূৰযিস্সতি পাৰমী;

সীহোৱ পঞ্জৰং ভেত্ৱা [হিত্ৱা (স্যা.), হেত্ৱা (পী.)], পাপুণিস্সতি বোধিযং’.

৩৭৭. ‘‘অপৰিমেয্যে ইতো কপ্পে, যং মং বুদ্ধো ৱিযাকৰী;

তং ৱাচং অনুমোদেন্তী, এৱংকাৰী ভৱিং অহং.

৩৭৮. ‘‘তস্স কম্মস্স সুকতস্স, তত্থ চিত্তং পসাদযিং;

দেৱমনুস্সকং যোনিং, অনুভোত্ৱা অসঙ্খিযং.

৩৭৯. ‘‘সুখদুক্খেনুভোত্ৱাহং, দেৱেসু মানুসেসু চ;

পচ্ছিমে ভৱে সম্পত্তে, অজাযিং সাকিযে কুলে.

৩৮০. ‘‘ৰূপৱতী ভোগৱতী, যসসীলৱতী ততো;

সব্বঙ্গসম্পদা হোমি, কুলেসু অভিসক্কতা.

৩৮১. ‘‘লাভং সিলোকং সক্কাৰং, লোকধম্মসমাগমং;

চিত্তঞ্চ দুক্খিতং নত্থি, ৱসামি অকুতোভযা.

৩৮২. ‘‘ৱুত্তঞ্হেতং ভগৱতা, ৰঞ্ঞো অন্তেপুৰে তদা;

খত্তিযানং পুৰে ৱীৰ, উপকাৰঞ্চ নিদ্দিসি.

৩৮৩. ‘‘উপকাৰা চ যা নাৰী, যা চ নাৰী সুখে দুখে;

অত্থক্খাযী চ যা নাৰী, যা চ নাৰীনুকম্পিকা.

৩৮৪. ‘‘পঞ্চকোটিসতা বুদ্ধা, নৱকোটিসতানি চ;

এতেসং দেৱদেৱানং, মহাদানং পৱত্তযিং.

৩৮৫. ‘‘অধিকাৰং মহা [সদা (পী.) এৱমুপৰিপি] ময্হং, ধম্মৰাজ সুণোহি মে;

একাদসকোটিসতা, বুদ্ধা দ্ৱাদস কোটিযো [হোন্তি লোকগ্গনাযকা (সী. স্যা.), পণ্ণাকোটিসতানি চ (পী.)].

৩৮৬. ‘‘এতেসং দেৱদেৱানং, মহাদানং পৱত্তযিং;

অধিকাৰং মহা ময্হং, ধম্মৰাজ সুণোহি মে.

৩৮৭. ‘‘‘ৱীসকোটিসতা বুদ্ধা, তিংসকোটিসতানি চ;