১০. যসোধৰাপমুখঅট্ঠাৰসভিক্খুনীসহস্সঅপদানং

৪২৬. ‘‘অট্ঠাৰসসহস্সানি, ভিক্খুনী সক্যসম্ভৱা;

যসোধৰাপমুখানি, সম্বুদ্ধং উপসঙ্কমুং.

৪২৭. ‘‘অট্ঠাৰসসহস্সানি, সব্বা হোন্তি মহিদ্ধিকা;

ৱন্দন্তী মুনিনো পাদে, আৰোচেন্তি যথাবলং.

৪২৮. ‘‘‘জাতি খীণা জৰা ব্যাধি, মৰণঞ্চ মহামুনি;

অনাসৱং পদং সন্তং, অমতং যাম নাযক.

৪২৯. ‘‘‘খলিতঞ্চে পুৰে অত্থি, সব্বাসম্পি মহামুনি;

অপৰাধমজানন্তী, খম অম্হং ৱিনাযক.

৪৩০. ‘‘‘ইদ্ধিঞ্চাপি নিদস্সেথ, মম সাসনকাৰিকা;

পৰিসানঞ্চ সব্বাসং, কঙ্খং ছিন্দথ যাৱতা.

৪৩১. ‘‘‘যসোধৰা মহাৱীৰ, মনাপা পিযদস্সনা;

সব্বা তুয্হং মহাৱীৰ, অগাৰস্মিং পজাপতি.

৪৩২. ‘‘‘থীনং সতসহস্সানং, নৱুতীনং ছদুত্তৰি;

অগাৰে তে মযং ৱীৰ, পামোক্খা সব্বা ইস্সৰা.

৪৩৩. ‘‘‘ৰূপাচাৰগুণূপেতা, যোব্বনট্ঠা পিযংৱদা;

সব্বা নো অপচাযন্তি, দেৱতা ৱিয মানুসা.

৪৩৪. ‘‘‘অট্ঠাৰসসহস্সানি, সব্বা সাকিযসম্ভৱা;

যসোধৰাসহস্সানি, পামোক্খা ইস্সৰা তদা.

৪৩৫. ‘‘‘কামধাতুমতিক্কম্ম, সণ্ঠিতা ৰূপধাতুযা;

ৰূপেন সদিসা নত্থি, সহস্সানং মহামুনি.

৪৩৬. ‘‘‘সম্বুদ্ধং অভিৱাদেত্ৱা, ইদ্ধিং দস্সংসু সত্থুনো;

নেকা নানাৱিধাকাৰা, মহাইদ্ধীপি দস্সযুং.

৪৩৭. ‘‘‘চক্কৱাড়সমং কাযং, সীসং উত্তৰতো কুৰু;

উভো পক্খা দুৱে দীপা, জম্বুদীপং সৰীৰতো.

৪৩৮. ‘‘‘দক্খিণঞ্চ সৰং পিঞ্ছং, নানাসাখা তু পত্তকা;

চন্দঞ্চ সূৰিযঞ্চক্খি, মেৰুপব্বততো সিখং.

৪৩৯. ‘‘‘চক্কৱাড়গিৰিং তুণ্ডং, জম্বুৰুক্খং সমূলকং;

বীজমানা উপাগন্ত্ৱা, ৱন্দন্তী লোকনাযকং.

৪৪০. ‘‘‘হত্থিৱণ্ণং তথেৱস্সং, পব্বতং জলধিং তথা;

চন্দঞ্চ সূৰিযং মেৰুং, সক্কৱণ্ণঞ্চ দস্সযুং.

৪৪১. ‘‘‘যসোধৰা মযং ৱীৰ, পাদে ৱন্দাম চক্খুম;

তৱ চিৰপভাৱেন, নিপ্ফন্না নৰনাযক.

৪৪২. ‘‘‘ইদ্ধীসু চ ৱসী হোম, দিব্বায সোতধাতুযা;

চেতোপৰিযঞাণস্স, ৱসী হোম মহামুনে.

৪৪৩. ‘‘‘পুব্বেনিৱাসং জানাম, দিব্বচক্খু ৱিসোধিতং;

সব্বাসৱপৰিক্খীণা, নত্থি দানি পুনব্ভৱো.

৪৪৪. ‘‘‘অত্থধম্মনিৰুত্তীসু, পটিভানে তথেৱ চ;

ঞাণং অম্হং মহাৱীৰ, উপ্পন্নং তৱ সন্তিকে.

৪৪৫. ‘‘‘পুব্বানং লোকনাথানং, সঙ্গমং নো নিদস্সিতং;

অধিকাৰা বহূ অম্হং, তুয্হত্থায মহামুনে.

৪৪৬. ‘‘‘যং অম্হং পূৰিতং কম্মং, কুসলং সৰসে মুনে;

তুয্হত্থায মহাৱীৰ, পুঞ্ঞানুপচিতানি নো.

৪৪৭. ‘‘‘অভব্বট্ঠানে ৱজ্জেত্ৱা, ৱাৰযিম্হ অনাচৰং;

তুয্হত্থায মহাৱীৰ, চত্তানি জীৱিতানি নো [সঞ্চত্তং জীৱিতম্পি নো (স্যা.)].

৪৪৮. ‘‘‘নেককোটিসহস্সানি, ভৰিযত্থাযদাসি নো;

ন তত্থ ৱিমনা হোম, তুয্হত্থায মহামুনে.

৪৪৯. ‘‘‘নেককোটিসহস্সানি, উপকাৰাযদাসি নো;

ন তত্থ ৱিমনা হোম, তুয্হত্থায মহামুনে.

৪৫০. ‘‘‘নেককোটিসহস্সানি, ভোজনত্থাযদাসি নো;

ন তত্থ ৱিমনা হোম, তুয্হত্থায মহামুনে.

৪৫১. ‘‘‘নেককোটিসহস্সানি, জীৱিতানি চজিম্হসে [চজিম্হ নো (পী. ক.)];

ভযমোক্খং কৰিস্সাম, জীৱিতানি চজিম্হসে.

৪৫২. ‘‘‘অঙ্গগতে অলঙ্কাৰে, ৱত্থে নানাৱিধে বহূ;

ইত্থিভণ্ডে ন গূহাম, তুয্হত্থায মহামুনে.

৪৫৩. ‘‘‘ধনধঞ্ঞপৰিচ্চাগং, গামানি নিগমানি চ;

খেত্তং পুত্তা চ ধীতা চ, পৰিচ্চত্তা মহামুনে.

৪৫৪. ‘‘‘হত্থী অস্সা গৱা চাপি, দাসিযো পৰিচাৰিকা;

তুয্হত্থায মহাৱীৰ, পৰিচ্চত্তং অসঙ্খিযং.

৪৫৫. ‘‘‘যং অম্হে পটিমন্তেসি, দানং দস্সাম যাচকে;

ৱিমনং নো ন পস্সাম, দদতো দানমুত্তমং.

৪৫৬. ‘‘‘নানাৱিধং বহুং দুক্খং, সংসাৰে চ বহুব্বিধে;

তুয্হত্থায মহাৱীৰ, অনুভুত্তং অসঙ্খিযং.

৪৫৭. ‘‘‘সুখপ্পত্তানুমোদাম, ন চ দুক্খেসু দুম্মনা;

সব্বত্থ তুলিতা হোম, তুয্হত্থায মহামুনে.

৪৫৮. ‘‘‘অনুমগ্গেন সম্বুদ্ধো, যং ধম্মং অভিনীহৰি;

অনুভোত্ৱা সুখং দুক্খং, পত্তো বোধিং মহামুনে.

৪৫৯. ‘‘‘ব্ৰহ্মদেৱঞ্চ সম্বুদ্ধং, গোতমং লোকনাযকং;

অঞ্ঞেসং লোকনাথানং, সঙ্গমং তেহি নো বহূ.

৪৬০. ‘‘‘অধিকাৰং বহুং অম্হে, তুয্হত্থায মহামুনে;

গৱেসতো বুদ্ধধম্মে, মযং তে পৰিচাৰিকা.

৪৬১. ‘‘‘কপ্পে চ সতসহস্সে, চতুৰো চ অসঙ্খিযে;

দীপঙ্কৰো মহাৱীৰো, উপ্পজ্জি লোকনাযকো.

৪৬২. ‘‘‘পচ্চন্তদেসৱিসযে, নিমন্তেত্ৱা তথাগতং;

তস্স আগমনং মগ্গং, সোধেন্তি তুট্ঠমানসা.

৪৬৩. ‘‘‘তেন কালেন সো আসি, সুমেধো নাম ব্ৰাহ্মণো;

মগ্গঞ্চ পটিযাদেসি, আযতো সব্বদস্সিনো.

৪৬৪. ‘‘‘তেন কালেন অহুম্হ, সব্বা ব্ৰাহ্মণসম্ভৱা;

থলূদজানি পুপ্ফানি, আহৰিম্হ সমাগমং.

৪৬৫. ‘‘‘তস্মিং সো সমযে বুদ্ধো, দীপঙ্কৰো মহাযসো;

ৱিযাকাসি মহাৱীৰো, ইসিমুগ্গতমানসং.

৪৬৬. ‘‘‘চলতী ৰৱতী পুথৱী, সঙ্কম্পতি সদেৱকে;

তস্স কম্মং পকিত্তেন্তে, ইসিমুগ্গতমানসং.

৪৬৭. ‘‘‘দেৱকঞ্ঞা মনুস্সা চ, মযঞ্চাপি সদেৱকা;

নানাপূজনীযং ভণ্ডং, পূজযিত্ৱান পত্থযুং.

৪৬৮. ‘‘‘তেসং বুদ্ধো ৱিযাকাসি, জোতিদীপ সনামকো;

অজ্জ যে পত্থিতা অত্থি, তে ভৱিস্সন্তি সম্মুখা.

৪৬৯. ‘‘‘অপৰিমেয্যে ইতো কপ্পে, যং নো বুদ্ধো ৱিযাকৰি;

তং ৱাচমনুমোদেন্তা, এৱংকাৰী অহুম্হ নো.

৪৭০. ‘‘‘তস্স কম্মস্স সুকতস্স, তস্স চিত্তং পসাদযুং;

দেৱমানুসিকং যোনিং, অনুভোত্ৱা অসঙ্খিযং.

৪৭১. ‘‘‘সুখদুক্খেনুভোত্ৱান, দেৱেসু মানুসেসু চ;

পচ্ছিমে ভৱে সম্পত্তে, জাতাম্হ সাকিযে কুলে.

৪৭২. ‘‘‘ৰূপৱতী ভোগৱতী, যসসীলৱতী ততো;

সব্বঙ্গসম্পদা হোম, কুলেসু অভিসক্কতা.

৪৭৩. ‘‘‘লাভং সিলোকং সক্কাৰং, লোকধম্মসমাগমং;

চিত্তঞ্চ দুক্খিতং নত্থি, ৱসাম অকুতোভযা.

৪৭৪. ‘‘‘ৱুত্তঞ্হেতং ভগৱতা, ৰঞ্ঞো অন্তেপুৰে তদা;

খত্তিযানং পুৰে ৱীৰ [তাসং (স্যা.)], উপকাৰঞ্চ নিদ্দিসি.

৪৭৫. ‘‘‘উপকাৰা চ যা নাৰী, যা চ নাৰী সুখে দুখে;

অত্থক্খাযী চ যা নাৰী, যা চ নাৰীনুকম্পিকা.

৪৭৬. ‘‘‘ধম্মং চৰে সুচৰিতং, ন নং দুচ্চৰিতং চৰে;

ধম্মচাৰী সুখং সেতি, অস্মিং লোকে পৰম্হি চ.

৪৭৭. ‘‘‘অগাৰং ৱিজহিত্ৱান, পব্বজিম্হনগাৰিযং;

অড্ঢমাসে অসম্পত্তে, চতুসচ্চং ফুসিম্হ নো.

৪৭৮. ‘‘‘চীৱৰং পিণ্ডপাতঞ্চ, পচ্চযং সযনাসনং;

উপনেন্তি বহূ অম্হে, সাগৰস্সেৱ ঊমিযো.

৪৭৯. ‘‘‘কিলেসা ঝাপিতা অম্হং [ময্হং (স্যা.), অম্হাকং (ক.)], ভৱা সব্বে সমূহতা;

নাগীৱ বন্ধনং ছেত্ৱা, ৱিহৰাম অনাসৱা.

৪৮০. ‘‘‘স্ৱাগতং ৱত নো আসি, মম বুদ্ধস্স সন্তিকে;

তিস্সো ৱিজ্জা অনুপ্পত্তা, কতং বুদ্ধস্স সাসনং.

৪৮১. ‘‘‘পটিসম্ভিদা চতস্সো, ৱিমোক্খাপি চ অট্ঠিমে;

ছড়ভিঞ্ঞা সচ্ছিকতা, কতং বুদ্ধস্স সাসনং’.

৪৮২. ‘‘এৱং বহুৱিধং দুক্খং, সম্পত্তী চ বহুব্বিধা;

ৱিসুদ্ধভাৱং সম্পত্তা, লভাম সব্বসম্পদা.

৪৮৩. ‘‘যা দদন্তি সকত্তানং, পুঞ্ঞত্থায মহেসিনো;

সহাযসম্পদা হোন্তি, নিব্বানপদমসঙ্খতং.

৪৮৪. ‘‘পৰিক্খীণং অতীতঞ্চ, পচ্চুপ্পন্নং অনাগতং;

সব্বকম্মম্পি নো খীণং, পাদে ৱন্দাম চক্খুম.

৪৮৫. ‘‘নিব্বানায ৱদন্তীনং, কিং ৱো ৱক্খাম উত্তৰি;

সন্তসঙ্খতদোসঞ্হি, পপ্পোথ [সন্তসঙ্খতদোসো যো, পজ্জোতং (স্যা. পী. ক.)] অমতং পদং’’.

ইত্থং সুদং যসোধৰাপমুখানি অট্ঠাৰসভিক্খুনীসহস্সানি ভগৱতো সম্মুখা ইমা গাথাযো অভাসিত্থাতি.

যসোধৰাপমুখঅট্ঠাৰসভিক্খুনীসহস্সাপদানং দসমং.

কুণ্ডলকেসীৱগ্গো ততিযো.