৯. উপ্পলৱণ্ণাথেৰীঅপদানং

৩৮৪. ‘‘ভিক্খুনী উপ্পলৱণ্ণা, ইদ্ধিযা পাৰমিং গতা;

ৱন্দিত্ৱা সত্থুনো পাদে, ইদং ৱচনমব্ৰৱি.

৩৮৫. ‘‘‘নিত্থিণ্ণা জাতিসংসাৰং [জাতিসংসাৰা (পী.)], পত্তাহং অচলং পদং;

সব্বদুক্খং মযা খীণং, আৰোচেমি মহামুনি.

৩৮৬. ‘‘‘যাৱতা পৰিসা অত্থি, পসন্না জিনসাসনে;

যস্সা চ মেপৰাধোত্থি, খমন্তু জিনসম্মুখা.

৩৮৭. ‘‘‘সংসাৰে সংসৰন্তিযা [সংসৰন্তা মে (স্যা.)], খলিতং মে সচে ভৱে;

আৰোচেমি মহাৱীৰ, অপৰাধং খমস্সু তং [মে (স্যা.)].

৩৮৮. ‘‘‘ইদ্ধিঞ্চাপি নিদস্সেহি, মম সাসনকাৰিকে;

চতস্সো পৰিসা অজ্জ, কঙ্খং ছিন্দাহি যাৱতা.

৩৮৯. ‘‘‘ধীতা তুয্হং মহাৱীৰ, পঞ্ঞৱন্ত জুতিন্ধৰ;

বহুঞ্চ দুক্কৰং কম্মং, কতং মে অতিদুক্কৰং.

৩৯০. ‘‘‘উপ্পলস্সেৱ মে ৱণ্ণো, নামেনুপ্পলনামিকা;

সাৱিকা তে মহাৱীৰ, পাদে ৱন্দামি চক্খুম.

৩৯১. ‘‘‘ৰাহুলো চ অহঞ্চেৱ, নেকজাতিসতে বহূ;

একস্মিং সম্ভৱে জাতা, সমানছন্দমানসা.

৩৯২. ‘‘‘নিব্বত্তি একতো হোতি, জাতিযাপি চ একতো [জাতীসু বহুসো মম (সী.)];

পচ্ছিমে ভৱে সম্পত্তে, উভোপি নানাসম্ভৱা.

৩৯৩. ‘‘‘পুত্তো চ ৰাহুলো নাম, ধীতা উপ্পলসৱ্হযা;

পস্স ৱীৰ মমং ইদ্ধিং, বলং দস্সেমি সত্থুনো.

৩৯৪. ‘‘‘মহাসমুদ্দে চতুৰো, পক্খিপি হত্থপাতিযং;

তেলং হত্থগতঞ্চেৱ, খিড্ডো [ৱেজ্জো (সী. পী.)] কোমাৰকো যথা.

৩৯৫. ‘‘‘উব্বত্তযিত্ৱা পথৱিং, পক্খিপি হত্থপাতিযং;

চিত্তং মুঞ্জং যথা নাম, লুঞ্চি কোমাৰকো যুৱা.

৩৯৬. ‘‘‘চক্কৱাড়সমং পাণিং, ছাদযিত্ৱান মত্থকে;

ৱস্সাপেত্ৱান ফুসিতং, নানাৱণ্ণং পুনপ্পুনং.

৩৯৭. ‘‘‘ভূমিং উদুক্খলং কত্ৱা, ধঞ্ঞং কত্ৱান সক্খৰং;

সিনেৰুং মুসলং কত্ৱা, মদ্দি কোমাৰিকা যথা.

৩৯৮. ‘‘‘ধীতাহং বুদ্ধসেট্ঠস্স, নামেনুপ্পলসৱ্হযা;

অভিঞ্ঞাসু ৱসীভূতা, তৱ সাসনকাৰিকা.

৩৯৯. ‘‘‘নানাৱিকুব্বনং কত্ৱা, দস্সেত্ৱা লোকনাযকং;

নামগোত্তঞ্চ সাৱেত্ৱা [পকাসেত্ৱা (স্যা.)], পাদে ৱন্দামি চক্খুম.

৪০০. ‘‘‘ইদ্ধীসু চ ৱসী হোমি, দিব্বায সোতধাতুযা;

চেতোপৰিযঞাণস্স, ৱসী হোমি মহামুনে.

৪০১. ‘‘‘পুব্বেনিৱাসং জানামি, দিব্বচক্খু ৱিসোধিতং;

সব্বাসৱপৰিক্খীণা, নত্থি দানি পুনব্ভৱো.

৪০২. ‘‘‘অত্থধম্মনিৰুত্তীসু, পটিভানে তথেৱ চ;

ঞাণং মে ৱিমলং [ৱিপুলং (স্যা.)] সুদ্ধং, সভাৱেন মহেসিনো.

৪০৩. ‘‘‘পুৰিমানং জিনগ্গানং, সঙ্গমং তে নিদস্সিতং [সম্মুখা চ পৰম্মুখা (সী.)];

অধিকাৰং বহুং ময্হং, তুয্হত্থায মহামুনি.

৪০৪. ‘‘‘যং মযা পূৰিতং কম্মং, কুসলং সৰ মে মুনি;

তৱত্থায মহাৱীৰ, পুঞ্ঞং উপচিতং মযা.

৪০৫. ‘‘‘অভব্বট্ঠানে ৱজ্জেত্ৱা, ৱাৰযন্তী [পৰিৱজ্জন্তি (সী.), পৰিপাচেন্তো (স্যা.)] অনাচৰং;

তৱত্থায মহাৱীৰ, চত্তং মে জীৱিতুত্তমং.

৪০৬. ‘‘‘দসকোটিসহস্সানি, অদাসিং মম জীৱিতং;

পৰিচ্চত্তা চ মে হোমি, তৱত্থায মহামুনি.

৪০৭. ‘‘‘তদাতিৱিম্হিতা সব্বা, সিৰসাৱ কতঞ্জলী;

অৱোচয্যে কথং আসি, অতুলিদ্ধিপৰক্কমা’.

৪০৮. ‘‘সতসহস্সিতো কপ্পে, নাগকঞ্ঞা অহং তদা;

ৱিমলা নাম নামেন, কঞ্ঞানং সাধুসম্মতা.

৪০৯. ‘‘মহোৰগো মহানাগো, পসন্নো জিনসাসনে;

পদুমুত্তৰং মহাতেজং, নিমন্তেসি সসাৱকং.

৪১০. ‘‘ৰতনমযং মণ্ডপং, পল্লঙ্কং ৰতনামযং;

ৰতনং ৱালুকাকিণ্ণং, উপভোগং ৰতনামযং.

৪১১. ‘‘মগ্গঞ্চ পটিযাদেসি, ৰতনদ্ধজভূসিতং;

পচ্চুগ্গন্ত্ৱান সম্বুদ্ধং, ৱজ্জন্তো তূৰিযেহি সো.

৪১২. ‘‘পৰিসাহি চ চতূহি [পৰিসাহি চতূহি সো (সী.), পৰিসাহি চতস্সো হি (পী.)], পৰিৱুতো [সহিতো (সী.), ফৰতে (স্যা.), পৰেতো (পী.)] লোকনাযকো;

মহোৰগস্স ভৱনে, নিসীদি পৰমাসনে.

৪১৩. ‘‘অন্নং পানং খাদনীযং, ভোজনঞ্চ মহাৰহং;

ৱৰং ৱৰঞ্চ পাদাসি, নাগৰাজা মহাযসং.

৪১৪. ‘‘ভুঞ্জিত্ৱান সম্বুদ্ধো, পত্তং ধোৱিত্ৱা যোনিসো;

অনুমোদনীযংকাসি, নাগকঞ্ঞা মহিদ্ধিকা.

৪১৫. ‘‘সব্বঞ্ঞুং ফুল্লিতং দিস্ৱা, নাগকঞ্ঞা মহাযসং;

পসন্নং সত্থুনো চিত্তং, সুনিবন্ধঞ্চ মানসং.

৪১৬. ‘‘মমঞ্চ চিত্তমঞ্ঞায, জলজুত্তমনামকো;

তস্মিং খণে মহাৱীৰো, ভিক্খুনিং দস্সযিদ্ধিযা.

৪১৭. ‘‘ইদ্ধী অনেকা দস্সেসি, ভিক্খুনী সা ৱিসাৰদা;

পমোদিতা ৱেদজাতা, সত্থাৰং ইদমব্ৰৱি [এতদব্ৰৱিং (স্যা. পী.)].

৪১৮. ‘‘‘অদ্দসাহং ইমং ইদ্ধিং, সুমনং ইতৰাযপি;

কথং অহোসি সা ৱীৰ, ইদ্ধিযা সুৱিসাৰদা’.

৪১৯. ‘‘‘ওৰসা মুখতো জাতা, ধীতা মম মহিদ্ধিকা;

মমানুসাসনিকৰা, ইদ্ধিযা সুৱিসাৰদা’.

৪২০. ‘‘বুদ্ধস্স ৱচনং সুত্ৱা, এৱং পত্থেসহং তদা [তুট্ঠা এৱং অৱোচহং (স্যা.), এৱমহোসহং তদা (ক.)];

অহম্পি তাদিসা হোমি, ইদ্ধিযা সুৱিসাৰদা.

৪২১. ‘‘পমোদিতাহং সুমনা, পত্থে উত্তমমানসা [পত্তউত্তমমানসা (সী. স্যা. পী.)];

অনাগতম্হি অদ্ধানে, ঈদিসা হোমি নাযক.

৪২২. ‘‘মণিমযম্হি পল্লঙ্কে, মণ্ডপম্হি পভস্সৰে;

অন্নপানেন তপ্পেত্ৱা, সসঙ্ঘং লোকনাযকং.

৪২৩. ‘‘নাগানং পৱৰং পুপ্ফং, অৰুণং নাম উপ্পলং;

ৱণ্ণং মে ঈদিসং হোতু, পূজেসিং লোকনাযকং.

৪২৪. ‘‘তেন কম্মেন সুকতেন, চেতনাপণিধীহি চ;

জহিত্ৱা মানুসং দেহং, তাৱতিংসমগচ্ছহং.

৪২৫. ‘‘ততো চুতাহং মনুজে, উপপন্না সযম্ভুনো;

উপ্পলেহি পটিচ্ছন্নং, পিণ্ডপাতমদাসহং.

৪২৬. ‘‘একনৱুতিতো কপ্পে, ৱিপস্সী নাম নাযকো;

উপ্পজ্জি চাৰুদস্সনো, সব্বধম্মেসু চক্খুমা.

৪২৭. ‘‘সেট্ঠিধীতা তদা হুত্ৱা, বাৰাণসিপুৰুত্তমে;

নিমন্তেত্ৱান সম্বুদ্ধং, সসঙ্ঘং লোকনাযকং.

৪২৮. ‘‘মহাদানং দদিত্ৱান, উপ্পলেহি ৱিনাযকং;

পূজযিত্ৱা চেতসাৱ [চ তেহেৱ (স্যা. পী.)], ৱণ্ণসোভং অপত্থযিং.

৪২৯. ‘‘ইমম্হি ভদ্দকে কপ্পে, ব্ৰহ্মবন্ধু মহাযসো;

কস্সপো নাম গোত্তেন, উপ্পজ্জি ৱদতং ৱৰো.

৪৩০. ‘‘উপট্ঠাকো মহেসিস্স, তদা আসি নৰিস্সৰো;

কাসিৰাজা কিকী নাম, বাৰাণসিপুৰুত্তমে.

৪৩১. ‘‘তস্সাসিং দুতিযা ধীতা, সমণগুত্তসৱ্হযা;

ধম্মং সুত্ৱা জিনগ্গস্স, পব্বজ্জং সমৰোচযিং.

৪৩২. ‘‘অনুজানি ন নো তাতো, অগাৰেৱ তদা মযং;

ৱীসৱস্সসহস্সানি, ৱিচৰিম্হ অতন্দিতা.

৪৩৩. ‘‘কোমাৰিব্ৰহ্মচৰিযং, ৰাজকঞ্ঞা সুখেধিতা;

বুদ্ধোপট্ঠাননিৰতা, মুদিতা সত্তধীতৰো.

৪৩৪. ‘‘সমণী সমণগুত্তা চ, ভিক্খুনী ভিক্খুদাযিকা [ভিক্খুদাসিকা (সী. স্যা.)];

ধম্মা চেৱ সুধম্মা চ, সত্তমী সঙ্ঘদাযিকা [সংঘদাসিকা (সী. স্যা.)].

৪৩৫. ‘‘অহং খেমা চ সপ্পঞ্ঞা, পটাচাৰা চ কুণ্ডলা;

কিসাগোতমী ধম্মদিন্না, ৱিসাখা হোতি সত্তমী.

৪৩৬. ‘‘তেহি কম্মেহি সুকতেহি, চেতনাপণিধীহি চ;

জহিত্ৱা মানুসং দেহং, তাৱতিংসমগচ্ছহং.

৪৩৭. ‘‘ততো চুতা মনুস্সেসু, উপপন্না মহাকুলে;

পীতং মট্ঠং ৱৰং দুস্সং, অদং অৰহতো অহং.

৪৩৮. ‘‘ততো চুতাৰিট্ঠপুৰে, জাতা ৱিপ্পকুলে অহং;

ধীতা তিৰিটিৱচ্ছস্স, উম্মাদন্তী মনোহৰা.

৪৩৯. ‘‘ততো চুতা জনপদে, কুলে অঞ্ঞতৰে অহং;

পসূতা নাতিফীতম্হি, সালিং গোপেমহং তদা.

৪৪০. ‘‘দিস্ৱা পচ্চেকসম্বুদ্ধং, পঞ্চলাজাসতানিহং;

দত্ৱা পদুমচ্ছন্নানি, পঞ্চ পুত্তসতানিহং.

৪৪১. ‘‘পত্থযিং তেপি পত্থেসুং, মধুং দত্ৱা সযম্ভুনো;

ততো চুতা অৰঞ্ঞেহং, অজাযিং পদুমোদৰে.

৪৪২. ‘‘কাসিৰঞ্ঞো মহেসীহং, হুত্ৱা সক্কতপূজিতা;

অজনিং ৰাজপুত্তানং, অনূনং সতপঞ্চকং.

৪৪৩. ‘‘যদা তে যোব্বনপ্পত্তা, কীড়ন্তা জলকীড়িতং;

দিস্ৱা ওপত্তপদুমং, আসুং পচ্চেকনাযকা.

৪৪৪. ‘‘সাহং তেহি ৱিনাভূতা, সুতৱীৰেহি সোকিনী [সুতৱৰেহি সোকিনী (সী. স্যা.)];

চুতা ইসিগিলিপস্সে, গামকম্হি অজাযিহং.

৪৪৫. ‘‘যদা বুদ্ধা সুতমতী, সুতানং ভত্তুনোপি চ [কসতং তদা (সী.), অত্তনোপি চ (স্যা.)];

যাগুং আদায গচ্ছন্তী, অট্ঠ পচ্চেকনাযকে.

৪৪৬. ‘‘ভিক্খায গামং গচ্ছন্তে, দিস্ৱা পুত্তে অনুস্সৰিং;

খীৰধাৰা ৱিনিগ্গচ্ছি, তদা মে পুত্তপেমসা.

৪৪৭. ‘‘ততো তেসং অদং যাগুং, পসন্না সেহি পাণিভি;

ততো চুতাহং তিদসং, নন্দনং উপপজ্জহং.

৪৪৮. ‘‘অনুভোত্ৱা সুখং দুক্খং, সংসৰিত্ৱা ভৱাভৱে;

তৱত্থায মহাৱীৰ, পৰিচ্চত্তঞ্চ জীৱিতং.

৪৪৯. ‘‘এৱং বহুৱিধং দুক্খং, সম্পত্তী চ বহুব্বিধা;

পচ্ছিমে ভৱে সম্পত্তে, জাতা সাৱত্থিযং পুৰে.

৪৫০. ‘‘মহাধনসেট্ঠিকুলে, সুখিতে সজ্জিতে তথা;

নানাৰতনপজ্জোতে, সব্বকামসমিদ্ধিনে.

৪৫১. ‘‘সক্কতা পূজিতা চেৱ, মানিতাপচিতা তথা;

ৰূপসীৰিমনুপ্পত্তা [ৰূপসোভগ্গসম্পন্না (সী.)], কুলেসু অতিসক্কতা [অভিসম্মতা (সী.)].

৪৫২. ‘‘অতীৱ পত্থিতা চাসিং, ৰূপভোগসিৰীহি চ;

পত্থিতা সেট্ঠিপুত্তেহি, অনেকেহি সতেহিপি.

৪৫৩. ‘‘অগাৰং পজহিত্ৱান, পব্বজিং অনগাৰিযং;

অড্ঢমাসে অসম্পত্তে, চতুসচ্চমপাপুণিং.

৪৫৪. ‘‘ইদ্ধিযা অভিনিম্মিত্ৱা, চতুৰস্সং ৰথং অহং;

বুদ্ধস্স পাদে ৱন্দিস্সং, লোকনাথস্স তাদিনো.

৪৫৫. ‘‘‘সুপুপ্ফিতগ্গং উপগম্ম পাদপং [ভিক্খুনী (সী. পী. ক.) থেৰীগা. ২৩০], একা তুৱং তিট্ঠসি সালমূলে;

ন চাপি তে দুতিযো অত্থি কোচি [ন চত্থি তে দুতিযা ৱণ্ণধাতু (সী. পী. ক.)], বালে ন ত্ৱং ভাযসি ধুত্তকানং’.

৪৫৬. ‘‘‘সতং সহস্সানিপি ধুত্তকানং [সহস্সানম্পি ধুত্তকানং (পী.) থেৰীগা. ২৩১], সমাগতা এদিসকা ভৱেয্যুং;

লোমং ন ইঞ্জে ন সম্পৱেধে, কিং মে তুৱং মাৰ কৰিস্সসেকো [ন মাৰ ভাযামি তৱেকিকাপি (সী. ক.) … তমেকিকাসিং (পী.)].

৪৫৭. ‘‘‘এসা অন্তৰধাযামি, কুচ্ছিং ৱা পৱিসামি তে;

ভমুকন্তৰিকাযম্পি, তিট্ঠন্তিং মং ন দক্খসি.

৪৫৮. ‘‘‘চিত্তস্মিং ৱসীভূতাম্হি, ইদ্ধিপাদা সুভাৱিতা;