২. একূপোসথিকৱগ্গো

১. একূপোসথিকাথেৰীঅপদানং

১. ‘‘নগৰে বন্ধুমতিযা, বন্ধুমা নাম খত্তিযো;

দিৱসে পুণ্ণমায সো, উপৱসি উপোসথং.

২. ‘‘অহং তেন সমযেন, কুম্ভদাসী অহং তহিং;

দিস্ৱা সৰাজকং সেনং, এৱাহং চিন্তযিং তদা.

৩. ‘ৰাজাপি ৰজ্জং ছড্ডেত্ৱা, উপৱসি উপোসথং;

সফলং নূন তং কম্মং, জনকাযো পমোদিতো’.

৪. ‘‘যোনিসো পচ্চৱেক্খিত্ৱা, দুগ্গচ্চঞ্চ [দুগ্গতিঞ্চ (স্যা.)] দলিদ্দতং [দড়িদ্দতং (সী.)];

মানসং সম্পহংসিত্ৱা, উপৱসিং উপোসথং.

৫. ‘‘অহং উপোসথং কত্ৱা, সম্মাসম্বুদ্ধসাসনে;

তেন কম্মেন সুকতেন, তাৱতিংসমগচ্ছহং.

৬. ‘‘তত্থ মে সুকতং ব্যম্হং, উব্ভযোজনমুগ্গতং [উদ্ধং যোজনমুগ্গতং (সী. স্যা. পী.)];

কূটাগাৰৱৰূপেতং, মহাসনসুভূসিতং.

৭. ‘‘অচ্ছৰা সতসহস্সা, উপতিট্ঠন্তি মং সদা;

অঞ্ঞে দেৱে অতিক্কম্ম, অতিৰোচামি সব্বদা.

৮. ‘‘চতুসট্ঠি দেৱৰাজূনং, মহেসিত্তমকাৰযিং;

তেসট্ঠি চক্কৱত্তীনং, মহেসিত্তমকাৰযিং.

৯. ‘‘সুৱণ্ণৱণ্ণা হুত্ৱান, ভৱেসু সংসৰামহং;

সব্বত্থ পৱৰা হোমি, উপোসথস্সিদং ফলং.

১০. ‘‘হত্থিযানং অস্সযানং, ৰথযানঞ্চ সীৱিকং [কেৱলং (সী. স্যা. পী.)];

লভামি সব্বমেৱেতং, উপোসথস্সিদং ফলং.

১১. ‘‘সোণ্ণমযং ৰূপিমযং, অথোপি ফলিকামযং;

লোহিতঙ্গমযঞ্চেৱ, সব্বং পটিলভামহং.

১২. ‘‘কোসেয্যকম্বলিযানি, খোমকপ্পাসিকানি চ;

মহগ্ঘানি চ ৱত্থানি, সব্বং পটিলভামহং.

১৩. ‘‘অন্নং পানং খাদনীযং, ৱত্থসেনাসনানি চ;

সব্বমেতং পটিলভে, উপোসথস্সিদং ফলং.

১৪. ‘‘ৱৰগন্ধঞ্চ মালঞ্চ, চুণ্ণকঞ্চ ৱিলেপনং;

সব্বমেতং পটিলভে, উপোসথস্সিদং ফলং.

১৫. ‘‘কূটাগাৰঞ্চ পাসাদং, মণ্ডপং হম্মিযং গুহং;

সব্বমেতং পটিলভে, উপোসথস্সিদং ফলং.

১৬. ‘‘জাতিযা সত্তৱস্সাহং, পব্বজিং অনগাৰিযং;

অড্ঢমাসে অসম্পত্তে, অৰহত্তমপাপুণিং.

১৭. ‘‘কিলেসা ঝাপিতা ময্হং, ভৱা সব্বে সমূহতা;

সব্বাসৱপৰিক্খীণা, নত্থি দানি পুনব্ভৱো.

১৮. ‘‘একনৱুতিতো কপ্পে, যং কম্মমকৰিং তদা;

দুগ্গতিং নাভিজানামি, উপোসথস্সিদং ফলং.

১৯. ‘‘কিলেসা ঝাপিতা ময্হং…পে… ৱিহৰামি অনাসৱা.

২০. ‘‘স্ৱাগতং ৱত মে আসি…পে… কতং বুদ্ধস্স সাসনং.

২১. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং একূপোসথিকা ভিক্খুনী ইমা গাথাযো অভাসিত্থাতি.

একূপোসথিকাথেৰিযাপদানং পঠমং.

২. সড়লপুপ্ফিকাথেৰীঅপদানং

২২. ‘‘চন্দভাগানদীতীৰে, অহোসিং কিন্নৰী তদা;

অদ্দসাহং দেৱদেৱং, চঙ্কমন্তং নৰাসভং.

২৩. ‘‘ওচিনিত্ৱান সড়লং, বুদ্ধসেট্ঠস্সদাসহং;

উপসিঙ্ঘি মহাৱীৰো, সড়লং দেৱগন্ধিকং.

২৪. ‘‘পটিগ্গহেত্ৱা সম্বুদ্ধো, ৱিপস্সী লোকনাযকো;

উপসিঙ্ঘি মহাৱীৰো, পেক্খমানায মে তদা.

২৫. ‘‘অঞ্জলিং পগ্গহেত্ৱান, ৱন্দিত্ৱা দ্ৱিপদুত্তমং [দিপদুত্তমং (সী. স্যা. পী.)];

সকং চিত্তং পসাদেত্ৱা, ততো পব্বতমাৰুহিং.

২৬. ‘‘একনৱুতিতো কপ্পে, যং পুপ্ফমদদিং তদা;

দুগ্গতিং নাভিজানামি, বুদ্ধপূজাযিদং ফলং.

২৭. ‘‘কিলেসা ঝাপিতা ময্হং…পে… ৱিহৰামি অনাসৱা.

২৮. ‘‘স্ৱাগতং ৱত মে আসি…পে… কতং বুদ্ধস্স সাসনং.

২৯. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং সড়লপুপ্ফিকা ভিক্খুনী ইমা গাথাযো অভাসিত্থাতি.

সড়লপুপ্ফিকাথেৰিযাপদানং দুতিযং.

৩. মোদকদাযিকাথেৰীঅপদানং

৩০. ‘‘নগৰে বন্ধুমতিযা, কুম্ভদাসী অহোসহং;

মম ভাগং গহেত্ৱান, গচ্ছং উদকহাৰিকা [উদকহাৰিকং (সী.), উদকহাৰিকে (স্যা.)].

৩১. ‘‘পন্থম্হি সমণং দিস্ৱা, সন্তচিত্তং সমাহতং;

পসন্নচিত্তা সুমনা, মোদকে তীণিদাসহং.

৩২. ‘‘তেন কম্মেন সুকতেন, চেতনাপণিধীহি চ;

একনৱুতিকপ্পানি [একূনতিংসকপ্পানি (স্যা.)], ৱিনিপাতং নগচ্ছহং.

৩৩. ‘‘সম্পত্তি তং [সম্পত্তিঞ্চ (স্যা.), সম্পত্তিকং (ক.)] কৰিত্ৱান, সব্বং অনুভৱিং অহং;

মোদকে তীণি দত্ৱান, পত্তাহং অচলং পদং.

৩৪. ‘‘কিলেসা ঝাপিতা ময্হং…পে… ৱিহৰামি অনাসৱা.

৩৫. ‘‘স্ৱাগতং ৱত মে আসি…পে… কতং বুদ্ধস্স সাসনং.

৩৬. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং মোদকদাযিকা ভিক্খুনী ইমা গাথাযো অভাসিত্থাতি.

মোদকদাযিকাথেৰিযাপদানং ততিযং.

৪. একাসনদাযিকাথেৰীঅপদানং

৩৭. ‘‘নগৰে হংসৱতিযা, অহোসিং বালিকা [মালিকা (স্যা. পী.)] তদা;

মাতা চ মে পিতা চেৱ, কম্মন্তং অগমংসু তে.

৩৮. ‘‘মজ্ঝন্হিকম্হি সূৰিযে, অদ্দসং সমণং অহং;

ৱীথিযা অনুগচ্ছন্তং, আসনং পঞ্ঞপেসহং.

৩৯. ‘‘গোনকাৱিকতিকাহি [গোনকচিত্তকাদীহি (সী.)], পঞ্ঞপেত্ৱা মমাসনং;

পসন্নচিত্তা সুমনা, ইদং ৱচনমব্ৰৱিং.

৪০. ‘‘‘সন্তত্তা কুথিতা ভূমি, সূৰো মজ্ঝন্হিকে ঠিতো;

মালুতা চ ন ৱাযন্তি, কালো চেৱেত্থ মেহিতি [চেত্থ উপট্ঠিতো (সী.), চেৱত্থং এতি তং (পী.)].

৪১. ‘‘‘পঞ্ঞত্তমাসনমিদং, তৱত্থায মহামুনি;

অনুকম্পং উপাদায, নিসীদ মম আসনে’.

৪২. ‘‘নিসীদি তত্থ সমণো, সুদন্তো সুদ্ধমানসো;

তস্স পত্তং গহেত্ৱান, যথাৰন্ধং অদাসহং.

৪৩. ‘‘তেন কম্মেন সুকতেন, চেতনাপণিধীহি চ;

জহিত্ৱা মানুসং দেহং, তাৱতিংসমগচ্ছহং.

৪৪. ‘‘তত্থ মে সুকতং ব্যম্হং, আসনেন সুনিম্মিতং;

সট্ঠিযোজনমুব্বেধং, তিংসযোজনৱিত্থতং.

৪৫. ‘‘সোণ্ণমযা মণিমযা, অথোপি ফলিকামযা;

লোহিতঙ্গমযা চেৱ, পল্লঙ্কা ৱিৱিধা মম.

৪৬. ‘‘তূলিকা ৱিকতিকাহি, কট্টিস্সচিত্তকাহি চ;

উদ্দএকন্তলোমী চ, পল্লঙ্কা মে সুসণ্ঠিতা [সুসন্থতা (সী.)].

৪৭. ‘‘যদা ইচ্ছামি গমনং, হাসখিড্ডসমপ্পিতা;

সহ পল্লঙ্কসেট্ঠেন, গচ্ছামি মম পত্থিতং.

৪৮. ‘‘অসীতি দেৱৰাজূনং, মহেসিত্তমকাৰযিং;

সত্ততি চক্কৱত্তীনং, মহেসিত্তমকাৰযিং.

৪৯. ‘‘ভৱাভৱে সংসৰন্তী, মহাভোগং লভামহং;

ভোগে মে ঊনতা নত্থি, একাসনস্সিদং ফলং [একাসনফলং ইদং (সব্বত্থ) এৱমুপৰিপি].

৫০. ‘‘দুৱে ভৱে সংসৰামি, দেৱত্তে অথ মানুসে;

অঞ্ঞে ভৱে ন জানামি, একাসনস্সিদং ফলং.

৫১. ‘‘দুৱে কুলে পজাযামি, খত্তিযে চাপি ব্ৰাহ্মণে;

উচ্চাকুলীনা [উচ্চাকুলিকা (স্যা. পী. ক.)] সব্বত্থ, একাসনস্সিদং ফলং.

৫২. ‘‘দোমনস্সং ন জানামি, চিত্তসন্তাপনং মম;

ৱেৱণ্ণিযং ন জানামি, একাসনস্সিদং ফলং.

৫৩. ‘‘ধাতিযো মং উপট্ঠন্তি, খুজ্জা চেলাপিকা [খেলাপিকা (সী.), চেলাৱিকা (পী.)] বহূ;

অঙ্কেন অঙ্কং গচ্ছামি, একাসনস্সিদং ফলং.

৫৪. ‘‘অঞ্ঞা ন্হাপেন্তি ভোজেন্তি, অঞ্ঞা ৰমেন্তি মং সদা;

অঞ্ঞা গন্ধং ৱিলিম্পন্তি, একাসনস্সিদং ফলং [অঞ্ঞা মমেৱ ন্হাপেন্তি, অঞ্ঞা ভোজেন্তি ভোজনং; অঞ্ঞা মং অলঙ্কৰোন্তি, অঞ্ঞা ৰমেন্তি মং সদ্ধা; (স্যা.)].

৫৫. ‘‘মণ্ডপে ৰুক্খমূলে ৱা, সুঞ্ঞাগাৰে ৱসন্তিযা;

মম সঙ্কপ্পমঞ্ঞায, পল্লঙ্কো উপতিট্ঠতি.

৫৬. ‘‘অযং পচ্ছিমকো ময্হং, চৰিমো ৱত্ততে ভৱো;

অজ্জাপি ৰজ্জং ছড্ডেত্ৱা, পব্বজিং অনগাৰিযং.

৫৭. ‘‘সতসহস্সিতো কপ্পে, যং দানমদদিং তদা;

দুগ্গতিং নাভিজানামি, একাসনস্সিদং ফলং.

৫৮. ‘‘কিলেসা ঝাপিতা ময্হং…পে… ৱিহৰামি অনাসৱা.

৫৯. ‘‘স্ৱাগতং ৱত মে আসি…পে… কতং বুদ্ধস্স সাসনং.

৬০. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং একাসনদাযিকা ভিক্খুনী ইমা গাথাযো অভাসিত্থাতি.

একাসনদাযিকাথেৰিযাপদানং চতুত্থং.

৫. পঞ্চদীপদাযিকাথেৰীঅপদানং

৬১. ‘‘নগৰে হংসৱতিযা, চাৰিকী [চাৰিকা (সী. স্যা.)] আসহং তদা;

আৰামেন চ আৰামং [আৰামেন ৱিহাৰেন (স্যা. পী.)], চৰামি কুসলত্থিকা.

৬২. ‘‘কাড়পক্খম্হি দিৱসে, অদ্দসং বোধিমুত্তমং;

তত্থ চিত্তং পসাদেত্ৱা, বোধিমূলে নিসীদহং.

৬৩. ‘‘গৰুচিত্তং উপট্ঠেত্ৱা, সিৰে কত্ৱান অঞ্জলিং;

সোমনস্সং পৱেদেত্ৱা, এৱং চিন্তেসি তাৱদে.

৬৪. ‘‘‘যদি বুদ্ধো অমিতগুণো, অসমপ্পটিপুগ্গলো;

দস্সেতু পাটিহীৰং মে, বোধি ওভাসতু অযং’.

৬৫. ‘‘সহ আৱজ্জিতে ময্হং, বোধি পজ্জলি তাৱদে;

সব্বসোণ্ণমযা আসি, দিসা সব্বা ৱিৰোচতি.

৬৬. ‘‘সত্তৰত্তিন্দিৱং তত্থ, বোধিমূলে নিসীদহং;

সত্তমে দিৱসে পত্তে, দীপপূজং অকাসহং.

৬৭. ‘‘আসনং পৰিৱাৰেত্ৱা, পঞ্চ দীপানি পজ্জলুং;

যাৱ উদেতি সূৰিযো, দীপা মে পজ্জলুং তদা.

৬৮. ‘‘তেন কম্মেন সুকতেন, চেতনাপণিধীহি চ;

জহিত্ৱা মানুসং দেহং, তাৱতিংসমগচ্ছহং.

৬৯. ‘‘তত্থ মে সুকতং ব্যম্হং, পঞ্চদীপাতি ৱুচ্চতি;

সট্ঠিযোজনমুব্বেধং, তিংসযোজনৱিত্থতং.

৭০. ‘‘অসঙ্খিযানি দীপানি, পৰিৱাৰে জলিংসু মে;

যাৱতা দেৱভৱনং, দীপালোকেন জোততি.

৭১. ‘‘পৰম্মুখা [পুব্বমুখা (স্যা.)] নিসীদিত্ৱা, যদি ইচ্ছামি পস্সিতুং;

উদ্ধং অধো চ তিৰিযং, সব্বং পস্সামি চক্খুনা.

৭২. ‘‘যাৱতা অভিকঙ্খামি, দট্ঠুং সুগতদুগ্গতে [সুকতদুক্কটে (পী.)];

তত্থ আৱৰণং নত্থি, ৰুক্খেসু পব্বতেসু ৱা.

৭৩. ‘‘অসীতি দেৱৰাজূনং, মহেসিত্তমকাৰযিং;

সতানং চক্কৱত্তীনং, মহেসিত্তমকাৰযিং.

৭৪. ‘‘যং যং যোনুপপজ্জামি, দেৱত্তং অথ মানুসং;

দীপসতসহস্সানি, পৰিৱাৰে জলন্তি মে.