১০. পটাচাৰাথেৰীঅপদানং

৪৬৮. ‘‘পদুমুত্তৰো নাম জিনো, সব্বধম্মান পাৰগূ;

ইতো সতসহস্সম্হি, কপ্পে উপ্পজ্জি নাযকো.

৪৬৯. ‘‘তদাহং হংসৱতিযং, জাতা সেট্ঠিকুলে অহুং;

নানাৰতনপজ্জোতে, মহাসুখসমপ্পিতা.

৪৭০. ‘‘উপেত্ৱা তং মহাৱীৰং, অস্সোসিং ধম্মদেসনং;

ততো জাতপসাদাহং, উপেসিং সৰণং জিনং.

৪৭১. ‘‘ততো ৱিনযধাৰীনং, অগ্গং ৱণ্ণেসি নাযকো;

ভিক্খুনিং লজ্জিনিং তাদিং, কপ্পাকপ্পৱিসাৰদং.

৪৭২. ‘‘তদা মুদিতচিত্তাহং, তং ঠানমভিকঙ্খিনী;

নিমন্তেত্ৱা দসবলং, সসঙ্ঘং লোকনাযকং.

৪৭৩. ‘‘ভোজযিত্ৱান সত্তাহং, দদিত্ৱাৱ তিচীৱৰং [দদিত্ৱা পত্তচীৱৰং (স্যা.)];

নিপচ্চ সিৰসা পাদে, ইদং ৱচনমব্ৰৱিং.

৪৭৪. ‘‘‘যা তযা ৱণ্ণিতা ৱীৰ, ইতো অট্ঠমকে মুনি;

তাদিসাহং ভৱিস্সামি, যদি সিজ্ঝতি নাযক’.

৪৭৫. ‘‘তদা অৱোচ মং সত্থা, ‘ভদ্দে মা ভাযি অস্সস;

অনাগতম্হি অদ্ধানে, লচ্ছসে তং মনোৰথং.

৪৭৬. ‘‘‘সতসহস্সিতো কপ্পে, ওক্কাককুলসম্ভৱো;

গোতমো নাম গোত্তেন, সত্থা লোকে ভৱিস্সতি.

৪৭৭. ‘‘‘তস্স ধম্মেসু দাযাদা, ওৰসা ধম্মনিম্মিতা;

পটাচাৰাতি নামেন, হেস্সতি সত্থু সাৱিকা’.

৪৭৮. ‘‘তদাহং মুদিতা [পমুদী (ক.)] হুত্ৱা, যাৱজীৱং তদা জিনং;

মেত্তচিত্তা পৰিচৰিং, সসঙ্ঘং লোকনাযকং.

৪৭৯. ‘‘তেন কম্মেন সুকতেন, চেতনাপণিধীহি চ;

জহিত্ৱা মানুসং দেহং, তাৱতিংসমগচ্ছহং.

৪৮০. ‘‘ইমম্হি ভদ্দকে কপ্পে, ব্ৰহ্মবন্ধু মহাযসো;

কস্সপো নাম গোত্তেন, উপ্পজ্জি ৱদতং ৱৰো.

৪৮১. ‘‘উপট্ঠাকো মহেসিস্স, তদা আসি নৰিস্সৰো;

কাসিৰাজা কিকী নাম, বাৰাণসিপুৰুত্তমে.

৪৮২. ‘‘তস্সাসিং ততিযা ধীতা, ভিক্খুনী ইতি ৱিস্সুতা;

ধম্মং সুত্ৱা জিনগ্গস্স, পব্বজ্জং সমৰোচযিং.

৪৮৩. ‘‘অনুজানি ন নো তাতো, অগাৰেৱ তদা মযং;

ৱীসৱস্সসহস্সানি, ৱিচৰিম্হ অতন্দিতা.

৪৮৪. ‘‘কোমাৰিব্ৰহ্মচৰিযং, ৰাজকঞ্ঞা সুখেধিতা;

বুদ্ধোপট্ঠাননিৰতা, মুদিতা সত্তধীতৰো.

৪৮৫. ‘‘সমণী সমণগুত্তা চ, ভিক্খুনী ভিক্খুদাযিকা;

ধম্মা চেৱ সুধম্মা চ, সত্তমী সঙ্ঘদাযিকা.

৪৮৬. ‘‘অহং উপ্পলৱণ্ণা চ, খেমা ভদ্দা চ ভিক্খুনী;

কিসাগোতমী ধম্মদিন্না, ৱিসাখা হোতি সত্তমী.

৪৮৭. ‘‘তেহি কম্মেহি সুকতেহি, চেতনাপণিধীহি চ;

জহিত্ৱা মানুসং দেহং, তাৱতিংসমগচ্ছহং.

৪৮৮. ‘‘পচ্ছিমে চ ভৱে দানি, জাতা সেট্ঠিকুলে অহং;

সাৱত্থিযং পুৰৱৰে, ইদ্ধে ফীতে মহদ্ধনে.

৪৮৯. ‘‘যদা চ যোব্বনূপেতা, ৱিতক্কৱসগা অহং;

নৰং জাৰপতিং দিস্ৱা, তেন সদ্ধিং অগচ্ছহং.

৪৯০. ‘‘একপুত্তপসূতাহং, দুতিযো কুচ্ছিযা মমং;

তদাহং মাতাপিতৰো, ওক্খামীতি [ইক্খামীতি (স্যা.), দক্খামীতি (সী.)] সুনিচ্ছিতা.

৪৯১. ‘‘নাৰোচেসিং পতিং ময্হং, তদা তম্হি পৱাসিতে;

একিকা নিগ্গতা গেহা, গন্তুং সাৱত্থিমুত্তমং.

৪৯২. ‘‘ততো মে সামি আগন্ত্ৱা, সম্ভাৱেসি পথে মমং;

তদা মে কম্মজা ৱাতা, উপ্পন্না অতিদাৰুণা.

৪৯৩. ‘‘উট্ঠিতো চ মহামেঘো, পসূতিসমযে মম;

দব্বত্থায তদা গন্ত্ৱা, সামি সপ্পেন মাৰিতো.

৪৯৪. ‘‘তদা ৱিজাতদুক্খেন, অনাথা কপণা অহং;

কুন্নদিং পূৰিতং দিস্ৱা, গচ্ছন্তী সকুলালযং.

৪৯৫. ‘‘বালং আদায অতৰিং, পাৰকূলে চ এককং;

সাযেত্ৱা [পাযেত্ৱা (স্যা.), পাতেত্ৱা (ক.)] বালকং পুত্তং, ইতৰং তৰণাযহং.

৪৯৬. ‘‘নিৱত্তা উক্কুসো হাসি, তৰুণং ৱিলপন্তকং;

ইতৰঞ্চ ৱহী সোতো, সাহং সোকসমপ্পিতা.

৪৯৭. ‘‘সাৱত্থিনগৰং গন্ত্ৱা, অস্সোসিং সজনে মতে;

তদা অৱোচং সোকট্টা, মহাসোকসমপ্পিতা.

৪৯৮. ‘‘উভো পুত্তা কালঙ্কতা, পন্থে ময্হং পতী মতো;

মাতা পিতা চ ভাতা চ, একচিতম্হি ডয্হৰে.

৪৯৯. ‘‘তদা কিসা চ পণ্ডু চ, অনাথা দীনমানসা;

ইতো ততো ভমন্তীহং [গচ্ছন্তীহং (স্যা.), গমেন্তীহং (ক.)], অদ্দসং নৰসাৰথিং.

৫০০. ‘‘ততো অৱোচ মং সত্থা, ‘পুত্তে মা সোচি অস্সস;

অত্তানং তে গৱেসস্সু, কিং নিৰত্থং ৱিহঞ্ঞসি.

৫০১. ‘‘‘ন সন্তি পুত্তা তাণায, ন ঞাতী নপি বন্ধৱা;

অন্তকেনাধিপন্নস্স, নত্থি ঞাতীসু তাণতা’.

৫০২. ‘‘তং সুত্ৱা মুনিনো ৱাক্যং, পঠমং ফলমজ্ঝগং;

পব্বজিত্ৱান নচিৰং, অৰহত্তমপাপুণিং.

৫০৩. ‘‘ইদ্ধীসু চ ৱসী হোমি, দিব্বায সোতধাতুযা;

পৰচিত্তানি জানামি, সত্থুসাসনকাৰিকা.

৫০৪. ‘‘পুব্বেনিৱাসং জানামি, দিব্বচক্খু ৱিসোধিতং;

খেপেত্ৱা আসৱে সব্বে, ৱিসুদ্ধাসিং সুনিম্মলা.

৫০৫. ‘‘ততোহং ৱিনযং সব্বং, সন্তিকে সব্বদস্সিনো;

উগ্গহিং সব্বৱিত্থাৰং, ব্যাহৰিঞ্চ যথাতথং.

৫০৬. ‘‘জিনো তস্মিং গুণে তুট্ঠো, এতদগ্গে ঠপেসি মং;

অগ্গা ৱিনযধাৰীনং, পটাচাৰাৱ একিকা.

৫০৭. ‘‘পৰিচিণ্ণো মযা সত্থা, কতং বুদ্ধস্স সাসনং;

ওহিতো গৰুকো ভাৰো, ভৱনেত্তি সমূহতা.

৫০৮. ‘‘যস্সত্থায পব্বজিতা, অগাৰস্মানগাৰিযং;

সো মে অত্থো অনুপ্পত্তো, সব্বসংযোজনক্খযো.

৫০৯. ‘‘কিলেসা ঝাপিতা ময্হং…পে… ৱিহৰামি অনাসৱা.

৫১০. ‘‘স্ৱাগতং ৱত মে আসি…পে… কতং বুদ্ধস্স সাসনং.

৫১১. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং পটাচাৰা ভিক্খুনী ইমা গাথাযো অভাসিত্থাতি.

পটাচাৰাথেৰিযাপদানং দসমং.

একূপোসথিকৱগ্গো দুতিযো.