৭. মহাপজাপতিগোতমীথেৰীঅপদানং

৯৭. ‘‘একদা লোকপজ্জোতো, ৱেসালিযং মহাৱনে;

কূটাগাৰে সুসালাযং, ৱসতে নৰসাৰথি.

৯৮. ‘‘তদা জিনস্স মাতুচ্ছা, মহাগোতমি ভিক্খুনী;

তহিং কতে [তহিংযেৱ (স্যা.)] পুৰে ৰম্মে, ৱসী ভিক্খুনুপস্সযে.

৯৯. ‘‘ভিক্খুনীহি ৱিমুত্তাহি, সতেহি সহ পঞ্চহি;

ৰহোগতায তস্সেৱং, চিতস্সাসি [চিত্তস্সাপি (স্যা.)] ৱিতক্কিতং.

১০০. ‘‘বুদ্ধস্স পৰিনিব্বানং, সাৱকগ্গযুগস্স ৱা;

ৰাহুলানন্দনন্দানং, নাহং লচ্ছামি পস্সিতুং.

১০১. ‘‘বুদ্ধস্স পৰিনিব্বানা, সাৱকগ্গযুগস্স ৱা;

মহাকস্সপনন্দানং, আনন্দৰাহুলান চ.

১০২. ‘‘পটিকচ্চাযুসঙ্খাৰং [পটিগচ্চাযুসঙ্খাৰে (সী.)], ওসজ্জিত্ৱান নিব্বুতিং;

গচ্ছেয্যং লোকনাথেন, অনুঞ্ঞাতা মহেসিনা.

১০৩. ‘‘তথা পঞ্চসতানম্পি, ভিক্খুনীনং ৱিতক্কিতং;

আসি খেমাদিকানম্পি, এতদেৱ ৱিতক্কিতং.

১০৪. ‘‘ভূমিচালো তদা আসি, নাদিতা দেৱদুন্দুভী;

উপস্সযাধিৱত্থাযো, দেৱতা সোকপীড়িতা.

১০৫. ‘‘ৱিলপন্তা সুকৰুণং [সকৰুণং (সী. স্যা. পী.)], তত্থস্সূনি পৱত্তযুং;

মিত্তা [সব্বা (স্যা. পী.)] ভিক্খুনিযো তাহি, উপগন্ত্ৱান গোতমিং.

১০৬. ‘‘নিপচ্চ সিৰসা পাদে, ইদং ৱচনমব্ৰৱুং;

‘তত্থ তোযলৱাসিত্তা, মযময্যে ৰহোগতা.

১০৭. ‘‘‘সা চলা চলিতা ভূমি, নাদিতা দেৱদুন্দুভী;

পৰিদেৱা চ সুয্যন্তে, কিমত্থং নূন গোতমী’.

১০৮. ‘‘তদা অৱোচ সা সব্বং, যথাপৰিৱিতক্কিতং;

তাযোপি সব্বা আহংসু, যথাপৰিৱিতক্কিতং.

১০৯. ‘‘‘যদি তে ৰুচিতং অয্যে, নিব্বানং পৰমং সিৱং;

নিব্বাযিস্সাম সব্বাপি, বুদ্ধানুঞ্ঞায সুব্বতে.

১১০. ‘‘‘মযং সহাৱ নিক্খন্তা, ঘৰাপি চ ভৱাপি চ;

সহাযেৱ গমিস্সাম, নিব্বানং পদমুত্তমং’.

১১১. ‘‘‘নিব্বানায ৱজন্তীনং, কিং ৱক্খামী’তি সা ৱদং;

সহ সব্বাহি নিগ্গঞ্ছি, ভিক্খুনীনিলযা তদা.

১১২. ‘‘উপস্সযে যাধিৱত্থা, দেৱতা তা খমন্তু মে;

ভিক্খুনীনিলযস্সেদং, পচ্ছিমং দস্সনং মম.

১১৩. ‘‘ন জৰা মচ্চু ৱা যত্থ, অপ্পিযেহি সমাগমো;

পিযেহি ন ৱিযোগোত্থি, তং ৱজিস্সং [তং ৱজ্জিযং (স্যা.)] অসঙ্খতং.

১১৪. ‘‘অৱীতৰাগা তং সুত্ৱা, ৱচনং সুগতোৰসা;

সোকট্টা পৰিদেৱিংসু, অহো নো অপ্পপুঞ্ঞতা.

১১৫. ‘‘ভিক্খুনীনিলযো সুঞ্ঞো, ভূতো তাহি ৱিনা অযং;

পভাতে ৱিয তাৰাযো, ন দিস্সন্তি জিনোৰসা.

১১৬. ‘‘নিব্বানং গোতমী যাতি, সতেহি সহ পঞ্চহি;

নদীসতেহিৱ সহ, গঙ্গা পঞ্চহি সাগৰং.

১১৭. ‘‘ৰথিযায ৱজন্তিযো [ৱজন্তিং তং (সী.), ৱজন্তি তং (স্যা.), ৱজন্তানং (পী.)], দিস্ৱা সদ্ধা উপাসিকা;

ঘৰা নিক্খম্ম পাদেসু, নিপচ্চ ইদমব্ৰৱুং.

১১৮. ‘‘‘পসীদস্সু মহাভোগে, অনাথাযো ৱিহায নো;

তযা ন যুত্তা [যুত্তং (সী. স্যা. পী.)] নিব্বাতুং, ইচ্ছট্টা ৱিলপিংসু তা’.

১১৯. ‘‘তাসং সোকপহানত্থং, অৱোচ মধুৰং গিৰং;

‘ৰুদিতেন অলং পুত্তা, হাসকালোযমজ্জ ৱো.

১২০. ‘‘‘পৰিঞ্ঞাতং মযা দুক্খং, দুক্খহেতু ৱিৱজ্জিতো;

নিৰোধো মে সচ্ছিকতো, মগ্গো চাপি সুভাৱিতো.

পঠমং ভাণৱাৰং.

১২১. ‘‘‘পৰিচিণ্ণো মযা সত্থা, কতং বুদ্ধস্স সাসনং;

ওহিতো গৰুকো ভাৰো, ভৱনেত্তি সমূহতা.

১২২. ‘‘‘যস্সত্থায পব্বজিতা, অগাৰস্মানগাৰিযং;

সো মে অত্থো অনুপ্পত্তো, সব্বসংযোজনক্খযো.

১২৩. ‘‘‘বুদ্ধো তস্স চ সদ্ধম্মো, অনূনো যাৱ তিট্ঠতি;

নিব্বাতুং তাৱ কালো মে, মা মং সোচথ পুত্তিকা.

১২৪. ‘‘‘কোণ্ডঞ্ঞানন্দনন্দাদী, তিট্ঠন্তি ৰাহুলো জিনো;

সুখিতো সহিতো সঙ্ঘো, হতদব্বা চ তিত্থিযা.

১২৫. ‘‘‘ওক্কাকৱংসস্স যসো, উস্সিতো মাৰমদ্দনো;

ননু সম্পতি কালো মে, নিব্বানত্থায পুত্তিকা.

১২৬. ‘‘‘চিৰপ্পভুতি যং ময্হং, পত্থিতং অজ্জ সিজ্ঝতে;

আনন্দভেৰিকালোযং, কিং ৱো অস্সূহি পুত্তিকা.

১২৭. ‘‘‘সচে মযি দযা অত্থি, যদি চত্থি কতঞ্ঞুতা;

সদ্ধম্মট্ঠিতিযা সব্বা, কৰোথ ৱীৰিযং দড়্হং.

১২৮. ‘‘‘থীনং অদাসি পব্বজ্জং, সম্বুদ্ধো যাচিতো মযা;

তস্মা যথাহং নন্দিস্সং, তথা তমনুতিট্ঠথ’.

১২৯. ‘‘তা এৱমনুসাসিত্ৱা, ভিক্খুনীহি পুৰক্খতা;

উপেচ্চ বুদ্ধং ৱন্দিত্ৱা, ইদং ৱচনমব্ৰৱি.

১৩০. ‘‘‘অহং সুগত তে মাতা, ত্ৱঞ্চ ৱীৰ পিতা মম;

সদ্ধম্মসুখদ [সদ্ধম্মসুখদো (সী. স্যা. পী.)] নাথ, তযা জাতাম্হি গোতম.

১৩১. ‘‘‘সংৱদ্ধিতোযং সুগত, ৰূপকাযো মযা তৱ;

অনিন্দিতো [আনন্দিযো (স্যা.), অনিন্দিযো (পী.)] ধম্মকাযো [ধম্মতনু (সী. পী. ক.)], মম সংৱদ্ধিতো তযা.

১৩২. ‘‘‘মুহুত্তং তণ্হাসমণং, খীৰং ত্ৱং পাযিতো মযা;

তযাহং সন্তমচ্চন্তং, ধম্মখীৰঞ্হি [ধম্মখীৰম্পি (স্যা., ক.)] পাযিতা.

১৩৩. ‘‘‘বন্ধনাৰক্খনে ময্হং, অণণো [অনণো (সী. স্যা. পী.)] ত্ৱং মহামুনে;

পুত্তকামা থিযো যাচং, লভন্তি তাদিসং সুতং.

১৩৪. ‘‘‘মন্ধাতাদিনৰিন্দানং, যা মাতা সা ভৱণ্ণৱে;

নিমুগ্গাহং তযা পুত্ত, তাৰিতা ভৱসাগৰা.

১৩৫. ‘‘‘ৰঞ্ঞো মাতা মহেসীতি, সুলভং নামমিত্থিনং;

বুদ্ধমাতাতি যং নামং, এতং পৰমদুল্লভং.

১৩৬. ‘‘‘তঞ্চ লদ্ধং মহাৱীৰ, পণিধানং মমং তযা;

অণুকং ৱা মহন্তং ৱা, তং সব্বং পূৰিতং মযা.

১৩৭. ‘‘‘পৰিনিব্বাতুমিচ্ছামি, ৱিহাযেমং কড়েৱৰং;

অনুজানাহি মে ৱীৰ, দুক্খন্তকৰ নাযক.

১৩৮. ‘‘‘চক্কঙ্কুসধজাকিণ্ণে, পাদে কমলকোমলে;

পসাৰেহি পণামং তে, কৰিস্সং পুত্তউত্তমে [পুত্তপেমসা (সী. পী.), পুত্তপেমহং (স্যা.)].

১৩৯. ‘‘‘সুৱণ্ণৰাসিসঙ্কাসং, সৰীৰং কুৰু পাকটং;

কত্ৱা দেহং সুদিট্ঠং তে, সন্তিং গচ্ছামি নাযক’.

১৪০. ‘‘দ্ৱত্তিংসলক্খণূপেতং, সুপ্পভালঙ্কতং তনুং;

সঞ্ঝাঘনাৱ বালক্কং, মাতুচ্ছং দস্সযী জিনো.

১৪১. ‘‘ফুল্লাৰৱিন্দসংকাসে, তৰুণাদিচ্চসপ্পভে;

চক্কঙ্কিতে পাদতলে, ততো সা সিৰসা পতি.

১৪২. ‘‘‘পণমামি নৰাদিচ্চ, আদিচ্চকুলকেতুকং;

পচ্ছিমে মৰণে ময্হং [সৰণং ময্হং (স্যা.)], ন তং ইক্খামহং পুনো.

১৪৩. ‘‘‘ইত্থিযো নাম লোকগ্গ, সব্বদোসাকৰা মতা;

যদি কো চত্থি দোসো মে, খমস্সু কৰুণাকৰ.

১৪৪. ‘‘‘ইত্থিকানঞ্চ পব্বজ্জং, হং তং যাচিং পুনপ্পুনং;

তত্থ চে অত্থি দোসো মে, তং খমস্সু নৰাসভ.

১৪৫. ‘‘‘মযা ভিক্খুনিযো ৱীৰ, তৱানুঞ্ঞায সাসিতা;

তত্ৰ চে অত্থি দুন্নীতং, তং খমস্সু খমাধিপ [খমাধিতি (স্যা.), খমাপিতো (ক.)].

১৪৬. ‘‘‘অক্খন্তে নাম খন্তব্বং, কিং ভৱে গুণভূসনে;

কিমুত্তৰং তে ৱক্খামি, নিব্বানায ৱজন্তিযা.

১৪৭. ‘‘‘সুদ্ধে অনূনে মম ভিক্খুসঙ্ঘে, লোকা ইতো নিস্সৰিতুং খমন্তে;

পভাতকালে ব্যসনঙ্গতানং, দিস্ৱান নিয্যাতিৱ চন্দলেখা’.

১৪৮. ‘‘‘তদেতৰা ভিক্খুনিযো জিনগ্গং, তাৰাৱ চন্দানুগতা সুমেৰুং;

পদক্খিণং কচ্চ নিপচ্চ পাদে, ঠিতা মুখন্তং সমুদিক্খমানা.

১৪৯. ‘‘‘ন তিত্তিপুব্বং তৱ দস্সনেন, চক্খুং ন সোতং তৱ ভাসিতেন;

চিত্তং মমং কেৱলমেকমেৱ, পপ্পুয্য তং ধম্মৰসেন তিত্তি.

১৫০. ‘‘‘নদতো পৰিসাযং তে, ৱাদিতব্বপহাৰিনো;

যে তে দক্খন্তি ৱদনং, ধঞ্ঞা তে নৰপুঙ্গৱ.

১৫১. ‘‘‘দীঘঙ্গুলী তম্বনখে, সুভে আযতপণ্হিকে;

যে পাদে পণমিস্সন্তি [পণমাযন্তি (স্যা.)], তেপি ধঞ্ঞা গুণন্ধৰ.

১৫২. ‘‘‘মধুৰানি পহট্ঠানি, দোসগ্ঘানি হিতানি চ;

যে তে ৱাক্যানি সুয্যন্তি, তেপি ধঞ্ঞা নৰুত্তম.

১৫৩. ‘‘‘ধঞ্ঞাহং তে মহাৱীৰ, পাদপূজনতপ্পৰা [মানপূজনতপ্পৰা (ক.)];

তিণ্ণসংসাৰকন্তাৰা, সুৱাক্যেন সিৰীমতো’.

১৫৪. ‘‘ততো সা অনুসাৱেত্ৱা [অনুমানে ত্ৱা (ক.)], ভিক্খুসঙ্ঘম্পি সুব্বতা;

ৰাহুলানন্দনন্দে চ, ৱন্দিত্ৱা ইদমব্ৰৱি.

১৫৫. ‘‘‘আসীৱিসালযসমে, ৰোগাৱাসে কড়েৱৰে;

নিব্বিন্দা দুক্খসঙ্ঘাটে, জৰামৰণগোচৰে.

১৫৬. ‘‘‘নানাকলিমলাকিণ্ণে [নানাকুণপমলাকিণ্ণে (স্যা.), নানাকাড়মলাকিণ্ণে (ক.)], পৰাযত্তে নিৰীহকে;

তেন নিব্বাতুমিচ্ছামি, অনুমঞ্ঞথ পুত্তকা’.

১৫৭. ‘‘নন্দো ৰাহুলভদ্দো চ, ৱীতসোকা নিৰাসৱা;

ঠিতাচলট্ঠিতি থিৰা, ধম্মতমনুচিন্তযুং.

১৫৮. ‘‘‘ধিৰত্থু সঙ্খতং লোলং, অসাৰং কদলূপমং;

মাযামৰীচিসদিসং, ইতৰং অনৱট্ঠিতং.

১৫৯. ‘‘‘যত্থ নাম জিনস্সাযং, মাতুচ্ছা বুদ্ধপোসিকা;

গোতমী নিধনং যাতি, অনিচ্চং সব্বসঙ্খতং’.

১৬০. ‘‘আনন্দো চ তদা সেখো, সোকট্টো [কনিট্ঠো (স্যা.)] জিনৱচ্ছলো;

তত্থস্সূনি কৰোন্তো সো, কৰুণং পৰিদেৱতি.

১৬১. ‘‘হা সন্তিং [ভাসন্তী (স্যা.)] গোতমী যাতি, নূন বুদ্ধোপি নিব্বুতিং;

গচ্ছতি ন চিৰেনেৱ, অগ্গিৰিৱ নিৰিন্ধনো.

১৬২. ‘‘এৱং ৱিলাপমানং তং, আনন্দং আহ গোতমী;

সুতসাগৰগম্ভীৰ, বুদ্ধোপট্ঠানতপ্পৰ.

১৬৩. ‘‘‘ন যুত্তং সোচিতুং পুত্ত, হাসকালে উপট্ঠিতে;

তযা মে সৰণং পুত্ত, নিব্বানং তমুপাগতং.

১৬৪. ‘‘‘তযা তাত সমজ্ঝিট্ঠো, পব্বজ্জং অনুজানি নো;

মা পুত্ত ৱিমনো হোহি, সফলো তে পৰিস্সমো.

১৬৫. ‘‘‘যং ন দিট্ঠং পুৰাণেহি, তিত্থিকাচৰিযেহিপি;

তং পদং সুকুমাৰীহি, সত্তৱস্সাহি ৱেদিতং.

১৬৬. ‘‘‘বুদ্ধসাসনপালেত, পচ্ছিমং দস্সনং তৱ;

তত্থ গচ্ছামহং পুত্ত, গতো যত্থ ন দিস্সতে.

১৬৭. ‘‘‘কদাচি ধম্মং দেসেন্তো, খিপী লোকগ্গনাযকো;

তদাহং আসীসৱাচং, অৱোচং অনুকম্পিকা.

১৬৮. ‘‘‘চিৰং জীৱ মহাৱীৰ, কপ্পং তিট্ঠ মহামুনে;

সব্বলোকস্স অত্থায, ভৱস্সু অজৰামৰো.

১৬৯. ‘‘‘তং তথাৱাদিনিং বুদ্ধো, মমং সো এতদব্ৰৱি;

‘ন হেৱং ৱন্দিযা বুদ্ধা, যথা ৱন্দসি গোতমী.

১৭০. ‘‘‘কথং চৰহি সব্বঞ্ঞূ, ৱন্দিতব্বা তথাগতা;

কথং অৱন্দিযা বুদ্ধা, তং মে অক্খাহি পুচ্ছিতো.