৬. নড়মালিকাথেৰীঅপদানং

৮৬. ‘‘চন্দভাগানদীতীৰে, অহোসিং কিন্নৰী তদা;

অদ্দসং ৱিৰজং বুদ্ধং, সযম্ভুং অপৰাজিতং.

৮৭. ‘‘পসন্নচিত্তা সুমনা, ৱেদজাতা কতঞ্জলী;

নড়মালং গহেত্ৱান, সযম্ভুং অভিপূজযিং.

৮৮. ‘‘তেন কম্মেন সুকতেন, চেতনাপণিধীহি চ;

জহিত্ৱা কিন্নৰীদেহং [মানসং দেহং (সী. পী. ক.) সুমেধাৱগ্গেপি], তাৱতিংসমগচ্ছহং.

৮৯. ‘‘ছত্তিংসদেৱৰাজূনং, মহেসিত্তমকাৰযিং;

মনসা পত্থিতং ময্হং, নিব্বত্ততি যথিচ্ছিতং.

৯০. ‘‘দসন্নং চক্কৱত্তীনং, মহেসিত্তমকাৰযিং;

ওচিতত্তাৱ [সুচিতত্তাৱ (পী.)] হুত্ৱান, সংসৰামি ভৱেস্ৱহং.

৯১. ‘‘কুসলং ৱিজ্জতে ময্হং, পব্বজিং অনগাৰিযং;

পূজাৰহা অহং অজ্জ, সক্যপুত্তস্স সাসনে.

৯২. ‘‘ৱিসুদ্ধমনসা অজ্জ, অপেতমনপাপিকা;

সব্বাসৱপৰিক্খীণা, নত্থি দানি পুনব্ভৱো.

৯৩. ‘‘চতুন্নৱুতিতো কপ্পে, যং বুদ্ধমভিপূজযিং;

দুগ্গতিং নাভিজানামি, নড়মালাযিদং ফলং.

৯৪. ‘‘কিলেসা ঝাপিতা ময্হং…পে… ৱিহৰামি অনাসৱা.

৯৫. ‘‘স্ৱাগতং ৱত মে আসি…পে… কতং বুদ্ধস্স সাসনং.

৯৬. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং নড়মালিকা ভিক্খুনী ইমা গাথাযো অভাসিত্থাতি.

নড়মালিকাথেৰিযাপদানং ছট্ঠং.