৯. পঞ্চদীপিকাথেৰীঅপদানং

৯১. ‘‘নগৰে হংসৱতিযা, চাৰিকী [চাৰিনিং (স্যা.)] আসহং তদা;

আৰামেন চ আৰামং, চৰামি কুসলত্থিকা.

৯২. ‘‘কাড়পক্খম্হি দিৱসে, অদ্দসং বোধিমুত্তমং;

তত্থ চিত্তং পসাদেত্ৱা, বোধিমূলে নিসীদহং.

৯৩. ‘‘গৰুচিত্তং উপট্ঠেত্ৱা, সিৰে কত্ৱান অঞ্জলিং;

সোমনস্সং পৱেদেত্ৱা, এৱং চিন্তেসি তাৱদে.

৯৪. ‘‘‘যদি বুদ্ধো অমিতগুণো, অসমপ্পটিপুগ্গলো;

দস্সেতু পাটিহীৰং মে, বোধি ওভাসতু অযং’.

৯৫. ‘‘সহ আৱজ্জিতে ময্হং, বোধি পজ্জলি তাৱদে;

সব্বসোণ্ণমযা আসি, দিসা সব্বা ৱিৰোচতি.

৯৬. ‘‘সত্তৰত্তিন্দিৱং [সত্তৰত্তিদিৱং (পী. ক.)] তত্থ, বোধিমূলে নিসীদহং;

সত্তমে দিৱসে পত্তে, দীপপূজং অকাসহং.

৯৭. ‘‘আসনং পৰিৱাৰেত্ৱা, পঞ্চদীপানি পজ্জলুং;

যাৱ উদেতি সূৰিযো, দীপা মে পজ্জলুং তদা.

৯৮. ‘‘তেন কম্মেন সুকতেন, চেতনাপণিধীহি চ;

জহিত্ৱা মানুসং দেহং, তাৱতিংসমগচ্ছহং.

৯৯. ‘‘তত্থ মে সুকতং ব্যম্হং, পঞ্চদীপাতি ৱুচ্চতি;

সট্ঠিযোজনমুব্বেধং [সতযোজনমুব্বেধং (সী. স্যা. পী.)], তিংসযোজনৱিত্থতং [সট্ঠি… (স্যা. পী.)].

১০০. ‘‘অসঙ্খিযানি দীপানি, পৰিৱাৰে জলন্তি মে;

যাৱতা দেৱভৱনং, দীপালোকেন জোততি.

১০১. ‘‘পৰম্মুখা নিসীদিত্ৱা [পুৰত্থাভিমুখা সন্তি (স্যা.), পুৰত্থাভিমুখা থিতা (পী.)], যদি ইচ্ছামি পস্সিতুং;

উদ্ধং অধো চ তিৰিযং, সব্বং পস্সামি চক্খুনা.

১০২. ‘‘যাৱতা অভিকঙ্খামি, দট্ঠুং সুগতদুগ্গতে [সুকতদুক্কতে (পী.];

তত্থ আৱৰণং নত্থি, ৰুক্খেসু পব্বতেসু ৱা.

১০৩. ‘‘অসীতি দেৱৰাজূনং, মহেসিত্তমকাৰযিং;

সতানং চক্কৱত্তীনং, মহেসিত্তমকাৰযিং.

১০৪. ‘‘যং যং যোনুপপজ্জামি, দেৱত্তং অথ মানুসং;

দীপসতসহস্সানি, পৰিৱাৰে জলন্তি মে.

১০৫. ‘‘দেৱলোকা চৱিত্ৱান, উপ্পজ্জিং মাতুকুচ্ছিযং;

মাতুকুচ্ছিগতা সন্তী [মাতুকুচ্ছিগতং সন্তিং (সী.)], অক্খি মে ন নিমীলতি.

১০৬. ‘‘দীপসতসহস্সানি, পুঞ্ঞকম্মসমঙ্গিতা;

জলন্তি সূতিকাগেহে [সূতিঘৰে পজ্জলন্তি (সব্বত্থ)], পঞ্চদীপানিদং ফলং.

১০৭. ‘‘পচ্ছিমে ভৱে সম্পত্তে, মানসং ৱিনিৱত্তযিং;

অজৰামতং সীতিভাৱং, নিব্বানং ফস্সযিং অহং.

১০৮. ‘‘জাতিযা সত্তৱস্সাহং, অৰহত্তমপাপুণিং;

উপসম্পাদযী বুদ্ধো, গুণমঞ্ঞায গোতমো.

১০৯. ‘‘মণ্ডপে ৰুক্খমূলে ৱা, পাসাদেসু গুহাসু ৱা;

সুঞ্ঞাগাৰে ৱসন্তিযা [চ ঝাযন্তে (সী.), চ ঝাযন্তা (পী.), পজ্ঝাযন্তা (স্যা.)], পঞ্চদীপা জলন্তি মে.

১১০. ‘‘দিব্বচক্খু ৱিসুদ্ধং মে, সমাধিকুসলা অহং;

অভিঞ্ঞাপাৰমিপ্পত্তা, পঞ্চদীপানিদং ফলং.

১১১. ‘‘সব্বৱোসিতৱোসানা, কতকিচ্চা অনাসৱা;

পঞ্চদীপা মহাৱীৰ, পাদে ৱন্দামি [ৱন্দতি (সী. ক.)] চক্খুম.

১১২. ‘‘সতসহস্সিতো কপ্পে, যং দীপমদদিং তদা;

দুগ্গতিং নাভিজানামি, পঞ্চদীপানিদং ফলং.

১১৩. ‘‘কিলেসা ঝাপিতা ময্হং…পে… ৱিহৰামি অনাসৱা.

১১৪. ‘‘স্ৱাগতং ৱত মে আসি…পে… কতং বুদ্ধস্স সাসনং.

১১৫. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং পঞ্চদীপিকা ভিক্খুনী ইমা গাথাযো অভাসিত্থাতি.

পঞ্চদীপিকাথেৰিযাপদানং নৱমং.