১০. উদকদাযিকাথেৰীঅপদানং

১১৬. ‘‘নগৰে বন্ধুমতিযা, অহোসিং উদহাৰিকা;

উদহাৰেন জীৱামি, তেন পোসেমি দাৰকে.

১১৭. ‘‘দেয্যধম্মো চ মে নত্থি, পুঞ্ঞক্খেত্তে অনুত্তৰে;

কোট্ঠকং উপসঙ্কম্ম, উদকং পট্ঠপেসহং.

১১৮. ‘‘তেন কম্মেন সুকতেন, তাৱতিংসমগচ্ছহং;

তত্থ মে সুকতং ব্যম্হং, উদহাৰেন নিম্মিতং.

১১৯. ‘‘অচ্ছৰানং সহস্সস্স, অহঞ্হি পৱৰা তদা;

দসট্ঠানেহি তা সব্বা, অভিভোমি সদা অহং.

১২০. ‘‘পঞ্ঞাসং দেৱৰাজূনং, মহেসিত্তমকাৰযিং;

ৱীসতিচক্কৱত্তীনং, মহেসিত্তমকাৰযিং.

১২১. ‘‘দুৱে ভৱে সংসৰামি, দেৱত্তে অথ মানুসে;

দুগ্গতিং নাভিজানামি, দকদানস্সিদং ফলং.

১২২. ‘‘পব্বতগ্গে দুমগ্গে ৱা, অন্তলিক্খে চ ভূমিযং;

যদা উদকমিচ্ছামি, খিপ্পং পটিলভামহং.

১২৩. ‘‘অৱুট্ঠিকা দিসা নত্থি, সন্তত্তা কুথিতাপি [সন্তত্তা কুথিতা ন চ (সী. পী.), সন্তত্তা খুপ্পিতা হি মে (স্যা.)] চ;

মম সঙ্কপ্পমঞ্ঞায, মহামেঘো পৱস্সতি.

১২৪. ‘‘কদাচি নীযমানায, ঞাতিসঙ্ঘেন মে তদা;

যদা ইচ্ছামহং ৱস্সং, মহামেঘো অজাযথ.

১২৫. ‘‘উণ্হং ৱা পৰিড়াহো ৱা, সৰীৰে মে ন ৱিজ্জতি;

কাযে চ মে ৰজো নত্থি, দকদানস্সিদং ফলং.

১২৬. ‘‘ৱিসুদ্ধমনসা অজ্জ, অপেতমনপাপিকা;

সব্বাসৱপৰিক্খীণা, নত্থি দানি পুনব্ভৱো.

১২৭. ‘‘একনৱুতিতো কপ্পে, যং দকং অদদিং তদা;

দুগ্গতিং নাভিজানামি, দকদানস্সিদং ফলং.

১২৮. ‘‘কিলেসা ঝাপিতা ময্হং…পে… ৱিহৰামি অনাসৱা.

১২৯. ‘‘স্ৱাগতং ৱত মে আসি…পে… কতং বুদ্ধস্স সাসনং.

১৩০. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং উদকদাযিকা ভিক্খুনী ইমা গাথাযো অভাসিত্থাতি.

উদকদাযিকাথেৰিযাপদানং দসমং.

সুমেধাৱগ্গো পঠমো.