১. সুমেধাথেৰীঅপদানং

অথ থেৰিকাপদানানি সুণাথ –

১. ‘‘ভগৱতি কোণাগমনে, সঙ্ঘাৰামম্হি নৱনিৱেসনম্হি [নিৱেসম্হি (স্যা.)];

সখিযো তিস্সো জনিযো, ৱিহাৰদানং অদাসিম্হ.

২. ‘‘দসক্খত্তুং সতক্খত্তুং, দসসতক্খত্তুং সতানঞ্চ সতক্খত্তুং [সতানি চ সত্তক্খত্তুং (সী. ক.)];

দেৱেসু উপপজ্জিম্হ, কো ৱাদো মানুসে ভৱে.

৩. ‘‘দেৱে মহিদ্ধিকা অহুম্হ, মানুসকম্হি কো ৱাদো;

সত্তৰতনমহেসী [সত্তৰতনস্স মহেসী (সী. পী.)], ইত্থিৰতনং অহং ভৱিং.

৪. ‘‘ইধ সঞ্চিতকুসলা [তত্থ সঞ্চিতং কুসলং (স্যা.)], সুসমিদ্ধকুলপ্পজা;

ধনঞ্জানী চ খেমা চ, অহম্পি চ তযো জনা.

৫. ‘‘আৰামং সুকতং কত্ৱা, সব্বাৱযৱমণ্ডিতং;

বুদ্ধপ্পমুখসঙ্ঘস্স, নিয্যাদেত্ৱা সমোদিতা.

৬. ‘‘যত্থ যত্থূপপজ্জামি, তস্স কম্মস্স ৱাহসা;

দেৱেসু অগ্গতং পত্তা, মনুস্সেসু তথেৱ চ.

৭. ‘‘ইমস্মিংযেৱ কপ্পম্হি, ব্ৰহ্মবন্ধু মহাযসো;

কস্সপো নাম গোত্তেন, উপ্পজ্জি ৱদতং ৱৰো.

৮. ‘‘উপট্ঠাকো মহেসিস্স, তদা আসি নৰিস্সৰো;

কাসিৰাজা কিকী নাম, বাৰাণসিপুৰুত্তমে.

৯. ‘‘তস্সাসুং সত্ত ধীতৰো, ৰাজকঞ্ঞা সুখেধিতা [সুখেথিতা (স্যা.)];

বুদ্ধোপট্ঠাননিৰতা, ব্ৰহ্মচৰিযং চৰিংসু তা.

১০. ‘‘তাসং সহাযিকা হুত্ৱা, সীলেসু সুসমাহিতা;

দত্ৱা দানানি সক্কচ্চং, অগাৰেৱ ৱতং [অগাৰেৱ ৱত্তং (স্যা.)] চৰিং.

১১. ‘‘তেন কম্মেন সুকতেন, চেতনাপণিধীহি চ;

জহিত্ৱা মানুসং দেহং, তাৱতিংসূপগা অহং.

১২. ‘‘ততো চুতা যামমগং [যামসগ্গং (স্যা.)], ততোহং তুসিতং গতা;

ততো চ নিম্মানৰতিং, ৱসৱত্তিপুৰং ততো.

১৩. ‘‘যত্থ যত্থূপপজ্জামি, পুঞ্ঞকম্মসমোহিতা;

তত্থ তত্থেৱ ৰাজূনং, মহেসিত্তমকাৰযিং.

১৪. ‘‘ততো চুতা মনুস্সত্তে, ৰাজূনং চক্কৱত্তিনং;

মণ্ডলীনঞ্চ ৰাজূনং, মহেসিত্তমকাৰযিং.

১৫. ‘‘সম্পত্তিমনুভোত্ৱান, দেৱেসু মানুসেসু চ;

সব্বত্থ সুখিতা হুত্ৱা, নেকজাতীসু সংসৰিং.

১৬. ‘‘সো হেতু চ সো পভৱো, তম্মূলং সাসনে খমং [তম্মূলং সা চ সাসনে খন্তি (সী. পী. ক.)];

পঠমং তং সমোধানং, তং ধম্মৰতায নিব্বানং [নিব্বুতং (স্যা.)].

১৭. ‘‘কিলেসা ঝাপিতা ময্হং, ভৱা সব্বে সমূহতা;

নাগীৱ বন্ধনং ছেত্ৱা, ৱিহৰামি অনাসৱা.

১৮. ‘‘স্ৱাগতং ৱত মে আসি, মম বুদ্ধস্স [বুদ্ধসেট্ঠস্স (সী. স্যা. ক.)] সন্তিকে;

তিস্সো ৱিজ্জা অনুপ্পত্তা, কতং বুদ্ধস্স সাসনং.

১৯. ‘‘পটিসম্ভিদা চতস্সো, ৱিমোক্খাপি চ অট্ঠিমে;

ছড়ভিঞ্ঞা সচ্ছিকতা, কতং বুদ্ধস্স সাসনং’’.

ইত্থং সুদং সুমেধা ভিক্খুনী ইমা গাথাযো অভাসিত্থাতি.

সুমেধাথেৰিযাপদানং পঠমং.