২. মেখলাদাযিকাথেৰীঅপদানং

২০. ‘‘সিদ্ধত্থস্স ভগৱতো, থূপকাৰাপিকা অহুং [থূপকাৰ মকাসহং (স্যা.)];

মেখলিকা মযা দিন্না, নৱকম্মায সত্থুনো.

২১. ‘‘নিট্ঠিতে চ মহাথূপে, মেখলং পুনদাসহং;

লোকনাথস্স মুনিনো, পসন্না সেহি পাণিভি.

২২. ‘‘চতুন্নৱুতিতো কপ্পে, যং মেখলমদং তদা;

দুগ্গতিং নাভিজানামি, থূপকাৰস্সিদং ফলং.

২৩. ‘‘কিলেসা ঝাপিতা ময্হং…পে… ৱিহৰামি অনাসৱা.

২৪. ‘‘স্ৱাগতং ৱত মে আসি…পে… কতং বুদ্ধস্স সাসনং.

২৫. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং মেখলাদাযিকা ভিক্খুনী ইমা গাথাযো অভাসিত্থাতি.

মেখলাদাযিকাথেৰিযাপদানং দুতিযং.