১. ভূতত্থেৰগাথা

৫১৮. ‘‘যদা দুক্খং জৰামৰণন্তি পণ্ডিতো, অৱিদ্দসূ যত্থ সিতা পুথুজ্জনা;

দুক্খং পৰিঞ্ঞায সতোৱ ঝাযতি, ততো ৰতিং পৰমতৰং ন ৱিন্দতি.

৫১৯. ‘‘যদা দুক্খস্সাৱহনিং ৱিসত্তিকং, পপঞ্চসঙ্ঘাতদুখাধিৱাহিনিং;

তণ্হং পহন্ত্ৱান সতোৱ ঝাযতি, ততো ৰতিং পৰমতৰং ন ৱিন্দতি.

৫২০. ‘‘যদা সিৱং দ্ৱেচতুৰঙ্গগামিনং, মগ্গুত্তমং সব্বকিলেসসোধনং;

পঞ্ঞায পস্সিত্ৱ সতোৱ ঝাযতি, ততো ৰতিং পৰমতৰং ন ৱিন্দতি.

৫২১. ‘‘যদা অসোকং ৱিৰজং অসঙ্খতং, সন্তং পদং সব্বকিলেসসোধনং;

ভাৱেতি সঞ্ঞোজনবন্ধনচ্ছিদং, ততো ৰতিং পৰমতৰং ন ৱিন্দতি.

৫২২. ‘‘যদা নভে গজ্জতি মেঘদুন্দুভি, ধাৰাকুলা ৱিহগপথে সমন্ততো;

ভিক্খূ চ পব্ভাৰগতোৱ ঝাযতি, ততো ৰতিং পৰমতৰং ন ৱিন্দতি.

৫২৩. ‘‘যদা নদীনং কুসুমাকুলানং, ৱিচিত্ত-ৱানেয্য-ৱটংসকানং;

তীৰে নিসিন্নো সুমনোৱ ঝাযতি, ততো ৰতিং পৰমতৰং ন ৱিন্দতি.

৫২৪. ‘‘যদা নিসীথে ৰহিতম্হি কাননে, দেৱে গড়ন্তম্হি নদন্তি দাঠিনো;

ভিক্খূ চ পব্ভাৰগতোৱ ঝাযতি, ততো ৰতিং পৰমতৰং ন ৱিন্দতি.

৫২৫. ‘‘যদা ৱিতক্কে উপৰুন্ধিযত্তনো, নগন্তৰে নগৱিৱৰং সমস্সিতো;

ৱীতদ্দৰো ৱীতখিলোৱ ঝাযতি, ততো ৰতিং পৰমতৰং ন ৱিন্দতি.

৫২৬. ‘‘যদা সুখী মলখিলসোকনাসনো, নিৰগ্গড়ো নিব্বনথো ৱিসল্লো;

সব্বাসৱে ব্যন্তিকতোৱ ঝাযতি, ততো ৰতিং পৰমতৰং ন ৱিন্দতী’’তি.

… ভূতো থেৰো….

নৱকনিপাতো নিট্ঠিতো.