৫. সৰভঙ্গত্থেৰগাথা

৪৮৭. ‘‘সৰে হত্থেহি ভঞ্জিত্ৱা, কত্ৱান কুটিমচ্ছিসং;

তেন মে সৰভঙ্গোতি, নামং সম্মুতিযা অহু.

৪৮৮. ‘‘ন ময্হং কপ্পতে অজ্জ, সৰে হত্থেহি ভঞ্জিতুং;

সিক্খাপদা নো পঞ্ঞত্তা, গোতমেন যসস্সিনা.

৪৮৯. ‘‘সকলং সমত্তং ৰোগং, সৰভঙ্গো নাদ্দসং পুব্বে;

সোযং ৰোগো দিট্ঠো, ৱচনকৰেনাতিদেৱস্স.

৪৯০. ‘‘যেনেৱ মগ্গেন গতো ৱিপস্সী, যেনেৱ মগ্গেন সিখী চ ৱেস্সভূ;

ককুসন্ধকোণাগমনো চ কস্সপো, তেনঞ্জসেন অগমাসি গোতমো.

৪৯১. ‘‘ৱীততণ্হা অনাদানা, সত্ত বুদ্ধা খযোগধা;

যেহাযং দেসিতো ধম্মো, ধম্মভূতেহি তাদিভি.

৪৯২. ‘‘চত্তাৰি অৰিযসচ্চানি, অনুকম্পায পাণিনং;

দুক্খং সমুদযো মগ্গো, নিৰোধো দুক্খসঙ্খযো.

৪৯৩. ‘‘যস্মিং নিৱত্ততে [যস্মিং ন নিব্বত্ততে (ক.)] দুক্খং, সংসাৰস্মিং অনন্তকং;

ভেদা ইমস্স কাযস্স, জীৱিতস্স চ সঙ্খযা;

অঞ্ঞো পুনব্ভৱো নত্থি, সুৱিমুত্তোম্হি সব্বধী’’তি.

… সৰভঙ্গো থেৰো….

সত্তকনিপাতো নিট্ঠিতো.