৭. সত্তকনিপাতো

১. সুন্দৰসমুদ্দত্থেৰগাথা

৪৫৯. ‘‘অলঙ্কতা সুৱসনা, মালধাৰী [মালাভাৰী (সী.), মালভাৰী (স্যা.)] ৱিভূসিতা;

অলত্তককতাপাদা, পাদুকাৰুয্হ ৱেসিকা.

৪৬০. ‘‘পাদুকা ওৰুহিত্ৱান, পুৰতো পঞ্জলীকতা;

সা মং সণ্হেন মুদুনা, ম্হিতপুব্বং [মিহিতপুব্বং (সী.)] অভাসথ’’.

৪৬১. ‘‘যুৱাসি ত্ৱং পব্বজিতো, তিট্ঠাহি মম সাসনে;

ভুঞ্জ মানুসকে কামে, অহং ৱিত্তং দদামি তে;

সচ্চং তে পটিজানামি, অগ্গিং ৱা তে হৰামহং.

৪৬২. ‘‘যদা জিণ্ণা ভৱিস্সাম, উভো দণ্ডপৰাযনা;

উভোপি পব্বজিস্সাম, উভযত্থ কটগ্গহো’’.

৪৬৩. ‘‘তঞ্চ দিস্ৱান যাচন্তিং, ৱেসিকং পঞ্জলীকতং;

অলঙ্কতং সুৱসনং, মচ্চুপাসংৱ ওড্ডিতং.

৪৬৪. ‘‘ততো মে মনসীকাৰো…পে… নিব্বিদা সমতিট্ঠথ.

৪৬৫. ‘‘ততো চিত্তং ৱিমুচ্চি মে…পে… কতং বুদ্ধস্স সাসন’’ন্তি.

… সুন্দৰসমুদ্দো থেৰো….

২. লকুণ্ডকভদ্দিযত্থেৰগাথা

৪৬৬. পৰে অম্বাটকাৰামে, ৱনসণ্ডম্হি ভদ্দিযো;

সমূলং তণ্হমব্বুয্হ, তত্থ ভদ্দোৱ ঝাযতি [ভদ্দো’ধিঝাযাযতি (সী.), ভদ্দো ঝিযাযতি (স্যা. সী. অট্ঠ.)].

৪৬৭. ‘‘ৰমন্তেকে মুদিঙ্গেহি [মুতিঙ্গেহি (সী. অট্ঠ.)], ৱীণাহি পণৱেহি চ;

অহঞ্চ ৰুক্খমূলস্মিং, ৰতো বুদ্ধস্স সাসনে.

৪৬৮. ‘‘বুদ্ধো চে [বুদ্ধো চ (সব্বত্থ)] মে ৱৰং দজ্জা, সো চ লব্ভেথ মে ৱৰো;

গণ্হেহং সব্বলোকস্স, নিচ্চং কাযগতং সতিং.

৪৬৯. ‘‘যে মং ৰূপেন পামিংসু, যে চ ঘোসেন অন্ৱগূ;

ছন্দৰাগৱসূপেতা, ন মং জানন্তি তে জনা.

৪৭০. ‘‘অজ্ঝত্তঞ্চ ন জানাতি, বহিদ্ধা চ ন পস্সতি;

সমন্তাৱৰণো বালো, স ৱে ঘোসেন ৱুয্হতি.

৪৭১. ‘‘অজ্ঝত্তঞ্চ ন জানাতি, বহিদ্ধা চ ৱিপস্সতি;

বহিদ্ধা ফলদস্সাৱী, সোপি ঘোসেন ৱুয্হতি.

৪৭২. ‘‘অজ্ঝত্তঞ্চ পজানাতি, বহিদ্ধা চ ৱিপস্সতি;

অনাৱৰণদস্সাৱী, ন সো ঘোসেন ৱুয্হতী’’তি.

… লকুণ্ডকভদ্দিযো থেৰো….

৩. ভদ্দত্থেৰগাথা

৪৭৩. ‘‘একপুত্তো অহং আসিং, পিযো মাতু পিযো পিতু;

বহূহি ৱতচৰিযাহি, লদ্ধো আযাচনাহি চ.

৪৭৪. ‘‘তে চ মং অনুকম্পায, অত্থকামা হিতেসিনো;

উভো পিতা চ মাতা চ, বুদ্ধস্স উপনামযুং’’.

৪৭৫. ‘‘কিচ্ছা লদ্ধো অযং পুত্তো, সুখুমালো সুখেধিতো;

ইমং দদাম তে নাথ, জিনস্স পৰিচাৰকং’’.

৪৭৬. ‘‘সত্থা চ মং পটিগ্গয্হ, আনন্দং এতদব্ৰৱি;

‘পব্বাজেহি ইমং খিপ্পং, হেস্সত্যাজানিযো অযং.

৪৭৭. ‘‘পব্বাজেত্ৱান মং সত্থা, ৱিহাৰং পাৱিসী জিনো;

অনোগ্গতস্মিং সূৰিযস্মিং, ততো চিত্তং ৱিমুচ্চি মে.

৪৭৮. ‘‘ততো সত্থা নিৰাকত্ৱা, পটিসল্লানৱুট্ঠিতো;

‘এহি ভদ্দা’তি মং আহ, সা মে আসূপসম্পদা.

৪৭৯. ‘‘জাতিযা সত্তৱস্সেন, লদ্ধা মে উপসম্পদা;

তিস্সো ৱিজ্জা অনুপ্পত্তা, অহো ধম্মসুধম্মতা’’তি.

… ভদ্দো থেৰো….

৪. সোপাকত্থেৰগাথা

৪৮০. ‘‘দিস্ৱা পাসাদছাযাযং, চঙ্কমন্তং নৰুত্তমং;

তত্থ নং উপসঙ্কম্ম, ৱন্দিস্সং [ৱন্দিসং (সী. পী.)] পুৰিসুত্তমং.

৪৮১. ‘‘একংসং চীৱৰং কত্ৱা, সংহৰিত্ৱান পাণযো;

অনুচঙ্কমিস্সং ৱিৰজং, সব্বসত্তানমুত্তমং.

৪৮২. ‘‘ততো পঞ্হে অপুচ্ছি মং, পঞ্হানং কোৱিদো ৱিদূ;

অচ্ছম্ভী চ অভীতো চ, ব্যাকাসিং সত্থুনো অহং.

৪৮৩. ‘‘ৱিস্সজ্জিতেসু পঞ্হেসু, অনুমোদি তথাগতো;

ভিক্খুসঙ্ঘং ৱিলোকেত্ৱা, ইমমত্থং অভাসথ’’.

৪৮৪. ‘‘লাভা অঙ্গানং মগধানং, যেসাযং পৰিভুঞ্জতি;

চীৱৰং পিণ্ডপাতঞ্চ, পচ্চযং সযনাসনং;

পচ্চুট্ঠানঞ্চ সামীচিং, তেসং লাভা’’তি চাব্ৰৱি.

৪৮৫. ‘‘অজ্জতগ্গে মং সোপাক, দস্সনাযোপসঙ্কম;

এসা চেৱ তে সোপাক, ভৱতু উপসম্পদা’’.

৪৮৬. ‘‘জাতিযা সত্তৱস্সোহং, লদ্ধান উপসম্পদং;

ধাৰেমি অন্তিমং দেহং, অহো ধম্মসুধম্মতা’’তি.

… সোপাকো থেৰো….

৫. সৰভঙ্গত্থেৰগাথা

৪৮৭. ‘‘সৰে হত্থেহি ভঞ্জিত্ৱা, কত্ৱান কুটিমচ্ছিসং;

তেন মে সৰভঙ্গোতি, নামং সম্মুতিযা অহু.

৪৮৮. ‘‘ন ময্হং কপ্পতে অজ্জ, সৰে হত্থেহি ভঞ্জিতুং;

সিক্খাপদা নো পঞ্ঞত্তা, গোতমেন যসস্সিনা.

৪৮৯. ‘‘সকলং সমত্তং ৰোগং, সৰভঙ্গো নাদ্দসং পুব্বে;

সোযং ৰোগো দিট্ঠো, ৱচনকৰেনাতিদেৱস্স.

৪৯০. ‘‘যেনেৱ মগ্গেন গতো ৱিপস্সী, যেনেৱ মগ্গেন সিখী চ ৱেস্সভূ;

ককুসন্ধকোণাগমনো চ কস্সপো, তেনঞ্জসেন অগমাসি গোতমো.

৪৯১. ‘‘ৱীততণ্হা অনাদানা, সত্ত বুদ্ধা খযোগধা;

যেহাযং দেসিতো ধম্মো, ধম্মভূতেহি তাদিভি.

৪৯২. ‘‘চত্তাৰি অৰিযসচ্চানি, অনুকম্পায পাণিনং;

দুক্খং সমুদযো মগ্গো, নিৰোধো দুক্খসঙ্খযো.

৪৯৩. ‘‘যস্মিং নিৱত্ততে [যস্মিং ন নিব্বত্ততে (ক.)] দুক্খং, সংসাৰস্মিং অনন্তকং;

ভেদা ইমস্স কাযস্স, জীৱিতস্স চ সঙ্খযা;

অঞ্ঞো পুনব্ভৱো নত্থি, সুৱিমুত্তোম্হি সব্বধী’’তি.

… সৰভঙ্গো থেৰো….

সত্তকনিপাতো নিট্ঠিতো.