৬. সপ্পদাসত্থেৰগাথা

৪০৫. ‘‘পণ্ণৱীসতিৱস্সানি, যতো পব্বজিতো অহং;

অচ্ছৰাসঙ্ঘাতমত্তম্পি, চেতোসন্তিমনজ্ঝগং.

৪০৬. ‘‘অলদ্ধা চিত্তস্সেকগ্গং, কামৰাগেন অট্টিতো [অদ্দিতো (স্যা. সী. অট্ঠ.), অড্ডিতো (ক.)];

বাহা পগ্গয্হ কন্দন্তো, ৱিহাৰা উপনিক্খমিং [নূপনিক্খমিং (সব্বত্থ), দুপনিক্খমিং (?)].

৪০৭. ‘‘সত্থং ৱা আহৰিস্সামি, কো অত্থো জীৱিতেন মে;

কথং হি সিক্খং পচ্চক্খং, কালং কুব্বেথ মাদিসো.

৪০৮. ‘‘তদাহং খুৰমাদায, মঞ্চকম্হি উপাৱিসিং;

পৰিনীতো খুৰো আসি, ধমনিং ছেত্তুমত্তনো.

৪০৯. ‘‘ততো মে মনসীকাৰো, যোনিসো উদপজ্জথ;

আদীনৱো পাতুৰহু, নিব্বিদা সমতিট্ঠথ.

৪১০. ‘‘ততো চিত্তং ৱিমুচ্চি মে, পস্স ধম্মসুধম্মতং;

তিস্সো ৱিজ্জা অনুপ্পত্তা, কতং বুদ্ধস্স সাসন’’ন্তি.

… সপ্পদাসো থেৰো….

৭.কাতিযানত্থেৰগাথা

৪১১. ‘‘উট্ঠেহি নিসীদ কাতিযান, মা নিদ্দাবহুলো অহু জাগৰস্সু;

মা তং অলসং পমত্তবন্ধু, কূটেনেৱ জিনাতু মচ্চুৰাজা.

৪১২. ‘‘সেয্যথাপি [সযথাপি (সী. পী.)] মহাসমুদ্দৱেগো, এৱং জাতিজৰাতিৱত্ততে তং;

সো কৰোহি সুদীপমত্তনো ত্ৱং, ন হি তাণং তৱ ৱিজ্জতেৱ অঞ্ঞং.

৪১৩. ‘‘সত্থা হি ৱিজেসি মগ্গমেতং, সঙ্গা জাতিজৰাভযা অতীতং;

পুব্বাপৰৰত্তমপ্পমত্তো, অনুযুঞ্জস্সু দড়্হং কৰোহি যোগং.

৪১৪. ‘‘পুৰিমানি পমুঞ্চ বন্ধনানি, সঙ্ঘাটিখুৰমুণ্ডভিক্খভোজী;

মা খিড্ডাৰতিঞ্চ মা নিদ্দং, অনুযুঞ্জিত্থ ঝায কাতিযান.

৪১৫. ‘‘ঝাযাহি জিনাহি কাতিযান, যোগক্খেমপথেসু কোৱিদোসি;

পপ্পুয্য অনুত্তৰং ৱিসুদ্ধিং, পৰিনিব্বাহিসি ৱাৰিনাৱ জোতি.

৪১৬. ‘‘পজ্জোতকৰো পৰিত্তৰংসো, ৱাতেন ৱিনম্যতে লতাৱ;

এৱম্পি তুৱং অনাদিযানো, মাৰং ইন্দসগোত্ত নিদ্ধুনাহি;

সো ৱেদযিতাসু ৱীতৰাগো, কালং কঙ্খ ইধেৱ সীতিভূতো’’তি.

… কাতিযানো থেৰো….