১০. ধম্মিকত্থেৰগাথা

৩০৩. [জা. ১.১০.১০২ জাতকেপি] ‘‘ধম্মো হৱে ৰক্খতি ধম্মচাৰিং, ধম্মো সুচিণ্ণো সুখমাৱহতি;

এসানিসংসো ধম্মে সুচিণ্ণে, ন দুগ্গতিং গচ্ছতি ধম্মচাৰী.

৩০৪. [জা. ১.১৫.৩৮৫] ‘‘নহি ধম্মো অধম্মো চ, উভো সমৱিপাকিনো;

অধম্মো নিৰযং নেতি, ধম্মো পাপেতি সুগ্গতিং.

৩০৫. ‘‘তস্মা হি ধম্মেসু কৰেয্য ছন্দং, ইতি মোদমানো সুগতেন তাদিনা;

ধম্মে ঠিতা সুগতৱৰস্স সাৱকা, নীযন্তি ধীৰা সৰণৱৰগ্গগামিনো.

৩০৬. ‘‘ৱিপ্ফোটিতো গণ্ডমূলো, তণ্হাজালো সমূহতো;

সো খীণসংসাৰো ন চত্থি কিঞ্চনং,

চন্দো যথা দোসিনা পুণ্ণমাসিয’’ন্তি.

… ধম্মিকো থেৰো….