৪. চতুকনিপাতো

১. নাগসমালত্থেৰগাথা

২৬৭. ‘‘অলঙ্কতা সুৱসনা, মালিনী চন্দনুস্সদা;

মজ্ঝে মহাপথে নাৰী, তুৰিযে নচ্চতি নট্টকী.

২৬৮. ‘‘পিণ্ডিকায পৱিট্ঠোহং, গচ্ছন্তো নং উদিক্খিসং;

অলঙ্কতং সুৱসনং, মচ্চুপাসংৱ ওড্ডিতং.

২৬৯. ‘‘ততো মে মনসীকাৰো, যোনিসো উদপজ্জথ;

আদীনৱো পাতুৰহু, নিব্বিদা সমতিট্ঠথ [সম্পতিট্ঠথ (ক.)].

২৭০. ‘‘ততো চিত্তং ৱিমুচ্চি মে, পস্স ধম্মসুধম্মতং;

তিস্সো ৱিজ্জা অনুপ্পত্তা, কতং বুদ্ধস্স সাসন’’ন্তি.

… নাগসমালো থেৰো….

২. ভগুত্থেৰগাথা

২৭১. ‘‘অহং মিদ্ধেন পকতো, ৱিহাৰা উপনিক্খমিং;

চঙ্কমং অভিৰুহন্তো, তত্থেৱ পপতিং ছমা.

২৭২. ‘‘গত্তানি পৰিমজ্জিত্ৱা, পুনপাৰুয্হ চঙ্কমং;

চঙ্কমে চঙ্কমিং সোহং, অজ্ঝত্তং সুসমাহিতো.

২৭৩. ‘‘ততো মে মনসীকাৰো, যোনিসো উদপজ্জথ;

আদীনৱো পাতুৰহু, নিব্বিদা সমতিট্ঠথ.

২৭৪. ‘‘ততো চিত্তং ৱিমুচ্চি মে, পস্স ধম্মসুধম্মতং;

তিস্সো ৱিজ্জা অনুপ্পত্তা, কতং বুদ্ধস্স সাসন’’ন্তি.

… ভগুত্থেৰো….

৩. সভিযত্থেৰগাথা

২৭৫. [ধ. প. ৬ ধম্মপদেপি] ‘‘পৰে চ ন ৱিজানন্তি, মযমেত্থ যমামসে;

যে চ তত্থ ৱিজানন্তি, ততো সম্মন্তি মেধগা.

২৭৬. ‘‘যদা চ অৱিজানন্তা, ইৰিযন্ত্যমৰা ৱিয;

ৱিজানন্তি চ যে ধম্মং, আতুৰেসু অনাতুৰা.

২৭৭. ‘‘যং কিঞ্চি সিথিলং কম্মং, সংকিলিট্ঠঞ্চ যং ৱতং;

সঙ্কস্সৰং ব্ৰহ্মচৰিযং, ন তং হোতি মহপ্ফলং.

২৭৮. ‘‘যস্স সব্ৰহ্মচাৰীসু, গাৰৱো নূপলব্ভতি;

আৰকা হোতি সদ্ধম্মা, নভং পুথৱিযা যথা’’তি.

… সভিযো থেৰো….

৪. নন্দকত্থেৰগাথা

২৭৯. ‘‘ধিৰত্থু পূৰে দুগ্গন্ধে, মাৰপক্খে অৱস্সুতে;

নৱসোতানি তে কাযে, যানি সন্দন্তি সব্বদা.

২৮০. ‘‘মা পুৰাণং অমঞ্ঞিত্থো, মাসাদেসি তথাগতে;

সগ্গেপি তে ন ৰজ্জন্তি, কিমঙ্গং পন [কিমঙ্গ পন (সী.)] মানুসে.

২৮১. ‘‘যে চ খো বালা দুম্মেধা, দুম্মন্তী মোহপাৰুতা;

তাদিসা তত্থ ৰজ্জন্তি, মাৰখিত্তম্হি বন্ধনে.

২৮২. ‘‘যেসং ৰাগো চ দোসো চ, অৱিজ্জা চ ৱিৰাজিতা;

তাদী তত্থ ন ৰজ্জন্তি, ছিন্নসুত্তা অবন্ধনা’’তি.

… নন্দকো থেৰো….

৫. জম্বুকত্থেৰগাথা

২৮৩. ‘‘পঞ্চপঞ্ঞাসৱস্সানি, ৰজোজল্লমধাৰযিং;

ভুঞ্জন্তো মাসিকং ভত্তং, কেসমস্সুং অলোচযিং.

২৮৪. ‘‘একপাদেন অট্ঠাসিং, আসনং পৰিৱজ্জযিং;

সুক্খগূথানি চ খাদিং, উদ্দেসঞ্চ ন সাদিযিং.

২৮৫. ‘‘এতাদিসং কৰিত্ৱান, বহুং দুগ্গতিগামিনং;

ৱুয্হমানো মহোঘেন, বুদ্ধং সৰণমাগমং.

২৮৬. ‘‘সৰণগমনং পস্স, পস্স ধম্মসুধম্মতং;

তিস্সো ৱিজ্জা অনুপ্পত্তা, কতং বুদ্ধস্স সাসন’’ন্তি.

… জম্বুকো থেৰো….

৬. সেনকত্থেৰগাথা

২৮৭. ‘‘স্ৱাগতং ৱত মে আসি, গযাযং গযফগ্গুযা;

যং অদ্দসাসিং সম্বুদ্ধং, দেসেন্তং ধম্মমুত্তমং.

২৮৮. ‘‘মহপ্পভং গণাচৰিযং, অগ্গপত্তং ৱিনাযকং;

সদেৱকস্স লোকস্স, জিনং অতুলদস্সনং.

২৮৯. ‘‘মহানাগং মহাৱীৰং, মহাজুতিমনাসৱং;

সব্বাসৱপৰিক্খীণং, সত্থাৰমকুতোভযং.

২৯০. ‘‘চিৰসংকিলিট্ঠং ৱত মং, দিট্ঠিসন্দানবন্ধিতং [সন্ধিতং (সী. স্যা.), সন্দিতং (পী. সী. অট্ঠ.)];

ৱিমোচযি সো ভগৱা, সব্বগন্থেহি সেনক’’ন্তি.

… সেনকো থেৰো….

৭. সম্ভূতত্থেৰগাথা

২৯১. ‘‘যো দন্ধকালে তৰতি, তৰণীযে চ দন্ধযে;

অযোনি [অযোনিসো (স্যা.)] সংৱিধানেন, বালো দুক্খং নিগচ্ছতি.

২৯২. ‘‘তস্সত্থা পৰিহাযন্তি, কাড়পক্খেৱ চন্দিমা;

আযসক্যঞ্চ [আযসস্যঞ্চ (সী.)] পপ্পোতি, মিত্তেহি চ ৱিৰুজ্ঝতি.

২৯৩. ‘‘যো দন্ধকালে দন্ধেতি, তৰণীযে চ তাৰযে;

যোনিসো সংৱিধানেন, সুখং পপ্পোতি পণ্ডিতো.

২৯৪. ‘‘তস্সত্থা পৰিপূৰেন্তি, সুক্কপক্খেৱ চন্দিমা;

যসো কিত্তিঞ্চ পপ্পোতি, মিত্তেহি ন ৱিৰুজ্ঝতী’’তি.

… সম্ভূতো থেৰো….

৮. ৰাহুলত্থেৰগাথা

২৯৫. ‘‘উভযেনেৱ সম্পন্নো, ৰাহুলভদ্দোতি মং ৱিদূ;

যঞ্চম্হি পুত্তো বুদ্ধস্স, যঞ্চ ধম্মেসু চক্খুমা.

২৯৬. ‘‘যঞ্চ মে আসৱা খীণা, যঞ্চ নত্থি পুনব্ভৱো;

অৰহা দক্খিণেয্যোম্হি, তেৱিজ্জো অমতদ্দসো.

২৯৭. ‘‘কামন্ধা জালপচ্ছন্না, তণ্হাছাদনছাদিতা;

পমত্তবন্ধুনা বদ্ধা, মচ্ছাৱ কুমিনামুখে.

২৯৮. ‘‘তং কামং অহমুজ্ঝিত্ৱা, ছেত্ৱা মাৰস্স বন্ধনং;

সমূলং তণ্হমব্বুয্হ, সীতিভূতোস্মি নিব্বুতো’’তি.

… ৰাহুলো থেৰো….

৯. চন্দনত্থেৰগাথা

২৯৯. ‘‘জাতৰূপেন সঞ্ছন্না [পচ্ছন্না (সী.)], দাসীগণপুৰক্খতা;

অঙ্কেন পুত্তমাদায, ভৰিযা মং উপাগমি.

৩০০. ‘‘তঞ্চ দিস্ৱান আযন্তিং, সকপুত্তস্স মাতৰং;

অলঙ্কতং সুৱসনং, মচ্চুপাসংৱ ওড্ডিতং.

৩০১. ‘‘ততো মে মনসীকাৰো, যোনিসো উদপজ্জথ;

আদীনৱো পাতুৰহু, নিব্বিদা সমতিট্ঠথ.

৩০২. ‘‘ততো চিত্তং ৱিমুচ্চি মে, পস্স ধম্মসুধম্মতং;

তিস্সো ৱিজ্জা অনুপ্পত্তা, কতং বুদ্ধস্স সাসন’’ন্তি.

… চন্দনো থেৰো….

১০. ধম্মিকত্থেৰগাথা

৩০৩. [জা. ১.১০.১০২ জাতকেপি] ‘‘ধম্মো হৱে ৰক্খতি ধম্মচাৰিং, ধম্মো সুচিণ্ণো সুখমাৱহতি;

এসানিসংসো ধম্মে সুচিণ্ণে, ন দুগ্গতিং গচ্ছতি ধম্মচাৰী.

৩০৪. [জা. ১.১৫.৩৮৫] ‘‘নহি ধম্মো অধম্মো চ, উভো সমৱিপাকিনো;

অধম্মো নিৰযং নেতি, ধম্মো পাপেতি সুগ্গতিং.

৩০৫. ‘‘তস্মা হি ধম্মেসু কৰেয্য ছন্দং, ইতি মোদমানো সুগতেন তাদিনা;

ধম্মে ঠিতা সুগতৱৰস্স সাৱকা, নীযন্তি ধীৰা সৰণৱৰগ্গগামিনো.

৩০৬. ‘‘ৱিপ্ফোটিতো গণ্ডমূলো, তণ্হাজালো সমূহতো;

সো খীণসংসাৰো ন চত্থি কিঞ্চনং,

চন্দো যথা দোসিনা পুণ্ণমাসিয’’ন্তি.

… ধম্মিকো থেৰো….

১১. সপ্পকত্থেৰগাথা

৩০৭. ‘‘যদা বলাকা সুচিপণ্ডৰচ্ছদা, কাড়স্স মেঘস্স ভযেন তজ্জিতা;

পলেহিতি আলযমালযেসিনী, তদা নদী অজকৰণী ৰমেতি মং.

৩০৮. ‘‘যদা বলাকা সুৱিসুদ্ধপণ্ডৰা, কাড়স্স মেঘস্স ভযেন তজ্জিতা;

পৰিযেসতি লেণমলেণদস্সিনী, তদা নদী অজকৰণী ৰমেতি মং.

৩০৯. ‘‘কং নু তত্থ ন ৰমেন্তি, জম্বুযো উভতো তহিং;

সোভেন্তি আপগাকূলং, মম লেণস্স [মহালেণস্স (স্যা. ক.)] পচ্ছতো.

৩১০. ‘‘তা মতমদসঙ্ঘসুপ্পহীনা,

ভেকা মন্দৱতী পনাদযন্তি;

‘নাজ্জ গিৰিনদীহি ৱিপ্পৱাসসমযো,

খেমা অজকৰণী সিৱা সুৰম্মা’’’তি.

… সপ্পকো থেৰো….

১২. মুদিতত্থেৰগাথা

৩১১. ‘‘পব্বজিং জীৱিকত্থোহং, লদ্ধান উপসম্পদং;

ততো সদ্ধং পটিলভিং, দড়্হৱীৰিযো পৰক্কমিং.

৩১২. ‘‘কামং ভিজ্জতুযং কাযো, মংসপেসী ৱিসীযৰুং [ৱিসিযন্তু (ক.)];

উভো জণ্ণুকসন্ধীহি, জঙ্ঘাযো পপতন্তু মে.

৩১৩. ‘‘নাসিস্সং ন পিৱিস্সামি, ৱিহাৰা চ ন নিক্খমে;

নপি পস্সং নিপাতেস্সং, তণ্হাসল্লে অনূহতে.

৩১৪. ‘‘তস্স মেৱং ৱিহৰতো, পস্স ৱীৰিযপৰক্কমং;

তিস্সো ৱিজ্জা অনুপ্পত্তা, কতং বুদ্ধস্স সাসন’’ন্তি.

… মুদিতো থেৰো….

চতুক্কনিপাতো নিট্ঠিতো.