১. মহামোগ্গল্লানত্থেৰগাথা

১১৪৯. ‘‘আৰঞ্ঞিকা পিণ্ডপাতিকা, উঞ্ছাপত্তাগতে ৰতা;

দালেমু মচ্চুনো সেনং, অজ্ঝত্তং সুসমাহিতা.

১১৫০. ‘‘আৰঞ্ঞিকা পিণ্ডপাতিকা, উঞ্ছাপত্তাগতে ৰতা;

ধুনাম মচ্চুনো সেনং, নড়াগাৰংৱ কুঞ্জৰো.

১১৫১. ‘‘ৰুক্খমূলিকা সাততিকা, উঞ্ছাপত্তাগতে ৰতা;

দালেমু মচ্চুনো সেনং, অজ্ঝত্তং সুসমাহিতা.

১১৫২. ‘‘ৰুক্খমূলিকা সাততিকা, উঞ্ছাপত্তাগতে ৰতা;

ধুনাম মচ্চুনো সেনং, নড়াগাৰংৱ কুঞ্জৰো.

১১৫৩. ‘‘অট্ঠিকঙ্কলকুটিকে, মংসন্হাৰুপসিব্বিতে;

ধিৰত্থু পুৰে দুগ্গন্ধে, পৰগত্তে মমাযসে.

১১৫৪. ‘‘গূথভস্তে তচোনদ্ধে, উৰগণ্ডিপিসাচিনি;

নৱ সোতানি তে কাযে, যানি সন্দন্তি সব্বদা.

১১৫৫. ‘‘তৱ সৰীৰং নৱসোতং, দুগ্গন্ধকৰং পৰিবন্ধং;

ভিক্খু পৰিৱজ্জযতে তং, মীড়্হং চ যথা সুচিকামো.

১১৫৬. ‘‘এৱঞ্চে তং জনো জঞ্ঞা, যথা জানামি তং অহং;

আৰকা পৰিৱজ্জেয্য, গূথট্ঠানংৱ পাৱুসে’’.

১১৫৭. ‘‘এৱমেতং মহাৱীৰ, যথা সমণ ভাসসি;

এত্থ চেকে ৱিসীদন্তি, পঙ্কম্হিৱ জৰগ্গৱো.

১১৫৮. ‘‘আকাসম্হি হলিদ্দিযা, যো মঞ্ঞেথ ৰজেতৱে;

অঞ্ঞেন ৱাপি ৰঙ্গেন, ৱিঘাতুদযমেৱ তং.

১১৫৯. ‘‘তদাকাসসমং চিত্তং, অজ্ঝত্তং সুসমাহিতং;

মা পাপচিত্তে আসাদি, অগ্গিখন্ধংৱ পক্খিমা.

১১৬০. ‘‘পস্স চিত্তকতং বিম্বং, অৰুকাযং সমুস্সিতং;

আতুৰং বহুসঙ্কপ্পং, যস্স নত্থি ধুৱং ঠিতি.

১১৬১. ‘‘পস্স চিত্তকতং ৰূপং, মণিনা কুণ্ডলেন চ;

অট্ঠিং তচেন ওনদ্ধং, সহ ৱত্থেহি সোভতি.

১১৬২. ‘‘অলত্তককতা পাদা, মুখং চুণ্ণকমক্খিতং;

অলং বালস্স মোহায, নো চ পাৰগৱেসিনো.

১১৬৩. ‘‘অট্ঠপদকতা কেসা, নেত্তা অঞ্জনমক্খিতা;

অলং বালস্স মোহায, নো চ পাৰগৱেসিনো.

১১৬৪. ‘‘অঞ্জনীৱ নৱা চিত্তা, পূতিকাযো অলঙ্কতো;

অলং বালস্স মোহায, নো চ পাৰগৱেসিনো.

১১৬৫. ‘‘ওদহি মিগৱো পাসং, নাসদা ৱাগুৰং মিগো;

ভুত্ৱা নিৱাপং গচ্ছাম, কদ্দন্তে মিগবন্ধকে.

১১৬৬. ‘‘ছিন্নো পাসো মিগৱস্স, নাসদা ৱাগুৰং মিগো;

ভুত্ৱা নিৱাপং গচ্ছাম, সোচন্তে মিগলুদ্দকে.

১১৬৭. ‘‘তদাসি যং ভিংসনকং, তদাসি লোমহংসনং;

অনেকাকাৰসম্পন্নে, সাৰিপুত্তম্হি নিব্বুতে.

১১৬৮. [দী. নি. ২.২২১, ২৭২; সং. নি. ১.১৮৬; ২.১৪৩; অপ. থেৰ ১.২.১১৫; জা. ১.১.৯৫] ‘‘অনিচ্চা ৱত সঙ্খাৰা উপ্পাদৱয ধম্মিনো.

উপজ্জিত্ৱা নিৰুজ্ঝন্তি, তেসং ৱূপসমো সুখো.

১১৬৯. ‘‘সুখুমং তে পটিৱিজ্ঝন্তি, ৱালগ্গং উসুনা যথা;

যে পঞ্চক্খন্ধে পস্সন্তি, পৰতো নো চ অত্ততো.

১১৭০. ‘‘যে চ পস্সন্তি সঙ্খাৰে, পৰতো নো চ অত্ততো;

পচ্চব্যাধিংসু নিপুণং, ৱালগ্গং উসুনা যথা.

১১৭১. [সং. নি. ১.২১, ৯৭] ‘‘সত্তিযা ৱিয ওমট্ঠো, ডয্হমানোৱ মত্থকে;

কামৰাগপ্পহানায, সতো ভিক্খু পৰিব্বজে.

১১৭২. [সং. নি. ১.২১, ৯৭]‘‘সত্তিযা ৱিয ওমট্ঠো, ডয্হমানোৱ মত্থকে;

ভৱৰাগপ্পহানায, সতো ভিক্খু পৰিব্বজে’’.

১১৭৩. ‘‘চোদিতো ভাৱিতত্তেন, সৰীৰন্তিমধাৰিনা;

মিগাৰমাতুপাসাদং, পাদঙ্গুট্ঠেন কম্পযিং.

১১৭৪. ‘‘নযিদং সিথিলমাৰব্ভ, নযিদং অপ্পেন থামসা;

নিব্বানমধিগন্তব্বং, সব্বগন্থ-পমোচনং.

১১৭৫. ‘‘অযঞ্চ দহৰো ভিক্খু, অযমুত্তমপোৰিসো;

ধাৰেতি অন্তিমং দেহং, জেত্ৱা মাৰং সৱাহিনিং [সৱাহনং (ক.)].

১১৭৬. ‘‘ৱিৱৰমনুপভন্তি ৱিজ্জুতা, ৱেভাৰস্স চ পণ্ডৱস্স চ;

নগৱিৱৰগতো ঝাযতি, পুত্তো অপ্পটিমস্স তাদিনো.

১১৭৭. ‘‘উপসন্তো উপৰতো, পন্তসেনাসনো মুনি;

দাযাদো বুদ্ধসেট্ঠস্স, ব্ৰহ্মুনা অভিৱন্দিতো.

১১৭৮. ‘‘উপসন্তং উপৰতং, পন্তসেনাসনং মুনিং;

দাযাদং বুদ্ধসেট্ঠস্স, ৱন্দ ব্ৰাহ্মণ কস্সপং.

১১৭৯. ‘‘যো চ জাতিসতং গচ্ছে, সব্বা ব্ৰাহ্মণজাতিযো;

সোত্তিযো ৱেদসম্পন্নো, মনুস্সেসু পুনপ্পুনং.

১১৮০. ‘‘অজ্ঝাযকোপি চে অস্স, তিণ্ণং ৱেদান পাৰগূ;

এতস্স ৱন্দনাযেতং, কলং নাগ্ঘতি সোড়সিং.

১১৮১. ‘‘যো সো অট্ঠ ৱিমোক্খানি, পুৰেভত্তং অফস্সযি [অপস্সযি (সী. ক.), অফুস্সযি (স্যা.)];

অনুলোমং পটিলোমং, ততো পিণ্ডায গচ্ছতি.

১১৮২. ‘‘তাদিসং ভিক্খুং মাসাদি [মা হনি (সী.)], মাত্তানং খণি ব্ৰাহ্মণ;

অভিপ্পসাদেহি মনং, অৰহন্তম্হি তাদিনে;

খিপ্পং পঞ্জলিকো ৱন্দ, মা তে ৱিজটি মত্থকং.

১১৮৩. ‘‘নেসো পস্সতি সদ্ধম্মং, সংসাৰেন পুৰক্খতো;

অধোগমং জিম্হপথং, কুম্মগ্গমনুধাৱতি.

১১৮৪. ‘‘কিমীৱ মীড়্হসল্লিত্তো, সঙ্খাৰে অধিমুচ্ছিতো;

পগাড়্হো লাভসক্কাৰে, তুচ্ছো গচ্ছতি পোট্ঠিলো.

১১৮৫. ‘‘ইমঞ্চ পস্স আযন্তং, সাৰিপুত্তং সুদস্সনং;

ৱিমুত্তং উভতোভাগে, অজ্ঝত্তং সুসমাহিতং.

১১৮৬. ‘‘ৱিসল্লং খীণসংযোগং, তেৱিজ্জং মচ্চুহাযিনং;

দক্খিণেয্যং মনুস্সানং, পুঞ্ঞক্খেত্তং অনুত্তৰং.

১১৮৭. ‘‘এতে সম্বহুলা দেৱা, ইদ্ধিমন্তো যসস্সিনো;

দস দেৱসহস্সানি, সব্বে ব্ৰহ্মপুৰোহিতা;

মোগ্গল্লানং নমস্সন্তা, তিট্ঠন্তি পঞ্জলীকতা.

১১৮৮. ‘‘‘নমো তে পুৰিসাজঞ্ঞ, নমো তে পুৰিসুত্তম;

যস্স তে আসৱা খীণা, দক্খিণেয্যোসি মাৰিস’.

১১৮৯. ‘‘পূজিতো নৰদেৱেন, উপ্পন্নো মৰণাভিভূ;

পুণ্ডৰীকংৱ তোযেন, সঙ্খাৰেনুপলিপ্পতি.

১১৯০. ‘‘যস্স মুহুত্তেন সহস্সধা লোকো, সংৱিদিতো সব্ৰহ্মকপ্পো ৱসি;

ইদ্ধিগুণে চুতুপপাতে কালে, পস্সতি দেৱতা স ভিক্খু.

১১৯১. ‘‘সাৰিপুত্তোৱ পঞ্ঞায, সীলেন উপসমেন চ;

যোপি পাৰঙ্গতো ভিক্খু, এতাৱপৰমো সিযা.

১১৯২. ‘‘কোটিসতসহস্সস্স, অত্তভাৱং খণেন নিম্মিনে;

অহং ৱিকুব্বনাসু কুসলো, ৱসীভূতোম্হি ইদ্ধিযা.

১১৯৩. ‘‘সমাধিৱিজ্জাৱসিপাৰমীগতো, মোগ্গল্লানগোত্তো অসিতস্স সাসনে;

ধীৰো সমুচ্ছিন্দি সমাহিতিন্দ্ৰিযো, নাগো যথা পূতিলতংৱ বন্ধনং.

১১৯৪. ‘‘পৰিচিণ্ণো মযা সত্থা, কতং বুদ্ধস্স সাসনং;

ওহিতো গৰুকো ভাৰো, ভৱনেত্তি সমূহতা.

১১৯৫. ‘‘যস্স চত্থায পব্বজিতো, অগাৰস্মানগাৰিযং;

সো মে অত্থো অনুপ্পত্তো, সব্বসংযোজনক্খযো.

১১৯৬. [ম. নি. ১.৫১৩] ‘‘কীদিসো নিৰযো আসি, যত্থ দুস্সী অপচ্চথ;

ৱিধুৰং সাৱকমাসজ্জ, ককুসন্ধঞ্চ ব্ৰাহ্মণং.

১১৯৭. ‘‘সতং আসি অযোসঙ্কূ, সব্বে পচ্চত্তৱেদনা;

ঈদিসো নিৰযো আসি, যত্থ দুস্সী অপচ্চথ;

ৱিধুৰং সাৱকমাসজ্জ, ককুসন্ধঞ্চ ব্ৰাহ্মণং.

১১৯৮. ‘‘যো এতমভিজানাতি, ভিক্খু বুদ্ধস্স সাৱকো;

তাদিসং ভিক্খুমাসজ্জ, কণ্হ দুক্খং নিগচ্ছসি.

১১৯৯. ‘‘মজ্ঝেসৰস্মিং [সৰস্স (সী.), সাগৰস্মিং (ক.)] তিট্ঠন্তি, ৱিমানা কপ্পঠাযিনো;

ৱেড়ুৰিযৱণ্ণা ৰুচিৰা, অচ্চিমন্তো পভস্সৰা;

অচ্ছৰা তত্থ নচ্চন্তি, পুথু নানত্তৱণ্ণিযো.

১২০০. ‘‘যো এতমভিজানাতি…পে… কণ্হ দুক্খং নিগচ্ছসি.

১২০১. ‘‘যো ৱে বুদ্ধেন চোদিতো, ভিক্খুসঙ্ঘস্স পেক্খতো;

মিগাৰমাতুপাসাদং, পাদঙ্গুট্ঠেন কম্পযি.

১২০২. ‘‘যো এতমভিজানাতি…পে… কণ্হ দুক্খং নিগচ্ছসি.

১২০৩. ‘‘যো ৱেজযন্তপাসাদং, পাদঙ্গুট্ঠেন কম্পযি;

ইদ্ধিবলেনুপত্থদ্ধো, সংৱেজেসি চ দেৱতা.

১২০৪. ‘‘যো এতমভিজানাতি…পে… কণ্হ দুক্খং নিগচ্ছসি.

১২০৪. ‘‘যো এতমভিজানাতি…পে… কণ্হ দুক্খং নিগচ্ছসি.

১২০৫. ‘‘যো ৱেজযন্তপাসাদে, সক্কং সো পৰিপুচ্ছতি;

অপি আৱুসো জানাসি, তণ্হক্খযৱিমুত্তিযো;

তস্স সক্কো ৱিযাকাসি, পঞ্হং পুট্ঠো যথাতথং.

১২০৬. ‘‘যো এতমভিজানাতি…পে… কণ্হ দুক্খং নিগচ্ছসি.

১২০৭. ‘‘যো ব্ৰহ্মানং পৰিপুচ্ছতি, সুধম্মাযং ঠিতো [সুধম্মাযা’ভিতো (স্যা.)] সভং;

অজ্জাপি ত্যাৱুসো সা দিট্ঠি, যা তে দিট্ঠি পুৰে অহু;

পস্সসি ৱীতিৱত্তন্তং, ব্ৰহ্মলোকে পভস্সৰং.

১২০৮. ‘‘তস্স ব্ৰহ্মা ৱিযাকাসি, পঞ্হং পুট্ঠো যথাতথং;

ন মে মাৰিস সা দিট্ঠি, যা মে দিট্ঠি পুৰে অহু.

১২০৯. ‘‘পস্সামি ৱীতিৱত্তন্তং, ব্ৰহ্মলোকে পভস্সৰং;

সোহং অজ্জ কথং ৱজ্জং, অহং নিচ্চোম্হি সস্সতো.

১২১০. ‘‘যো এতমভিজানাতি…পে… কণ্হ দুক্খং নিগচ্ছসি.

১২১১. ‘‘যো মহানেৰুনো কূটং, ৱিমোক্খেন অফস্সযি [অপস্সযি (সী. ক.)];

ৱনং পুব্বৱিদেহানং, যে চ ভূমিসযা নৰা.

১২১২. ‘‘যো এতমভিজানাতি, ভিক্খু বুদ্ধস্স সাৱকো;

তাদিসং ভিক্খুমাসজ্জ, কণ্হ দুক্খং নিগচ্ছসি.

১২১৩. ‘‘ন ৱে অগ্গি চেতযতি, অহং বালং ডহামীতি;

বালোৱ জলিতং অগ্গিং, আসজ্জ নং পডয্হতি.

১২১৪. ‘‘এৱমেৱ তুৱং মাৰ, আসজ্জ নং তথাগতং;

সযং ডহিস্সসি অত্তানং, বালো অগ্গিংৱ সম্ফুসং.

১২১৫. ‘‘অপুঞ্ঞং পসৱী মাৰো, আসজ্জ নং তথাগতং;

কিং নু মঞ্ঞসি পাপিম, ন মে পাপং ৱিপচ্চতি.

১২১৬. ‘‘কৰতো তে চীযতে [মিয্যতে (সব্বত্থ) ম. নি. ১.৫১৩ পস্সিতব্বং] পাপং, চিৰৰত্তায অন্তক;

মাৰ নিব্বিন্দ বুদ্ধম্হা, আসং মাকাসি ভিক্খুসু.

১২১৭. ‘‘ইতি মাৰং অতজ্জেসি, ভিক্খু ভেসকড়াৱনে;

ততো সো দুম্মনো যক্খো, তত্থেৱন্তৰধাযথা’’তি.

ইত্থং সুদং আযস্মা মহামোগ্গল্লানো [মহামোগ্গলানো (ক.)] থেৰো গাথাযো অভাসিত্থাতি.

সট্ঠিনিপাতো নিট্ঠিতো.