৬. সেলত্থেৰগাথা

৮১৮. ‘‘পৰিপুণ্ণকাযো সুৰুচি, সুজাতো চাৰুদস্সনো;

সুৱণ্ণৱণ্ণোসি ভগৱা, সুসুক্কদাঠোসি ৱীৰিযৱা [সুসুক্কদাঠো ৱিৰীযৱা (সী.)].

৮১৯. ‘‘নৰস্স হি সুজাতস্স, যে ভৱন্তি ৱিযঞ্জনা;

সব্বে তে তৱ কাযস্মিং, মহাপুৰিসলক্খণা.

৮২০. ‘‘পসন্ননেত্তো সুমুখো, ব্ৰহা উজু পতাপৱা;

মজ্ঝে সমণসঙ্ঘস্স, আদিচ্চোৱ ৱিৰোচসি.

৮২১. ‘‘কল্যাণদস্সনো ভিক্খু, কঞ্চনসন্নিভত্তচো;

কিং তে সমণভাৱেন, এৱং উত্তমৱণ্ণিনো.

৮২২. ‘‘ৰাজা অৰহসি ভৱিতুং, চক্কৱত্তী ৰথেসভো;

চাতুৰন্তো ৱিজিতাৱী, জম্বুসণ্ডস্স [জম্বুমণ্ডস্স (ক.)] ইস্সৰো.

৮২৩. ‘‘খত্তিযা ভোগী ৰাজানো [ভোগা ৰাজানো (সী. ক.), ভোজৰাজানো (স্যা.)], অনুযন্তা ভৱন্তি তে;

ৰাজাভিৰাজা [ৰাজাধিৰাজা (সী. ক.)] মনুজিন্দো, ৰজ্জং কাৰেহি গোতম’’.

৮২৪. ‘‘ৰাজাহমস্মি সেল, (সেলাতি ভগৱা) ধম্মৰাজা অনুত্তৰো;

ধম্মেন চক্কং ৱত্তেমি, চক্কং অপ্পটিৱত্তিযং’’.

৮২৫. ‘‘সম্বুদ্ধো পটিজানাসি, (ইতি সেলো ব্ৰাহ্মণো) ধম্মৰাজা অনুত্তৰো;

‘ধম্মেন চক্কং ৱত্তেমি’, ইতি ভাসথ গোতম.

৮২৬. ‘‘কো নু সেনাপতি ভোতো, সাৱকো সত্থুৰন্ৱযো [অন্ৱযো (সী.)];

কো তেতমনুৱত্তেতি, ধম্মচক্কং পৱত্তিতং’’.

৮২৭. ‘‘মযা পৱত্তিতং চক্কং, (সেলাতি ভগৱা) ধম্মচক্কং অনুত্তৰং;

সাৰিপুত্তো অনুৱত্তেতি, অনুজাতো তথাগতং.

৮২৮. ‘‘অভিঞ্ঞেয্যং অভিঞ্ঞাতং, ভাৱেতব্বঞ্চ ভাৱিতং;

পহাতব্বং পহীনং মে, তস্মা বুদ্ধোস্মি ব্ৰাহ্মণ.

৮২৯. ‘‘ৱিনযস্সু মযি কঙ্খং, অধিমুঞ্চস্সু ব্ৰাহ্মণ;

দুল্লভং দস্সনং হোতি, সম্বুদ্ধানং অভিণ্হসো.

৮৩০. ‘‘যেসং ৱে দুল্লভো লোকে, পাতুভাৱো অভিণ্হসো;

সোহং ব্ৰাহ্মণ বুদ্ধোস্মি, সল্লকত্তো [সল্লকন্তো (সী.)] অনুত্তৰো.

৮৩১. ‘‘ব্ৰহ্মভূতো অতিতুলো, মাৰসেনপ্পমদ্দনো;

সব্বামিত্তে ৱসে [ৱসী (স্যা. ক., ম. নি. ২.৩৯৯; সু. নি. ৯৬৬)] কত্ৱা, মোদামি অকুতোভযো’’.

৮৩২. ‘‘ইদং ভোন্তো নিসামেথ, যথা ভাসতি চক্খুমা;

সল্লকত্তো মহাৱীৰো, সীহোৱ নদতী ৱনে.

৮৩৩. ‘‘ব্ৰহ্মভূতং অতিতুলং, মাৰসেনপ্পমদ্দনং;

কো দিস্ৱা নপ্পসীদেয্য, অপি কণ্হাভিজাতিকো.

৮৩৪. ‘‘যো মং ইচ্ছতি অন্ৱেতু, যো ৱা নিচ্ছতি গচ্ছতু;

ইধাহং পব্বজিস্সামি, ৱৰপঞ্ঞস্স সন্তিকে’’.

৮৩৫. ‘‘এতং চে ৰুচ্চতি ভোতো, সম্মাসম্বুদ্ধসাসনং;

মযম্পি পব্বজিস্সাম, ৱৰপঞ্ঞস্স সন্তিকে.

৮৩৬. ‘‘ব্ৰাহ্মণা তিসতা ইমে, যাচন্তি পঞ্জলীকতা;

‘ব্ৰহ্মচৰিযং চৰিস্সাম, ভগৱা তৱ সন্তিকে’’’.

৮৩৭. ‘‘স্ৱাখাতং ব্ৰহ্মচৰিযং, (সেলাতি ভগৱা) সন্দিট্ঠিকমকালিকং;

যত্থ অমোঘা পব্বজ্জা, অপ্পমত্তস্স সিক্খতো’’.

৮৩৮. ‘‘যং তং সৰণমাগম্হ [সৰণমাগম্ম (সব্বত্থ)], ইতো অট্ঠমে [অট্ঠমি (স্যা. ক.)] চক্খুম;

সত্তৰত্তেন ভগৱা, দন্তাম্হ তৱ সাসনে.

৮৩৯. ‘‘তুৱং বুদ্ধো তুৱং সত্থা, তুৱং মাৰাভিভূ মুনি;

তুৱং অনুসযে ছেত্ৱা, তিণ্ণো তাৰেসিমং পজং.

৮৪০. ‘‘উপধী তে সমতিক্কন্তা, আসৱা তে পদালিতা;

সীহোৱ অনুপাদানো, পহীনভযভেৰৱো.

৮৪১. ‘‘ভিক্খৱো তিসতা ইমে, তিট্ঠন্তি পঞ্জলীকতা;

পাদে ৱীৰ পসাৰেহি, নাগা ৱন্দন্তু সত্থুনো’’তি.

… সেলো থেৰো….