৩. তেলকানিত্থেৰগাথা

৭৪৭. ‘‘চিৰৰত্তং ৱতাতাপী, ধম্মং অনুৱিচিন্তযং;

সমং চিত্তস্স নালত্থং, পুচ্ছং সমণব্ৰাহ্মণে.

৭৪৮. ‘‘‘কো সো পাৰঙ্গতো লোকে, কো পত্তো অমতোগধং;

কস্স ধম্মং পটিচ্ছামি, পৰমত্থৱিজাননং’.

৭৪৯. ‘‘অন্তোৱঙ্কগতো আসি, মচ্ছোৱ ঘসমামিসং;

বদ্ধো মহিন্দপাসেন, ৱেপচিত্যসুৰো যথা.

৭৫০. ‘‘অঞ্ছামি নং ন মুঞ্চামি, অস্মা সোকপৰিদ্দৱা;

কো মে বন্ধং মুঞ্চং লোকে, সম্বোধিং ৱেদযিস্সতি.

৭৫১. ‘‘সমণং ব্ৰাহ্মণং ৱা কং, আদিসন্তং পভঙ্গুনং.

কস্স ধম্মং পটিচ্ছামি, জৰামচ্চুপৱাহনং.

৭৫২. ‘‘ৱিচিকিচ্ছাকঙ্খাগন্থিতং, সাৰম্ভবলসঞ্ঞুতং;

কোধপ্পত্তমনত্থদ্ধং, অভিজপ্পপ্পদাৰণং.

৭৫৩. ‘‘তণ্হাধনুসমুট্ঠানং, দ্ৱে চ পন্নৰসাযুতং [দ্ৱেধাপন্নৰসাযুতং (?)];

পস্স ওৰসিকং বাড়্হং, ভেত্ৱান যদি [যদ (সী. অট্ঠ.) হদি (?) ‘‘হদযে’’তি তংসংৱণ্ণনা] তিট্ঠতি.

৭৫৪. ‘‘অনুদিট্ঠীনং অপ্পহানং, সঙ্কপ্পপৰতেজিতং;

তেন ৱিদ্ধো পৱেধামি, পত্তংৱ মালুতেৰিতং.

৭৫৫. ‘‘অজ্ঝত্তং মে সমুট্ঠায, খিপ্পং পচ্চতি মামকং;

ছফস্সাযতনী কাযো, যত্থ সৰতি সব্বদা.

৭৫৬. ‘‘তং ন পস্সামি তেকিচ্ছং, যো মেতং সল্লমুদ্ধৰে;

নানাৰজ্জেন সত্থেন [নাৰগ্গেন ন সত্থেন (?)], নাঞ্ঞেন ৱিচিকিচ্ছিতং.

৭৫৭. ‘‘কো মে অসত্থো অৱণো, সল্লমব্ভন্তৰপস্সযং;

অহিংসং সব্বগত্তানি, সল্লং মে উদ্ধৰিস্সতি.

৭৫৮. ‘‘ধম্মপ্পতি হি সো সেট্ঠো, ৱিসদোসপ্পৱাহকো;

গম্ভীৰে পতিতস্স মে, থলং পাণিঞ্চ দস্সযে.

৭৫৯. ‘‘ৰহদেহমস্মি ওগাড়্হো, অহাৰিযৰজমত্তিকে;

মাযাউসূযসাৰম্ভ, থিনমিদ্ধমপত্থটে.

৭৬০. ‘‘উদ্ধচ্চমেঘথনিতং, সংযোজনৱলাহকং;

ৱাহা ৱহন্তি কুদ্দিট্ঠিং [দুদ্দিট্ঠিং (সী. ধ. প. ৩৩৯)], সঙ্কপ্পা ৰাগনিস্সিতা.

৭৬১. ‘‘সৱন্তি সব্বধি সোতা, লতা উব্ভিজ্জ তিট্ঠতি;

তে সোতে কো নিৱাৰেয্য, তং লতং কো হি ছেচ্ছতি.

৭৬২. ‘‘ৱেলং কৰোথ ভদ্দন্তে, সোতানং সন্নিৱাৰণং;

মা তে মনোমযো সোতো, ৰুক্খংৱ সহসা লুৱে.

৭৬৩. ‘‘এৱং মে ভযজাতস্স, অপাৰা পাৰমেসতো;

তাণো পঞ্ঞাৱুধো সত্থা, ইসিসঙ্ঘনিসেৱিতো.

৭৬৪. ‘‘সোপাণং সুগতং সুদ্ধং, ধম্মসাৰমযং দড়্হং;

পাদাসি ৱুয্হমানস্স, ‘মা ভাযী’তি চ মব্ৰৱি.

৭৬৫. ‘‘সতিপট্ঠানপাসাদং, আৰুয্হ পচ্চৱেক্খিসং;

যং তং পুব্বে অমঞ্ঞিস্সং, সক্কাযাভিৰতং পজং.

৭৬৬. ‘‘যদা চ মগ্গমদ্দক্খিং, নাৱায অভিৰূহনং;

অনধিট্ঠায অত্তানং, তিত্থমদ্দক্খিমুত্তমং.

৭৬৭. ‘‘সল্লং অত্তসমুট্ঠানং, ভৱনেত্তিপ্পভাৱিতং;

এতেসং অপ্পৱত্তায [অপ্পৱত্তিযা (?)], দেসেসি মগ্গমুত্তমং.

৭৬৮. ‘‘দীঘৰত্তানুসযিতং, চিৰৰত্তমধিট্ঠিতং;

বুদ্ধো মেপানুদী গন্থং, ৱিসদোসপ্পৱাহনো’’তি.

…তেলকানি থেৰো….