১৫. সোড়সকনিপাতো

১. অঞ্ঞাসিকোণ্ডঞ্ঞত্থেৰগাথা

৬৭৩. ‘‘এস ভিয্যো পসীদামি, সুত্ৱা ধম্মং মহাৰসং;

ৱিৰাগো দেসিতো ধম্মো, অনুপাদায সব্বসো.

৬৭৪. ‘‘বহূনি লোকে চিত্ৰানি, অস্মিং পথৱিমণ্ডলে;

মথেন্তি মঞ্ঞে সঙ্কপ্পং, সুভং ৰাগূপসংহিতং.

৬৭৫. ‘‘ৰজমুহতঞ্চ ৱাতেন, যথা মেঘোপসম্মযে;

এৱং সম্মন্তি সঙ্কপ্পা, যদা পঞ্ঞায পস্সতি.

৬৭৬. [ধ. প. ২৭৭ ধম্মপদে] ‘‘সব্বে সঙ্খাৰা অনিচ্চাতি, যদা পঞ্ঞায পস্সতি;

অথ নিব্বিন্দতি দুক্খে, এস মগ্গো ৱিসুদ্ধিযা.

৬৭৭. [ধ. প. ২৭৮ ধম্মপদে] ‘‘সব্বে সঙ্খাৰা দুক্খাতি, যদা পঞ্ঞায পস্সতি

অথ নিব্বিন্দতি দুক্খে, এস মগ্গো ৱিসুদ্ধিযা.

৬৭৮. [ধ. প. ২৭৯ ধম্মপদে] ‘‘সব্বে ধম্মা অনত্তাতি, যদা পঞ্ঞায পস্সতি;

অথ নিব্বিন্দতি দুক্খে, এস মগ্গো ৱিসুদ্ধিযা.

৬৭৯. ‘‘বুদ্ধানুবুদ্ধো যো থেৰো, কোণ্ডঞ্ঞো তিব্বনিক্কমো;

পহীনজাতিমৰণো, ব্ৰহ্মচৰিযস্স কেৱলী.

৬৮০. ‘‘ওঘপাসো দড়্হখিলো [দড়্হো খিলো (স্যা. ক.)], পব্বতো দুপ্পদালযো;

ছেত্ৱা খিলঞ্চ পাসঞ্চ, সেলং ভেত্ৱান [ছেত্ৱান (ক.)] দুব্ভিদং;

তিণ্ণো পাৰঙ্গতো ঝাযী, মুত্তো সো মাৰবন্ধনা.

৬৮১. ‘‘উদ্ধতো চপলো ভিক্খু, মিত্তে আগম্ম পাপকে;

সংসীদতি মহোঘস্মিং, ঊমিযা পটিকুজ্জিতো.

৬৮২. ‘‘অনুদ্ধতো অচপলো, নিপকো সংৱুতিন্দ্ৰিযো;

কল্যাণমিত্তো মেধাৱী, দুক্খস্সন্তকৰো সিযা.

৬৮৩. ‘‘কালপব্বঙ্গসঙ্কাসো, কিসো ধমনিসন্থতো;

মত্তঞ্ঞূ অন্নপানস্মিং, অদীনমনসো নৰো.

৬৮৪. ‘‘ফুট্ঠো ডংসেহি মকসেহি, অৰঞ্ঞস্মিং ব্ৰহাৱনে;

নাগো সঙ্গামসীসেৱ, সতো তত্ৰাধিৱাসযে.

৬৮৫. ‘‘নাভিনন্দামি মৰণং…পে… নিব্বিসং ভতকো যথা.

৬৮৬. ‘‘নাভিনন্দামি মৰণং…পে… সম্পজানো পতিস্সতো.

৬৮৭. ‘‘পৰিচিণ্ণো মযা সত্থা…পে… ভৱনেত্তি সমূহতা.

৬৮৮. ‘‘যস্স চত্থায পব্বজিতো, অগাৰস্মানগাৰিযং;

সো মে অত্থো অনুপ্পত্তো, কিং মে সদ্ধিৱিহাৰিনা’’তি.

… অঞ্ঞাসিকোণ্ডঞ্ঞো [অঞ্ঞাকোণ্ডঞ্ঞো (সী. স্যা.)] থেৰো….

২. উদাযিত্থেৰগাথা

৬৮৯. [অ. নি. ৬.৪৩] ‘‘মনুস্সভূতং সম্বুদ্ধং, অত্তদন্তং সমাহিতং;

ইৰিযমানং ব্ৰহ্মপথে, চিত্তস্সূপসমে ৰতং.

৬৯০. ‘‘যং মনুস্সা নমস্সন্তি, সব্বধম্মান পাৰগুং;

দেৱাপি তং নমস্সন্তি, ইতি মে অৰহতো সুতং.

৬৯১. ‘‘সব্বসংযোজনাতীতং, ৱনা নিব্বনমাগতং;

কামেহি নেক্খম্মৰতং [নিক্খম্মৰতং (ক.)], মুত্তং সেলাৱ কঞ্চনং.

৬৯২. ‘‘স ৱে অচ্চৰুচি নাগো, হিমৱাৱঞ্ঞে সিলুচ্চযে;

সব্বেসং নাগনামানং, সচ্চনামো অনুত্তৰো.

৬৯৩. ‘‘নাগং ৱো কিত্তযিস্সামি, ন হি আগুং কৰোতি সো;

সোৰচ্চং অৱিহিংসা চ, পাদা নাগস্স তে দুৱে.

৬৯৪. ‘‘সতি চ সম্পজঞ্ঞঞ্চ, চৰণা নাগস্স তেপৰে;

সদ্ধাহত্থো মহানাগো, উপেক্খাসেতদন্তৱা.

৬৯৫. ‘‘সতি গীৱা সিৰো পঞ্ঞা, ৱীমংসা ধম্মচিন্তনা;

ধম্মকুচ্ছিসমাৱাসো, ৱিৱেকো তস্স ৱালধি.

৬৯৬. ‘‘সো ঝাযী অস্সাসৰতো, অজ্ঝত্তং সুসমাহিতো;

গচ্ছং সমাহিতো নাগো, ঠিতো নাগো সমাহিতো.

৬৯৭. ‘‘সযং সমাহিতো নাগো, নিসিন্নোপি সমাহিতো;

সব্বত্থ সংৱুতো নাগো, এসা নাগস্স সম্পদা.

৬৯৮. ‘‘ভুঞ্জতি অনৱজ্জানি, সাৱজ্জানি ন ভুঞ্জতি;

ঘাসমচ্ছাদনং লদ্ধা, সন্নিধিং পৰিৱজ্জযং.

৬৯৯. ‘‘সংযোজনং অণুং থূলং, সব্বং ছেত্ৱান বন্ধনং;

যেন যেনেৱ গচ্ছতি, অনপক্খোৱ গচ্ছতি.

৭০০. ‘‘যথাপি উদকে জাতং, পুণ্ডৰীকং পৱড্ঢতি;

নোপলিপ্পতি তোযেন, সুচিগন্ধং মনোৰমং.

৭০১. ‘‘তথেৱ চ লোকে জাতো, বুদ্ধো লোকে ৱিহৰতি;

নোপলিপ্পতি লোকেন, তোযেন পদুমং যথা.

৭০২. ‘‘মহাগিনি পজ্জলিতো, অনাহাৰোপসম্মতি;

অঙ্গাৰেসু চ সন্তেসু, নিব্বুতোতি পৱুচ্চতি.

৭০৩. ‘‘অত্থস্সাযং ৱিঞ্ঞাপনী, উপমা ৱিঞ্ঞূহি দেসিতা;

ৱিঞ্ঞিস্সন্তি মহানাগা, নাগং নাগেন দেসিতং.

৭০৪. ‘‘ৱীতৰাগো ৱীতদোসো, ৱীতমোহো অনাসৱো;

সৰীৰং ৱিজহং নাগো, পৰিনিব্বিস্সত্যনাসৱো’’তি.

… উদাযী থেৰো….

সোড়সকনিপাতো নিট্ঠিতো.