১৪. চুদ্দসকনিপাতো

১. খদিৰৱনিযৰেৱতত্থেৰগাথা

৬৪৫. ‘‘যদা অহং পব্বজিতো, অগাৰস্মানগাৰিযং;

নাভিজানামি সঙ্কপ্পং, অনৰিযং দোসসংহিতং.

৬৪৬. ‘‘‘ইমে হঞ্ঞন্তু ৱজ্ঝন্তু, দুক্খং পপ্পোন্তু পাণিনো’;

সঙ্কপ্পং নাভিজানামি, ইমস্মিং দীঘমন্তৰে.

৬৪৭. ‘‘মেত্তঞ্চ অভিজানামি, অপ্পমাণং সুভাৱিতং;

অনুপুব্বং পৰিচিতং, যথা বুদ্ধেন দেসিতং.

৬৪৮. ‘‘সব্বমিত্তো সব্বসখো, সব্বভূতানুকম্পকো;

মেত্তচিত্তঞ্চ [মেত্তং চিত্তং (সী. স্যা.)] ভাৱেমি, অব্যাপজ্জৰতো [অব্যাপজ্ঝৰতো (সী. স্যা.)] সদা.

৬৪৯. ‘‘অসংহীৰং অসংকুপ্পং, চিত্তং আমোদযামহং;

ব্ৰহ্মৱিহাৰং ভাৱেমি, অকাপুৰিসসেৱিতং.

৬৫০. ‘‘অৱিতক্কং সমাপন্নো, সম্মাসম্বুদ্ধসাৱকো;

অৰিযেন তুণ্হীভাৱেন, উপেতো হোতি তাৱদে.

৬৫১. ‘‘যথাপি পব্বতো সেলো, অচলো সুপ্পতিট্ঠিতো;

এৱং মোহক্খযা ভিক্খু, পব্বতোৱ ন ৱেধতি.

৬৫২. ‘‘অনঙ্গণস্স পোসস্স, নিচ্চং সুচিগৱেসিনো;

ৱালগ্গমত্তং পাপস্স, অব্ভমত্তংৱ খাযতি.

৬৫৩. ‘‘নগৰং যথা পচ্চন্তং, গুত্তং সন্তৰবাহিৰং;

এৱং গোপেথ অত্তানং, খণো ৱো মা উপচ্চগা.

৬৫৪. ‘‘নাভিনন্দামি মৰণং, নাভিনন্দামি জীৱিতং;

কালঞ্চ পটিকঙ্খামি, নিব্বিসং ভতকো যথা.

৬৫৫. ‘‘নাভিনন্দামি মৰণং…পে… সম্পজানো পতিস্সতো.

৬৫৬. ‘‘পৰিচিণ্ণো মযা সত্থা, কতং বুদ্ধস্স সাসনং;

ওহিতো গৰুকো ভাৰো, ভৱনেত্তি সমূহতা.

৬৫৭. ‘‘যস্স চত্থায পব্বজিতো, অগাৰস্মানগাৰিযং;

সো মে অত্থো অনুপ্পত্তো, সব্বসংযোজনক্খযো.

৬৫৮. ‘‘সম্পাদেথপ্পমাদেন, এসা মে অনুসাসনী;

হন্দাহং পৰিনিব্বিস্সং, ৱিপ্পমুত্তোম্হি সব্বধী’’তি.

… খদিৰৱনিযৰেৱতো থেৰো….

২. গোদত্তত্থেৰগাথা

৬৫৯. ‘‘যথাপি ভদ্দো আজঞ্ঞো, ধুৰে যুত্তো ধুৰস্সহো [ধুৰাসহো (অট্ঠ.)];

মথিতো অতিভাৰেন, সংযুগং নাতিৱত্ততি.

৬৬০. ‘‘এৱং পঞ্ঞায যে তিত্তা, সমুদ্দো ৱাৰিনা যথা;

ন পৰে অতিমঞ্ঞন্তি, অৰিযধম্মোৱ পাণিনং.

৬৬১. ‘‘কালে কালৱসং পত্তা, ভৱাভৱৱসং গতা;

নৰা দুক্খং নিগচ্ছন্তি, তেধ সোচন্তি মাণৱা [মানৱা (সী.)].

৬৬২. ‘‘উন্নতা সুখধম্মেন, দুক্খধম্মেন চোনতা;

দ্ৱযেন বালা হঞ্ঞন্তি, যথাভূতং অদস্সিনো.

৬৬৩. ‘‘যে চ দুক্খে সুখস্মিঞ্চ, মজ্ঝে সিব্বিনিমচ্চগূ;

ঠিতা তে ইন্দখীলোৱ, ন তে উন্নতওনতা.

৬৬৪. ‘‘ন হেৱ লাভে নালাভে, ন যসে ন চ কিত্তিযা;

ন নিন্দাযং পসংসায, ন তে দুক্খে সুখম্হি.

৬৬৫. ‘‘সব্বত্থ তে ন লিম্পন্তি, উদবিন্দুৱ পোক্খৰে;

সব্বত্থ সুখিতা ধীৰা, সব্বত্থ অপৰাজিতা.

৬৬৬. ‘‘ধম্মেন চ অলাভো যো, যো চ লাভো অধম্মিকো;

অলাভো ধম্মিকো সেয্যো, যং চে লাভো অধম্মিকো.

৬৬৭. ‘‘যসো চ অপ্পবুদ্ধীনং, ৱিঞ্ঞূনং অযসো চ যো;

অযসোৱ সেয্যো ৱিঞ্ঞূনং, ন যসো অপ্পবুদ্ধিনং.

৬৬৮. ‘‘দুম্মেধেহি পসংসা চ, ৱিঞ্ঞূহি গৰহা চ যা;

গৰহাৱ সেয্যো ৱিঞ্ঞূহি, যং চে বালপ্পসংসনা.

৬৬৯. ‘‘সুখঞ্চ কামমযিকং, দুক্খঞ্চ পৱিৱেকিযং;

পৱিৱেকদুক্খং সেয্যো, যং চে কামমযং সুখং.

৬৭০. ‘‘জীৱিতঞ্চ অধম্মেন, ধম্মেন মৰণঞ্চ যং;

মৰণং ধম্মিকং সেয্যো, যং চে জীৱে অধম্মিকং.

৬৭১. ‘‘কামকোপপ্পহীনা যে, সন্তচিত্তা ভৱাভৱে;

চৰন্তি লোকে অসিতা, নত্থি তেসং পিযাপিযং.

৬৭২. ‘‘ভাৱযিত্ৱান বোজ্ঝঙ্গে, ইন্দ্ৰিযানি বলানি চ;

পপ্পুয্য পৰমং সন্তিং, পৰিনিব্বন্তিনাসৱা’’তি.

… গোদত্তো থেৰো….

চুদ্দসকনিপাতো নিট্ঠিতো.