১৩. তেৰসনিপাতো

১. সোণকোড়িৱিসত্থেৰগাথা

৬৩২. ‘‘যাহু ৰট্ঠে সমুক্কট্ঠো, ৰঞ্ঞো অঙ্গস্স পদ্ধগূ [পত্থগূ (স্যা.), পট্ঠগূ (ক.)];

স্ৱাজ্জ ধম্মেসু উক্কট্ঠো, সোণো দুক্খস্স পাৰগূ.

৬৩৩. ‘‘পঞ্চ ছিন্দে পঞ্চ জহে, পঞ্চ চুত্তৰি ভাৱযে;

পঞ্চসঙ্গাতিগো ভিক্খু, ওঘতিণ্ণোতি ৱুচ্চতি.

৬৩৪. ‘‘উন্নড়স্স পমত্তস্স, বাহিৰাসস্স [বাহিৰাসযস্স (ক.)] ভিক্খুনো;

সীলং সমাধি পঞ্ঞা চ, পাৰিপূৰিং ন গচ্ছতি.

৬৩৫. ‘‘যঞ্হি কিচ্চং অপৱিদ্ধং [তদপৱিদ্ধং (সী. স্যা.)], অকিচ্চং পন কৰীযতি;

উন্নড়ানং পমত্তানং, তেসং ৱড্ঢন্তি আসৱা.

৬৩৬. ‘‘যেসঞ্চ সুসমাৰদ্ধা, নিচ্চং কাযগতা সতি;

অকিচ্চং তে ন সেৱন্তি, কিচ্চে সাতচ্চকাৰিনো;

সতানং সম্পজানানং, অত্থং গচ্ছন্তি আসৱা.

৬৩৭. ‘‘উজুমগ্গম্হি অক্খাতে, গচ্ছথ মা নিৱত্তথ;

অত্তনা চোদযত্তানং, নিব্বানমভিহাৰযে.

৬৩৮. ‘‘অচ্চাৰদ্ধম্হি ৱীৰিযম্হি, সত্থা লোকে অনুত্তৰো;

ৱীণোপমং কৰিত্ৱা মে, ধম্মং দেসেসি চক্খুমা;

তস্সাহং ৱচনং সুত্ৱা, ৱিহাসিং সাসনে ৰতো.

৬৩৯. ‘‘সমথং পটিপাদেসিং, উত্তমত্থস্স পত্তিযা;

তিস্সো ৱিজ্জা অনুপ্পত্তা, কতং বুদ্ধস্স সাসনং.

৬৪০. ‘‘নেক্খম্মে [নিক্খমে (ক.), নেক্খম্মং (মহাৱ. ২৪৪; অ. নি. ৬.৫৫)] অধিমুত্তস্স, পৱিৱেকঞ্চ চেতসো;

অব্যাপজ্ঝাধিমুত্তস্স [অব্যাপজ্ঝাধিম্হত্তস্স (ক.)], উপাদানক্খযস্স চ.

৬৪১. ‘‘তণ্হক্খযাধিমুত্তস্স, অসম্মোহঞ্চ চেতসো;

দিস্ৱা আযতনুপ্পাদং, সম্মা চিত্তং ৱিমুচ্চতি.

৬৪২. ‘‘তস্স সম্মা ৱিমুত্তস্স, সন্তচিত্তস্স ভিক্খুনো;

কতস্স পটিচযো নত্থি, কৰণীযং ন ৱিজ্জতি.

৬৪৩. ‘‘সেলো যথা একঘনো [একঘনো (ক.)], ৱাতেন ন সমীৰতি;

এৱং ৰূপা ৰসা সদ্দা, গন্ধা ফস্সা চ কেৱলা.

৬৪৪. ‘‘ইট্ঠা ধম্মা অনিট্ঠা চ, নপ্পৱেধেন্তি তাদিনো;

ঠিতং চিত্তং ৱিসঞ্ঞুত্তং, ৱযঞ্চস্সানুপস্সতী’’তি.

… সোণো কোড়িৱিসো থেৰো….

তেৰসনিপাতো নিট্ঠিতো.