২. সুনীতত্থেৰগাথা

৬২০. ‘‘নীচে কুলম্হি জাতোহং, দলিদ্দো অপ্পভোজনো;

হীনকম্মং [হীনং কম্মং (স্যা.)] মমং আসি, অহোসিং পুপ্ফছড্ডকো.

৬২১. ‘‘জিগুচ্ছিতো মনুস্সানং, পৰিভূতো চ ৱম্ভিতো;

নীচং মনং কৰিত্ৱান, ৱন্দিস্সং বহুকং জনং.

৬২২. ‘‘অথদ্দসাসিং সম্বুদ্ধং, ভিক্খুসঙ্ঘপুৰক্খতং;

পৱিসন্তং মহাৱীৰং, মগধানং পুৰুত্তমং.

৬২৩. ‘‘নিক্খিপিত্ৱান ব্যাভঙ্গিং, ৱন্দিতুং উপসঙ্কমিং;

মমেৱ অনুকম্পায, অট্ঠাসি পুৰিসুত্তমো.

৬২৪. ‘‘ৱন্দিত্ৱা সত্থুনো পাদে, একমন্তং ঠিতো তদা;

পব্বজ্জং অহমাযাচিং, সব্বসত্তানমুত্তমং.

৬২৫. ‘‘ততো কাৰুণিকো সত্থা, সব্বলোকানুকম্পকো;

‘এহি ভিক্খূ’তি মং আহ, সা মে আসূপসম্পদা.

৬২৬. ‘‘সোহং একো অৰঞ্ঞস্মিং, ৱিহৰন্তো অতন্দিতো;

অকাসিং সত্থুৱচনং, যথা মং ওৱদী জিনো.

৬২৭. ‘‘ৰত্তিযা পঠমং যামং, পুব্বজাতিমনুস্সৰিং;

ৰত্তিযা মজ্ঝিমং যামং, দিব্বচক্খুং ৱিসোধযিং [দিব্বচক্খু ৱিসোধিতং (ক.)];

ৰত্তিযা পচ্ছিমে যামে, তমোখন্ধং পদালযিং.

৬২৮. ‘‘ততো ৰত্যা ৱিৱসানে, সূৰিযস্সুগ্গমনং পতি;

ইন্দো ব্ৰহ্মা চ আগন্ত্ৱা, মং নমস্সিংসু পঞ্জলী.

৬২৯. ‘‘‘নমো তে পুৰিসাজঞ্ঞ, নমো তে পুৰিসুত্তম;

যস্স তে আসৱা খীণা, দক্খিণেয্যোসি মাৰিস’.

৬৩০. ‘‘ততো দিস্ৱান মং সত্থা, দেৱসঙ্ঘপুৰক্খতং;

সিতং পাতুকৰিত্ৱান, ইমমত্থং অভাসথ.

৬৩১. [সু. নি. ৬৬০ সুত্তনিপাতেপি] ‘‘‘তপেন ব্ৰহ্মচৰিযেন, সংযমেন দমেন চ;

এতেন ব্ৰাহ্মণো হোতি, এতং ব্ৰাহ্মণমুত্তম’’’ন্তি.

… সুনীতো থেৰো….

দ্ৱাদসকনিপাতো নিট্ঠিতো.