৪. চূড়পন্থকত্থেৰগাথা

৫৫৭. ‘‘দন্ধা ময্হং গতী আসি, পৰিভূতো পুৰে অহং;

ভাতা চ মং পণামেসি, ‘গচ্ছ দানি তুৱং ঘৰং’.

৫৫৮. ‘‘সোহং পণামিতো সন্তো [ভাতা (অট্ঠ.)], সঙ্ঘাৰামস্স কোট্ঠকে;

দুম্মনো তত্থ অট্ঠাসিং, সাসনস্মিং অপেক্খৱা.

৫৫৯. ‘‘ভগৱা তত্থ আগচ্ছি [আগঞ্ছি (সী. পী.)], সীসং ময্হং পৰামসি;

বাহায মং গহেত্ৱান, সঙ্ঘাৰামং পৱেসযি.

৫৬০. ‘‘অনুকম্পায মে সত্থা, পাদাসি পাদপুঞ্ছনিং;

‘এতং সুদ্ধং অধিট্ঠেহি, একমন্তং স্ৱধিট্ঠিতং’.

৫৬১. ‘‘তস্সাহং ৱচনং সুত্ৱা, ৱিহাসিং সাসনে ৰতো;

সমাধিং পটিপাদেসিং, উত্তমত্থস্স পত্তিযা.

৫৬২. ‘‘পুব্বেনিৱাসং জানামি, দিব্বচক্খু ৱিসোধিতং;

তিস্সো ৱিজ্জা অনুপ্পত্তা, কতং বুদ্ধস্স সাসনং.

৫৬৩. ‘‘সহস্সক্খত্তুমত্তানং, নিম্মিনিত্ৱান পন্থকো;

নিসীদম্বৱনে ৰম্মে, যাৱ কালপ্পৱেদনা.

৫৬৪. ‘‘ততো মে সত্থা পাহেসি, দূতং কালপ্পৱেদকং;

পৱেদিতম্হি কালম্হি, ৱেহাসাদুপসঙ্কমিং [ৱেহাসানুপসঙ্কমিং (স্যা. ক.)].

৫৬৫. ‘‘ৱন্দিত্ৱা সত্থুনো পাদে, একমন্তং নিসীদহং;

নিসিন্নং মং ৱিদিত্ৱান, অথ সত্থা পটিগ্গহি.

৫৬৬. ‘‘আযাগো সব্বলোকস্স, আহুতীনং পটিগ্গহো;

পুঞ্ঞক্খেত্তং মনুস্সানং, পটিগণ্হিত্থ দক্খিণ’’ন্তি.

… চূড়পন্থকো থেৰো….