৯. নৱমৱগ্গো

৮১. ‘‘যং মযা পকতং পাপং, পুব্বে অঞ্ঞাসু জাতিসু;

ইধেৱ তং ৱেদনীযং, ৱত্থু অঞ্ঞং ন ৱিজ্জতী’’তি.

… সমিতিগুত্তো থেৰো….

৮২. ‘‘যেন যেন সুভিক্খানি, সিৱানি অভযানি চ;

তেন পুত্তক গচ্ছস্সু, মা সোকাপহতো ভৱা’’তি.

… কস্সপো থেৰো….

৮৩. ‘‘সীহপ্পমত্তো ৱিহৰ, ৰত্তিন্দিৱমতন্দিতো;

ভাৱেহি কুসলং ধম্মং, জহ সীঘং সমুস্সয’’ন্তি.

… সীহো থেৰো….

৮৪. ‘‘সব্বৰত্তিং সুপিত্ৱান, দিৱা সঙ্গণিকে ৰতো;

কুদাস্সু নাম দুম্মেধো, দুক্খস্সন্তং কৰিস্সতী’’তি.

… নীতো থেৰো….

৮৫. ‘‘চিত্তনিমিত্তস্স কোৱিদো, পৱিৱেকৰসং ৱিজানিয;

ঝাযং নিপকো পতিস্সতো, অধিগচ্ছেয্য সুখং নিৰামিস’’ন্তি.

… সুনাগো থেৰো….

৮৬. ‘‘ইতো বহিদ্ধা পুথু অঞ্ঞৱাদিনং, মগ্গো ন নিব্বানগমো যথা অযং;

ইতিস্সু সঙ্ঘং ভগৱানুসাসতি, সত্থা সযং পাণিতলেৱ দস্সয’’ন্তি.

… নাগিতো থেৰো….

৮৭. ‘‘খন্ধা দিট্ঠা যথাভূতং, ভৱা সব্বে পদালিতা;

ৱিক্খীণো জাতিসংসাৰো, নত্থি দানি পুনব্ভৱো’’তি.

… পৱিট্ঠো থেৰো….

৮৮. ‘‘অসক্খিং ৱত অত্তানং, উদ্ধাতুং উদকা থলং;

ৱুয্হমানো মহোঘেৱ, সচ্চানি পটিৱিজ্ঝহ’’ন্তি.

… অজ্জুনো থেৰো….

৮৯. ‘‘উত্তিণ্ণা পঙ্কপলিপা, পাতালা পৰিৱজ্জিতা;

মুত্তো ওঘা চ গন্থা চ, সব্বে মানা ৱিসংহতা’’তি.

… দেৱসভো থেৰো….

৯০. ‘‘পঞ্চক্খন্ধা পৰিঞ্ঞাতা, তিট্ঠন্তি ছিন্নমূলকা;

ৱিক্খীণো জাতিসংসাৰো, নত্থি দানি পুনব্ভৱো’’তি.

… সামিদত্তো থেৰো….

ৱগ্গো নৱমো নিট্ঠিতো.

তস্সুদ্দানং –

থেৰো সমিতিগুত্তো চ, কস্সপো সীহসৱ্হযো;

নীতো সুনাগো নাগিতো, পৱিট্ঠো অজ্জুনো ইসি;

দেৱসভো চ যো থেৰো, সামিদত্তো মহব্বলোতি.