১০. দসমৱগ্গো

১. পৰিপুণ্ণকত্থেৰগাথা

৯১. ‘‘ন তথা মতং সতৰসং, সুধন্নং যং মযজ্জ পৰিভুত্তং;

অপৰিমিতদস্সিনা গোতমেন, বুদ্ধেন দেসিতো ধম্মো’’তি.

… পৰিপুণ্ণকো থেৰো….

২. ৱিজযত্থেৰগাথা

৯২. ‘‘যস্সাসৱা পৰিক্খীণা, আহাৰে চ অনিস্সিতো;

সুঞ্ঞতা অনিমিত্তো চ, ৱিমোক্খো যস্স গোচৰো;

আকাসেৱ সকুন্তানং, পদং তস্স দুৰন্নয’’ন্তি.

… ৱিজযো থেৰো….

৩. এৰকত্থেৰগাথা

৯৩. ‘‘দুক্খা কামা এৰক, ন সুখা কামা এৰক;

যো কামে কামযতি, দুক্খং সো কামযতি এৰক;

যো কামে ন কামযতি, দুক্খং সো ন কামযতি এৰকা’’তি.

… এৰকো থেৰো….

৪. মেত্তজিত্থেৰগাথা

৯৪. ‘‘নমো হি তস্স ভগৱতো, সক্যপুত্তস্স সিৰীমতো;

তেনাযং অগ্গপ্পত্তেন, অগ্গধম্মো [অগ্গো ধম্মো (সী.)] সুদেসিতো’’তি.

… মেত্তজি থেৰো….

৫. চক্খুপালত্থেৰগাথা

৯৫. ‘‘অন্ধোহং হতনেত্তোস্মি, কন্তাৰদ্ধানপক্খন্দো [পক্খন্নো (সী.), পক্কন্তো (স্যা. সী. অট্ঠ.)];

সযমানোপি গচ্ছিস্সং, ন সহাযেন পাপেনা’’তি.

… চক্খুপালো থেৰো….

৬. খণ্ডসুমনত্থেৰগাথা

৯৬. ‘‘একপুপ্ফং চজিত্ৱান, অসীতি [অসীতিং (সী.)] ৱস্সকোটিযো;

সগ্গেসু পৰিচাৰেত্ৱা, সেসকেনম্হি নিব্বুতো’’তি.

… খণ্ডসুমনো থেৰো….

৭. তিস্সত্থেৰগাথা

৯৭. ‘‘হিত্ৱা সতপলং কংসং, সোৱণ্ণং সতৰাজিকং;

অগ্গহিং মত্তিকাপত্তং, ইদং দুতিযাভিসেচন’’ন্তি.

… তিস্সো থেৰো….

৮. অভযত্থেৰগাথা

৯৮. ‘‘ৰূপং দিস্ৱা সতি মুট্ঠা, পিযং নিমিত্তং মনসিকৰোতো;

সাৰত্তচিত্তো ৱেদেতি, তঞ্চ অজ্ঝোস তিট্ঠতি;

তস্স ৱড্ঢন্তি আসৱা, ভৱমূলোপগামিনো’’তি [ভৱমূলা ভৱগামিনোতি (সী. ক.)].

… অভযো থেৰো….

৯. উত্তিযত্থেৰগাথা

৯৯. ‘‘সদ্দং সুত্ৱা সতি মুট্ঠা, পিযং নিমিত্তং মনসিকৰোতো;

সাৰত্তচিত্তো ৱেদেতি, তঞ্চ অজ্ঝোস তিট্ঠতি;

তস্স ৱড্ঢন্তি আসৱা, সংসাৰং উপগামিনো’’তি.

… উত্তিযো থেৰো….

১০. (দুতিয)-দেৱসভত্থেৰগাথা

১০০. ‘‘সম্মপ্পধানসম্পন্নো, সতিপট্ঠানগোচৰো;

ৱিমুত্তিকুসুমসঞ্ছন্নো, পৰিনিব্বিস্সত্যনাসৱো’’তি.

… দেৱসভো থেৰো….

ৱগ্গো দসমো নিট্ঠিতো.

তস্সুদ্দানং –

পৰিপুণ্ণকো চ ৱিজযো, এৰকো মেত্তজী মুনি;

চক্খুপালো খণ্ডসুমনো, তিস্সো চ অভযো তথা;

উত্তিযো চ মহাপঞ্ঞো, থেৰো দেৱসভোপি চাতি.