১১. একাদসমৱগ্গো

১. বেলট্ঠানিকত্থেৰগাথা

১০১. ‘‘হিত্ৱা গিহিত্তং অনৱোসিতত্তো, মুখনঙ্গলী ওদৰিকো কুসীতো;

মহাৱৰাহোৱ নিৱাপপুট্ঠো, পুনপ্পুনং গব্ভমুপেতি মন্দো’’তি.

… বেলট্ঠানিকো থেৰো….

২. সেতুচ্ছত্থেৰগাথা

১০২. ‘‘মানেন ৱঞ্চিতাসে, সঙ্খাৰেসু সংকিলিস্সমানাসে;

লাভালাভেন মথিতা, সমাধিং নাধিগচ্ছন্তী’’তি.

… সেতুচ্ছো থেৰো….

৩. বন্ধুৰত্থেৰগাথা

১০৩. ‘‘নাহং এতেন অত্থিকো, সুখিতো ধম্মৰসেন তপ্পিতো;

পিত্ৱা [পীত্ৱান (সী. স্যা.)] ৰসগ্গমুত্তমং, ন চ কাহামি ৱিসেন সন্থৱ’’ন্তি.

… বন্ধুৰো [বন্ধনো (ক.)] থেৰো….

৪. খিতকত্থেৰগাথা

১০৪. ‘‘লহুকো ৱত মে কাযো, ফুট্ঠো চ পীতিসুখেন ৱিপুলেন;

তূলমিৱ এৰিতং মালুতেন, পিলৱতীৱ মে কাযো’’তি.

… খিতকো থেৰো….

৫. মলিতৱম্ভত্থেৰগাথা

১০৫. ‘‘উক্কণ্ঠিতোপি ন ৱসে, ৰমমানোপি পক্কমে;

ন ত্ৱেৱানত্থসংহিতং, ৱসে ৱাসং ৱিচক্খণো’’তি.

… মলিতৱম্ভো থেৰো….

৬. সুহেমন্তত্থেৰগাথা

১০৬. ‘‘সতলিঙ্গস্স অত্থস্স, সতলক্খণধাৰিনো;

একঙ্গদস্সী দুম্মেধো, সতদস্সী চ পণ্ডিতো’’তি.

… সুহেমন্তো থেৰো….

৭. ধম্মসৱত্থেৰগাথা

১০৭. ‘‘পব্বজিং তুলযিত্ৱান, অগাৰস্মানগাৰিযং;

তিস্সো ৱিজ্জা অনুপ্পত্তা, কতং বুদ্ধস্স সাসন’’ন্তি.

… ধম্মসৱো থেৰো….

৮. ধম্মসৱপিতুত্থেৰগাথা

১০৮. ‘‘স ৱীসৱস্সসতিকো, পব্বজিং অনগাৰিযং;

তিস্সো ৱিজ্জা অনুপ্পত্তা, কতং বুদ্ধস্স সাসন’’ন্তি.

… ধম্মসৱপিতু থেৰো….

৯. সঙ্ঘৰক্খিতত্থেৰগাথা

১০৯. ‘‘ন নূনাযং পৰমহিতানুকম্পিনো, ৰহোগতো অনুৱিগণেতি সাসনং;

তথাহযং ৱিহৰতি পাকতিন্দ্ৰিযো, মিগী যথা তৰুণজাতিকা ৱনে’’তি.

… সঙ্ঘৰক্খিতো থেৰো….

১০. উসভত্থেৰগাথা

১১০. ‘‘নগা নগগ্গেসু সুসংৱিৰূড়্হা, উদগ্গমেঘেন নৱেন সিত্তা;

ৱিৱেককামস্স অৰঞ্ঞসঞ্ঞিনো, জনেতি ভিয্যো উসভস্স কল্যত’’ন্তি.

… উসভো থেৰো….

ৱগ্গো একাদসমো নিট্ঠিতো.

তস্সুদ্দানং –

বেলট্ঠানিকো সেতুচ্ছো, বন্ধুৰো খিতকো ইসি;

মলিতৱম্ভো সুহেমন্তো, ধম্মসৱো ধম্মসৱপিতা;

সঙ্ঘৰক্খিতত্থেৰো চ, উসভো চ মহামুনীতি.