১২. দ্ৱাদসমৱগ্গো

১১১. ‘‘দুপ্পব্বজ্জং ৱে দুৰধিৱাসা গেহা, ধম্মো গম্ভীৰো দুৰধিগমা ভোগা;

কিচ্ছা ৱুত্তি নো ইতৰীতৰেনেৱ, যুত্তং চিন্তেতুং সততমনিচ্চত’’ন্তি.

… জেন্তো থেৰো….

১১২. ‘‘তেৱিজ্জোহং মহাঝাযী, চেতোসমথকোৱিদো;

সদত্থো মে অনুপ্পত্তো, কতং বুদ্ধস্স সাসন’’ন্তি.

… ৱচ্ছগোত্তো থেৰো….

১১৩. ‘‘অচ্ছোদিকা পুথুসিলা,গোনঙ্গুলমিগাযুতা;

অম্বুসেৱালসঞ্ছন্না, তে সেলা ৰমযন্তি ম’’ন্তি.

… ৱনৱচ্ছো থেৰো….

১১৪. ‘‘কাযদুট্ঠুল্লগৰুনো, হিয্যমানম্হি [হীযমানম্হি (সী.)] জীৱিতে;

সৰীৰসুখগিদ্ধস্স, কুতো সমণসাধুতা’’তি.

… অধিমুত্তো থেৰো….

১১৫. ‘‘এসাৱহিয্যসে পব্বতেন, বহুকুটজসল্লকিকেন [সল্লকিতেন (সী.), সল্লৰিকেন (স্যা.)];

নেসাদকেন গিৰিনা, যসস্সিনা পৰিচ্ছদেনা’’তি.

… মহানামো থেৰো….

১১৬. ‘‘ছফস্সাযতনে হিত্ৱা, গুত্তদ্ৱাৰো সুসংৱুতো;

অঘমূলং ৱমিত্ৱান, পত্তো মে আসৱক্খযো’’তি.

… পাৰাপৰিযো [পাৰাসৰিযো (সী.), পাৰংপৰিযো (ক.)] থেৰো ….

১১৭. ‘‘সুৱিলিত্তো সুৱসনো,সব্বাভৰণভূসিতো;

তিস্সো ৱিজ্জা অজ্ঝগমিং, কতং বুদ্ধস্স সাসন’’ন্তি.

… যসো থেৰো….

১১৮. ‘‘অভিসত্তোৱ নিপততি, ৱযো ৰূপং অঞ্ঞমিৱ তথেৱ সন্তং;

তস্সেৱ সতো অৱিপ্পৱসতো, অঞ্ঞস্সেৱ সৰামি অত্তান’’ন্তি.

… কিমিলো [কিম্বিলো (সী. স্যা.)] থেৰো….

১১৯. ‘‘ৰুক্খমূলগহনং পসক্কিয, নিব্বানং হদযস্মিং ওপিয;

ঝায গোতম মা চ পমাদো, কিং তে বিড়িবিড়িকা কৰিস্সতী’’তি.

… ৱজ্জিপুত্তো থেৰো….

১২০. ‘‘পঞ্চক্খন্ধা পৰিঞ্ঞাতা, তিট্ঠন্তি ছিন্নমূলকা;

দুক্খক্খযো অনুপ্পত্তো,পত্তো মে আসৱক্খযো’’তি.

… ইসিদত্তো থেৰো….

ৱগ্গো দ্ৱাদসমো নিট্ঠিতো.

তস্সুদ্দানং –

জেন্তো চ ৱচ্ছগোত্তো চ, ৱচ্ছো চ ৱনসৱ্হযো;

অধিমুত্তো মহানামো, পাৰাপৰিযো যসোপি চ;

কিমিলো ৱজ্জিপুত্তো চ, ইসিদত্তো মহাযসোতি.

এককনিপাতো নিট্ঠিতো.