৮. অট্ঠমৱগ্গো

৭১. ‘‘সুসুখুমনিপুণত্থদস্সিনা, মতিকুসলেন নিৱাতৱুত্তিনা;

সংসেৱিতৱুদ্ধসীলিনা [সংসেৱিতবুদ্ধসীলিনা (ক.)], নিব্বানং ন হি তেন দুল্লভ’’ন্তি.

… ৱচ্ছপালো থেৰো….

৭২. ‘‘যথা কড়ীৰো সুসু ৱড্ঢিতগ্গো, দুন্নিক্খমো হোতি পসাখজাতো;

এৱং অহং ভৰিযাযানিতায, অনুমঞ্ঞং মং পব্বজিতোম্হি দানী’’তি.

… আতুমো থেৰো….

৭৩. ‘‘জিণ্ণঞ্চ দিস্ৱা দুখিতঞ্চ ব্যাধিতং, মতঞ্চ দিস্ৱা গতমাযুসঙ্খযং;

ততো অহং নিক্খমিতূন পব্বজিং, পহায কামানি মনোৰমানী’’তি.

… মাণৱো থেৰো….

৭৪. ‘‘কামচ্ছন্দো চ ব্যাপাদো, থিনমিদ্ধঞ্চ [থীনমিদ্ধঞ্চ (সী. স্যা.)] ভিক্খুনো;

উদ্ধচ্চং ৱিচিকিচ্ছা চ, সব্বসোৱ ন ৱিজ্জতী’’তি.

… সুযামনো থেৰো….

৭৫. ‘‘সাধু সুৱিহিতান দস্সনং, কঙ্খা ছিজ্জতি বুদ্ধি ৱড্ঢতি;

বালম্পি কৰোন্তি পণ্ডিতং, তস্মা সাধু সতং সমাগমো’’তি.

… সুসাৰদো থেৰো….

৭৬. ‘‘উপ্পতন্তেসু নিপতে, নিপতন্তেসু উপ্পতে;

ৱসে অৱসমানেসু, ৰমমানেসু নো ৰমে’’তি.

… পিযঞ্জহো থেৰো….

৭৭. ‘‘ইদং পুৰে চিত্তমচাৰি চাৰিকং, যেনিচ্ছকং যত্থকামং যথাসুখং;

তদজ্জহং নিগ্গহেস্সামি যোনিসো, হত্থিপ্পভিন্নং ৱিয অঙ্কুসগ্গহো’’তি.

… হত্থাৰোহপুত্তো থেৰো….

৭৮. ‘‘অনেকজাতিসংসাৰং, সন্ধাৱিস্সং অনিব্বিসং;

তস্স মে দুক্খজাতস্স, দুক্খক্খন্ধো অপৰদ্ধো’’তি.

… মেণ্ডসিৰো থেৰো….

৭৯. ‘‘সব্বো ৰাগো পহীনো মে, সব্বো দোসো সমূহতো;

সব্বো মে ৱিগতো মোহো, সীতিভূতোস্মি নিব্বুতো’’তি.

… ৰক্খিতো থেৰো….

৮০. ‘‘যং মযা পকতং কম্মং, অপ্পং ৱা যদি ৱা বহুং;

সব্বমেতং পৰিক্খীণং, নত্থি দানি পুনব্ভৱো’’তি.

… উগ্গো থেৰো….

ৱগ্গো অট্ঠমো নিট্ঠিতো.

তস্সুদ্দানং –

ৱচ্ছপালো চ যো থেৰো, আতুমো মাণৱো ইসি;

সুযামনো সুসাৰদো, থেৰো যো চ পিযঞ্জহো;

আৰোহপুত্তো মেণ্ডসিৰো, ৰক্খিতো উগ্গসৱ্হযোতি.