৭. সত্তমৱগ্গো

৬১. ‘‘পস্সতি পস্সো পস্সন্তং, অপস্সন্তঞ্চ পস্সতি;

অপস্সন্তো অপস্সন্তং, পস্সন্তঞ্চ ন পস্সতী’’তি.

… ৱপ্পো থেৰো….

৬২. ‘‘এককা মযং অৰঞ্ঞে ৱিহৰাম, অপৱিদ্ধংৱ ৱনস্মিং দাৰুকং;

তস্স মে বহুকা পিহযন্তি, নেৰযিকা ৱিয সগ্গগামিন’’ন্তি.

… ৱজ্জিপুত্তো থেৰো….

৬৩. ‘‘চুতা পতন্তি পতিতা, গিদ্ধা চ পুনৰাগতা;

কতং কিচ্চং ৰতং ৰম্মং, সুখেনন্ৱাগতং সুখ’’ন্তি.

… পক্খো থেৰো….

৬৪. ‘‘দুমৱ্হযায উপ্পন্নো, জাতো পণ্ডৰকেতুনা;

কেতুহা কেতুনাযেৱ, মহাকেতুং পধংসযী’’তি.

… ৱিমলকোণ্ডঞ্ঞো থেৰো….

৬৫. ‘‘উক্খেপকতৱচ্ছস্স, সঙ্কলিতং বহূহি ৱস্সেহি;

তং ভাসতি গহট্ঠানং, সুনিসিন্নো উড়াৰপামোজ্জো’’তি.

… উক্খেপকতৱচ্ছো থেৰো….

৬৬. ‘‘অনুসাসি মহাৱীৰো, সব্বধম্মান পাৰগূ;

তস্সাহং ধম্মং সুত্ৱান, ৱিহাসিং সন্তিকে সতো;

তিস্সো ৱিজ্জা অনুপ্পত্তা, কতং বুদ্ধস্স সাসন’’ন্তি.

… মেঘিযো থেৰো….

৬৭. ‘‘কিলেসা ঝাপিতা ময্হং, ভৱা সব্বে সমূহতা;

ৱিক্খীণো জাতিসংসাৰো, নত্থি দানি পুনব্ভৱো’’তি.

… একধম্মসৱনীযো থেৰো….

৬৮. [উদা. ৩৭; পাচি. ১৫৩] ‘‘অধিচেতসো অপ্পমজ্জতো, মুনিনো মোনপথেসু সিক্খতো;

সোকা ন ভৱন্তি তাদিনো, উপসন্তস্স সদা সতীমতো’’তি.

… একুদানিযো থেৰো….

৬৯. ‘‘সুত্ৱান ধম্মং মহতো মহাৰসং, সব্বঞ্ঞুতঞ্ঞাণৱৰেন দেসিতং;

মগ্গং পপজ্জিং [পপজ্জং (ক.)] অমতস্স পত্তিযা, সো যোগক্খেমস্স পথস্স কোৱিদো’’তি.

… ছন্নো থেৰো….

৭০. ‘‘সীলমেৱ ইধ অগ্গং, পঞ্ঞৱা পন উত্তমো;

মনুস্সেসু চ দেৱেসু, সীলপঞ্ঞাণতো জয’’ন্তি.

… পুণ্ণো থেৰো….

ৱগ্গো সত্তমো নিট্ঠিতো.

তস্সুদ্দানং –

ৱপ্পো চ ৱজ্জিপুত্তো চ, পক্খো ৱিমলকোণ্ডঞ্ঞো;

উক্খেপকতৱচ্ছো চ, মেঘিযো একধম্মিকো;

একুদানিযছন্না চ, পুণ্ণত্থেৰো মহব্বলোতি.