৬. ছট্ঠৱগ্গো

১. গোধিকত্থেৰগাথা

৫১. ‘‘ৱস্সতি দেৱো যথা সুগীতং, ছন্না মে কুটিকা সুখা নিৱাতা;

চিত্তং সুসমাহিতঞ্চ ময্হং, অথ চে পত্থযসি পৱস্স দেৱা’’তি.

… গোধিকো থেৰো….

২. সুবাহুত্থেৰগাথা

৫২. ‘‘ৱস্সতি দেৱো যথা সুগীতং, ছন্না মে কুটিকা সুখা নিৱাতা;

চিত্তং সুসমাহিতঞ্চ কাযে, অথ চে পত্থযসি পৱস্স দেৱা’’তি.

… সুবাহুত্থেৰো….

৩. ৱল্লিযত্থেৰগাথা

৫৩. ‘‘ৱস্সতি দেৱো যথা সুগীতং, ছন্না মে কুটিকা সুখা নিৱাতা;

তস্সং ৱিহৰামি অপ্পমত্তো, অথ চে পত্থযসি পৱস্স দেৱা’’তি.

… ৱল্লিযো থেৰো….

৪. উত্তিযত্থেৰগাথা

৫৪. ‘‘ৱস্সতি দেৱো যথা সুগীতং, ছন্না মে কুটিকা সুখা নিৱাতা;

তস্সং ৱিহৰামি অদুতিযো, অথ চে পত্থযসি পৱস্স দেৱা’’তি.

… উত্তিযো থেৰো….

৫. অঞ্জনৱনিযত্থেৰগাথা

৫৫. ‘‘আসন্দিং কুটিকং কত্ৱা, ওগয্হ অঞ্জনং ৱনং;

তিস্সো ৱিজ্জা অনুপ্পত্তা, কতং বুদ্ধস্স সাসন’’ন্তি.

… অঞ্জনৱনিযো থেৰো….

৬. কুটিৱিহাৰিত্থেৰগাথা

৫৬. ‘‘কো কুটিকাযং ভিক্খু কুটিকাযং, ৱীতৰাগো সুসমাহিতচিত্তো;

এৱং জানাহি আৱুসো, অমোঘা তে কুটিকা কতা’’তি.

… কুটিৱিহাৰিত্থেৰো….

৭. দুতিযকুটিৱিহাৰিত্থেৰগাথা

৫৭. ‘‘অযমাহু পুৰাণিযা কুটি, অঞ্ঞং পত্থযসে নৱং কুটিং;

আসং কুটিযা ৱিৰাজয, দুক্খা ভিক্খু পুন নৱা কুটী’’তি.

… দুতিযকুটিৱিহাৰিত্থেৰো….

৮. ৰমণীযকুটিকত্থেৰগাথা

৫৮. ‘‘ৰমণীযা মে কুটিকা, সদ্ধাদেয্যা মনোৰমা;

ন মে অত্থো কুমাৰীহি, যেসং অত্থো তহিং গচ্ছথ নাৰিযো’’তি.

… ৰমণীযকুটিকো থেৰো….

৯. কোসলৱিহাৰিত্থেৰগাথা

৫৯. ‘‘সদ্ধাযাহং পব্বজিতো, অৰঞ্ঞে মে কুটিকা কতা;

অপ্পমত্তো চ আতাপী, সম্পজানো পতিস্সতো’’তি [পটিস্সতোতি (ক.)].

… কোসলৱিহাৰিত্থেৰো….

১০. সীৱলিত্থেৰগাথা

৬০. ‘‘তে মে ইজ্ঝিংসু সঙ্কপ্পা, যদত্থো পাৱিসিং কুটিং;

ৱিজ্জাৱিমুত্তিং পচ্চেসং, মানানুসযমুজ্জহ’’ন্তি.

… সীৱলিত্থেৰো….

ৱগ্গো ছট্ঠো নিট্ঠিতো.

তস্সুদ্দানং –

গোধিকো চ সুবাহু চ, ৱল্লিযো উত্তিযো ইসি;

অঞ্জনৱনিযো থেৰো, দুৱে কুটিৱিহাৰিনো;

ৰমণীযকুটিকো চ, কোসলৱ্হযসীৱলীতি.