৫. পঞ্চমৱগ্গো

৪১. ‘‘ৱিৱৰমনুপতন্তি ৱিজ্জুতা, ৱেভাৰস্স চ পণ্ডৱস্স চ;

নগৱিৱৰগতো চ ঝাযতি, পুত্তো অপ্পটিমস্স তাদিনো’’তি.

… সিৰিৱড্ঢো থেৰো….

৪২. ‘‘চালে উপচালে সীসূপচালে ( ) [(চালা উপচালা, সীসূপচালা) (ক.)] পতিস্সতা [পটিস্সতিকা (স্যা. ক.)] নু খো ৱিহৰথ;

আগতো ৱো ৱালং ৱিয ৱেধী’’তি.

… খদিৰৱনিযো থেৰো….

৪৩. ‘‘সুমুত্তিকো সুমুত্তিকো সাহু, সুমুত্তিকোম্হি তীহি খুজ্জকেহি;

অসিতাসু মযা নঙ্গলাসু, মযা খুদ্দকুদ্দালাসু মযা.

যদিপি ইধমেৱ ইধমেৱ, অথ ৱাপি অলমেৱ অলমেৱ;

ঝায সুমঙ্গল ঝায সুমঙ্গল, অপ্পমত্তো ৱিহৰ সুমঙ্গলা’’তি.

… সুমঙ্গলো থেৰো….

৪৪. [সং. নি. ১.২৩৯] ‘‘মতং ৱা অম্ম ৰোদন্তি, যো ৱা জীৱং ন দিস্সতি;

জীৱন্তং মং অম্ম পস্সন্তী, কস্মা মং অম্ম ৰোদসী’’তি.

… সানুত্থেৰো….

৪৫. ‘‘যথাপি ভদ্দো আজঞ্ঞো, খলিত্ৱা পতিতিট্ঠতি;

এৱং দস্সনসম্পন্নং, সম্মাসম্বুদ্ধসাৱক’’ন্তি.

… ৰমণীযৱিহাৰিত্থেৰো….

৪৬. ‘‘সদ্ধাযাহং পব্বজিতো, অগাৰস্মানগাৰিযং;

সতি পঞ্ঞা চ মে ৱুড্ঢা, চিত্তঞ্চ সুসমাহিতং;

কামং কৰস্সু ৰূপানি, নেৱ মং ব্যাধযিস্সসী’’তি [বাধযিস্সসীতি (সী.), ব্যাথযিস্সসীতি (?)].

… সমিদ্ধিত্থেৰো….

৪৭. ‘‘নমো তে বুদ্ধ ৱীৰত্থু, ৱিপ্পমুত্তোসি সব্বধি;

তুয্হাপদানে ৱিহৰং, ৱিহৰামি অনাসৱো’’তি.

… উজ্জযো থেৰো….

৪৮. ‘‘যতো অহং পব্বজিতো, অগাৰস্মানগাৰিযং;

নাভিজানামি সঙ্কপ্পং, অনৰিযং দোসসংহিত’’ন্তি.

… সঞ্জযো থেৰো….

৪৯. ‘‘চিহচিহাভিনদিতে [ৱিহৱিহাভিনদিতে (সী. স্যা.)], সিপ্পিকাভিৰুতেহি চ;

ন মে তং ফন্দতি চিত্তং, একত্তনিৰতং হি মে’’তি.

… ৰামণেয্যকো থেৰো….

৫০. ‘‘ধৰণী চ সিঞ্চতি ৱাতি, মালুতো ৱিজ্জুতা চৰতি নভে;

উপসমন্তি ৱিতক্কা, চিত্তং সুসমাহিতং মমা’’তি.

… ৱিমলো থেৰো….

ৱগ্গো পঞ্চমো নিট্ঠিতো.

তস্সুদ্দানং –

সিৰীৱড্ঢো ৰেৱতো থেৰো, সুমঙ্গলো সানুসৱ্হযো;

ৰমণীযৱিহাৰী চ, সমিদ্ধিউজ্জযসঞ্জযা;

ৰামণেয্যো চ সো থেৰো, ৱিমলো চ ৰণঞ্জহোতি.