৪. চতুত্থৱগ্গো

১. গহ্ৱৰতীৰিযত্থেৰগাথা

৩১. ‘‘ফুট্ঠো ডংসেহি মকসেহি, অৰঞ্ঞস্মিং ব্ৰহাৱনে;

নাগো সংগামসীসেৱ, সতো তত্ৰাধিৱাসযে’’তি.

… গহ্ৱৰতীৰিযো থেৰো….

২. সুপ্পিযত্থেৰগাথা

৩২. ‘‘অজৰং জীৰমানেন, তপ্পমানেন নিব্বুতিং;

নিমিযং [নিম্মিস্সং (সী.), নিৰামিসং (স্যা.), নিমিনেয্যং (?)] পৰমং সন্তিং, যোগক্খেমং অনুত্তৰ’’ন্তি.

… সুপ্পিযো থেৰো….

৩. সোপাকত্থেৰগাথা

৩৩. ‘‘যথাপি একপুত্তস্মিং, পিযস্মিং কুসলী সিযা;

এৱং সব্বেসু পাণেসু, সব্বত্থ কুসলো সিযা’’তি.

… সোপাকো থেৰো….

৪. পোসিযত্থেৰগাথা

৩৪. ‘‘অনাসন্নৱৰা এতা, নিচ্চমেৱ ৱিজানতা;

গামা অৰঞ্ঞমাগম্ম, ততো গেহং উপাৱিসি [উপাৱিসিং (সী.)];

ততো উট্ঠায পক্কামি, অনামন্তেত্ৱা [অনামন্তিয (সী.)] পোসিযো’’তি.

… পোসিযো থেৰো….

৫. সামঞ্ঞকানিত্থেৰগাথা

৩৫. ‘‘সুখং সুখত্থো লভতে তদাচৰং, কিত্তিঞ্চ পপ্পোতি যসস্স ৱড্ঢতি;

যো অৰিযমট্ঠঙ্গিকমঞ্জসং উজুং, ভাৱেতি মগ্গং অমতস্স পত্তিযা’’তি.

… সামঞ্ঞকানিত্থেৰো….

৬. কুমাপুত্তত্থেৰগাথা

৩৬. ‘‘সাধু সুতং সাধু চৰিতকং, সাধু সদা অনিকেতৱিহাৰো;

অত্থপুচ্ছনং পদক্খিণকম্মং, এতং সামঞ্ঞমকিঞ্চনস্সা’’তি.

… কুমাপুত্তো থেৰো….

৭. কুমাপুত্তসহাযকত্থেৰগাথা

৩৭. ‘‘নানাজনপদং যন্তি, ৱিচৰন্তা অসঞ্ঞতা;

সমাধিঞ্চ ৱিৰাধেন্তি, কিংসু ৰট্ঠচৰিযা কৰিস্সতি;

তস্মা ৱিনেয্য সাৰম্ভং, ঝাযেয্য অপুৰক্খতো’’তি.

… কুমাপুত্তত্থেৰস্স সহাযকো থেৰো….

৮. গৱম্পতিত্থেৰগাথা

৩৮. ‘‘যো ইদ্ধিযা সৰভুং অট্ঠপেসি, সো গৱম্পতি অসিতো অনেজো;

তং সব্বসঙ্গাতিগতং মহামুনিং, দেৱা নমস্সন্তি ভৱস্স পাৰগু’’ন্তি.

… গৱম্পতিত্থেৰো….

৯. তিস্সত্থেৰগাথা

৩৯. [সং. নি. ১.২১, ৯৭]‘‘সত্তিযা ৱিয ওমট্ঠো, ডয্হমানোৱ [ডয্হমানেৱ (সব্বত্থ)] মত্থকে;

কামৰাগপ্পহানায, সতো ভিক্খু পৰিব্বজে’’তি.

… তিস্সো থেৰো….

১০. ৱড্ঢমানত্থেৰগাথা

৪০. ‘‘সত্তিযা ৱিয ওমট্ঠো, ডয্হমানোৱ মত্থকে;

ভৱৰাগপ্পহানায, সতো ভিক্খু পৰিব্বজে’’তি.

… ৱড্ঢমানো থেৰো….

ৱগ্গো চতুত্থো নিট্ঠিতো.

তস্সুদ্দানং –

গহ্ৱৰতীৰিযো সুপ্পিযো, সোপাকো চেৱ পোসিযো;

সামঞ্ঞকানি কুমাপুত্তো, কুমাপুত্তসহাযকো;

গৱম্পতি তিস্সত্থেৰো, ৱড্ঢমানো মহাযসোতি.