৩. ততিযৱগ্গো

২১. ‘‘নাহং ভযস্স ভাযামি, সত্থা নো অমতস্স কোৱিদো;

যত্থ ভযং নাৱতিট্ঠতি, তেন মগ্গেন ৱজন্তি ভিক্খৱো’’তি.

… নিগ্ৰোধো থেৰো….

২২. ‘‘নীলা সুগীৱা সিখিনো, মোৰা কাৰম্ভিযং [কাৰংৱিযং (সী.), কাৰৱিযং (স্যা.)] অভিনদন্তি;

তে সীতৱাতকীড়িতা [সীতৱাতকদ্দিতকলিতা (সী.), সীতৱাতকলিতা (স্যা.)], সুত্তং ঝাযং [ঝানং (স্যা.), ঝাযিং (?)] নিবোধেন্তী’’তি.

… চিত্তকো থেৰো….

২৩. ‘‘অহং খো ৱেড়ুগুম্বস্মিং, ভুত্ৱান মধুপাযসং;

পদক্খিণং সম্মসন্তো, খন্ধানং উদযব্বযং;

সানুং পটিগমিস্সামি, ৱিৱেকমনুব্ৰূহয’’ন্তি.

… গোসালো থেৰো….

২৪. ‘‘অনুৱস্সিকো পব্বজিতো, পস্স ধম্মসুধম্মতং;

তিস্সো ৱিজ্জা অনুপ্পত্তা, কতং বুদ্ধস্স সাসন’’ন্তি.

… সুগন্ধো থেৰো….

২৫. ‘‘ওভাসজাতং ফলগং, চিত্তং যস্স অভিণ্হসো;

তাদিসং ভিক্খুমাসজ্জ, কণ্হ দুক্খং নিগচ্ছসী’’তি.

… নন্দিযো থেৰো….

২৬. ‘‘সুত্ৱা সুভাসিতং ৱাচং, বুদ্ধস্সাদিচ্চবন্ধুনো;

পচ্চব্যধিং হি নিপুণং, ৱালগ্গং উসুনা যথা’’তি.

… অভযো থেৰো….

২৭. ‘‘দব্বং কুসং পোটকিলং, উসীৰং মুঞ্জপব্বজং;

উৰসা পনুদিস্সামি, ৱিৱেকমনুব্ৰূহয’’ন্তি.

… লোমসকঙ্গিযো থেৰো….

২৮. ‘‘কচ্চি নো ৱত্থপসুতো, কচ্চি নো ভূসনাৰতো;

কচ্চি সীলমযং গন্ধং, কিং ত্ৱং ৱাযসি [কচ্চি সীলমযং গন্ধং, ত্ৱং ৱাসি (স্যা.)] নেতৰা পজা’’তি.

… জম্বুগামিকপুত্তো থেৰো….

২৯. ‘‘সমুন্নমযমত্তানং, উসুকাৰোৱ তেজনং;

চিত্তং উজুং কৰিত্ৱান, অৱিজ্জং ভিন্দ হাৰিতা’’তি.

… হাৰিতো থেৰো….

৩০. ‘‘আবাধে মে সমুপ্পন্নে, সতি মে উদপজ্জথ;

আবাধো মে সমুপ্পন্নো, কালো মে নপ্পমজ্জিতু’’ন্তি.

… উত্তিযো থেৰো….

ৱগ্গো ততিযো নিট্ঠিতো.

তস্সুদ্দানং –

নিগ্ৰোধো চিত্তকো থেৰো, গোসালথেৰো সুগন্ধো;

নন্দিযো অভযো থেৰো, থেৰো লোমসকঙ্গিযো;

জম্বুগামিকপুত্তো চ, হাৰিতো উত্তিযো ইসীতি.